Сусæггаг никæмæн у уый, æмæ Советон Цæдисы рæстæджы адæм чиныгæн стырдæр аргъ кæй кодтой. Хуссар Ирыстоны цæрджытæй-иу бирæтæ сæ кæрдзыны æхца дæр нæ бавгъау кодтой ног чингуытæ балхæныны сæраппонд.
Нæ царды Интернеты æмæ алыгъуызон нырыккон технологиты фæзындимæ чиныгæн уадиссаг кад нал уыд. Фæлæ та ныр чиныгмæ цæрджыты цымыдисдзинад рæзы. Уый бæрæг у уымæй дæр, æмæ нырма кæд раздæрау нæ, уæддæр адæм чиныгагур цæуын кæй райдыдтой библиотекæтæм, чингуытæуæйгæнæн магазинтæм. Кæй зæгъын æй хъæуы, змæст æмæ хæстон азты нæ республикæйы библиотекæты чингуыты фонд скадавар, фæлæ хъуыддаг хуыздæрырдæм ивын райдыдта. Ныр цалдæр азы дæргъы æрвылаз дæр РХИ-йы Культурæйы министрады хъæппæрисæй фæхъæздыгдæр вæййынц нæ республикæйы библиотекæты чингуыты фондтæ.
18-æм январы Æвзæнгты республикон библиотекæмæ бахизгæйæ, стъолтыл баййæфтон чингуыты рæдзæгъдтæ. Уым сæ куысты уæлхъус баййæфтон ацы уагдоны кусджыты сæ директор Тототы Ленæимæ. Уым ма уыд РХИ-йы Культурæйы министрады библиотекæты куысты фæдыл сæйраг специалист Дриаты Нателæ дæр. Уый нын куыд загъта, уымæ гæсгæ чингуытæ хъуамæ дих æрцæуой нæ республикæйы библиотекæтыл. Чингуытæ кæм æрæвæрдтаиккой, цæмæй сæ æмхуызонæй республикæйы библиотекæтыл адих кодтаиккой (æдæппæтæй республикæйы ис 65 библиотекæйы), уый тыххæй сын бынат кæй нæй, уымæ гæсгæ та сæ ныр дæр æрбаластой Æвзæнгты республикон библиотекæмæ.
Республикæйы библиотекæтæ фæхъæздыгдæр уыдзысты ахæм чингуытæй, куыд Дюмайы «Граф Монте-Кристо» (1 æмæ 2 томтæ), «Всадник без головы», «Любовник Леди Чаттерлей Лоуренс», «Остров сокровищ», «Праздник, который всегда с тобой», «Три мушкетера», Солженицыны «Раковый корпус» æмæ «Рассказы. Синяя книга» æмæ бирæ æндæртæй. Банысан кæнын хъæуы уый дæр, æмæ чингуыты ‘хсæн кæй сты сывæллæтты бирæ чингуытæ: «Сказка о рыбаке и рыбке», «Русские народные сказки», «Сказки Андерсен», «В траве сидел кузнечик» æмæ бирæ æндæртæ.
Дриаты Нателæйы ныхæстæм гæсгæ Республикæйы библиотекæты фондтæ ирон литературæйæ куыд баххæст сты, афтæ æндæр чингуытæй дæр систематикон æгъдауæй ифтонг куы цæуиккой, уæд библиотекæты фондты комплекткæнынады проблемæ скъуыддзаг æрцæуид. Фæлæ, зæгъгæ, мах ныфс ис, ацы аз литературæ самал кæныны тыххæй финанскæнынад кæй фæфылдæр уыдзæн, уымæй.
«Библиотекæтæ уырыссаг æмæ фæсарæйнаг литературæйы хъуагдзинад кæй æййафынц, уымæ гæсгæ фылдæр балхæдтам ахæм чингуытæ. 2018 азы райдианы РХИ-йы Культурæйы министрад чингуытæ самал кæныны тыххæй рахицæн кодта 310 мин сомы æмæ 2018 азы кæрон та – 251 мин сомы. Ивгъуыд азы райдианы мах фылдæр балхæдтам классикон литературæ æмæ ныр та уырыссаг æмæ фæсарæйнаг литературæ. Тынг бирæ балхæдтам сывæллæтты литературæ. Афтæ ма «Нарты кадджытæ», «Ирон адæмон сфæлдыстад» æмæ «Ирон фæндыр» дæр. Банысан кæнын мæ фæнды уый дæр, æмæ Анахарсисы номыл национ библиотекæйæн кæй рафыстам ахæм журналтæ, куыд «Москва», «Юность», «Нева», «Звезда» æмæ афтæ дарддæр, афтæ ма журнал «Иностранная литература» дæр. Чингуытæ дих æрцæудзысты горæтон æмæ районон библиотекæтыл æмæ ма дзы кæд баззайа, уæд дзы хъæууон библиотекæтæн дæр фæхай кæндзыстæм. Æдæппæтæй сты 820 чиныджы бæрц.
Ныр та мæ фæнды республикæйы цæр-джытæм, чиныгуарзджытæм æрсидын, цæмæй уыдон æрбацæуой библиотекæтæм æмæ æхцондзинад райсой ног чингуытæ кæсынæй. Мæнмæ гæсгæ, чиныгкæсджытæ библиотекæты ссардзысты, цы чингуытæ сæ хъæуы, уыдоны. Бузныджы ныхæстæ зæгъын мæ фæнды Æвзæнгты республикон библиотекæйы кусджытæн, кæцытæ мын стыр æххуыс бакæнынц библиотекон-библи-ографион классификацимæ гæсгæ чингуытæ бакусыныл æмæ сæ адих кæныны дæр. Афтæ ма бузныг дæн нæ горæты Хъайтарты уынджы чингуытæуæйгæнæн магазин «Чингуыты дунейы» сæргълæууæг Уалыты Белæйæ. Уый нын алыхатт дæр нæ къух саразы æмæ нын афоныл чингуытæ æрласы, куы йæм бахатæм, уæд», – загъта Дриаты чизг.
Джиоты Екатеринæ
Comments are closed, but trackbacks and pingbacks are open.