БАХХÆСТ БИБЛИОТЕКÆЙЫ ЧИНГУЫТЫ ФОНД

Сусæггаг никæмæн у уый, æмæ Советон Цæдисы рæстæджы адæм чиныгæн стырдæр аргъ кæй кодтой. Хуссар Ирыстоны цæрджытæй-иу бирæтæ сæ кæрдзыны æхца дæр нæ бавгъау кодтой ног чингуытæ балхæныны тыххæй. Æгæрыстæмæй-иу радты дæр слæууыдысты чингуытæуæйгæнæн магазины æмæ-иу сæ цы чингуытæ хъуыд, уыдон-иу сæ къухты куынæ бафтыдысты, уæд-иу мæстæйдзагæй аздæхтысты. Уæд, чи ахъуыды кодтаид, æмæ кæддæр радты цы чингуыты тыххæй лæууыдысты, уыдоны  цæрджытæй бирæтæ библиотекæтæм  кæй дæтдзысты, кæнæ та радты цы чингуыты тыххæй лæууыдысты, уыдоны сæ хæдзæртты ныккæндтæм  ныххæсдзысты, ууыл.

Советон Цæдисы ныппырхимæ æмæ нæ царды Интернеты æмæ алыгъуызон нырыккон технологиты фæзындимæ чиныгæн уадиссаг кад нал уыд. Фæлæ, та ныр чиныгмæ цæрджыты цымыдисдзинад фæтынгдæр. Уый  бæрæг у уымæй дæр, æмæ нырма кæд раздæрау нæ, уæддæр адæм чиныгагур цæуын кæй райдыдтой библиотекæтæм, чингуытæуæйгæнæн магазинтæм. Кæй зæгъын æй хъæуы, змæст æмæ хæстон азты нæ республикæйы библиотекæты чингуыты фонд скадавар, фæлæ ныр хъуыддаг хуыздæрырдæм ивын райдыдта. Ныр цалдæр азы дæргъы æрвылаз дæр РХИ-йы Культурæйы министрады хъæппæрисæй рæстæгæй рæстæгмæ баххæст æрцæуы нæ республикæйы библиотекæты чингуыты фонд.

Ацы бонты та Æвзæнгты республикон библиотекæйы чингуыты фонд бæрæг фæхъæздыгдæр алыгъуызон цымыдисон чингуытæй. Библиотекæйы тæрхджытыл фæзындысты ахæм чингуытæ, куыд, зæгъæм: «Исторический атлас Алании» (автор Бзарты Руслан), «Нарт Батрадз», «Осетинские обычаи», «Осетинские пословицы и поговорки» (Айларты И.), «Осетинское народное творчество», «Писатели Осетии», «Разговор с Отечеством», «Сказания отчего края», «Словарь зоологических терминов», «Солдаты победы», «Яблоко Нартов», «Отречение», «Вечный странник», «Сказки», «Золотая нить», «Высокая поэзия высокой души» (Джыгкайты Ш.), «На одном дыхании», «Сабельный звон», «Избранные произведения» (Джыгкайты Ш.), «Песнь сквозь слезы», «Нигер» (Хъазиты Мелитон), «Искорки поэзии», «Корень», «Моя любовь – искусство», «Милосердие», «Археология Южной части Осетии», «Народное творчество осетин», «Врата небесные», «Осетинская Нартиада» «Сонеты» æмæ бирæ æндæр чингуытæ.

«Стыр бузныг стæм  Культурæйы министрадæй, ног чингуытæй нын нæ библиотекæ кæй баххæст кæнынц, уый тыххæй. Афтæ ма сын бузныджы ныхæстæ дзурæм,  принтер æмæ нын компьютерон стъол кæй балхæдтой, уый тыххæй дæр. Иумиагæй сæ лæмбынæг хъусдардæй», – банысан кодта Æвзæнгты республикон библиотекæйы директор Тототы Ленæ.

Æвзæнгты библиотекæйы кусджытæ арæх сорганизаци кæнынц алыгъуызон культурон мадзæлттæ, поэзийы изæртæ, конкурстæ, мысæн изæртæ æмæ афтæмæй сæхимæ кæнынц чиныгкæсджыты. Тототы Ленæ ма куыд загъта, уымæ гæсгæ æвзæнгты библиотекæмæ фылдæр цæуынц хистæр кълæсты ахуыргæнинæгтæ, фæлæ сын æхсызгон у уыцы факт дæр æмæ сæм арæх чиныгагур кæй æрбацæуынц хистæр кары адæм дæр. «Нæ библиотекæйы фонд кæй фæхъæздыгдæр, уый хуыздæрырдæм бандавдзæн чиныгкæсджыты нымæцыл.  Ныфс нæ ис, нæ чиныгкæсджыты нымæц ноджыдæр кæй фæфылдæр уыдзæн, уымæй. Табуафси, æрбацæут нæм», – загъта уый.

Культурæйы министрад ма февралы мæйы ног чингуытæ радта горæт Цхинвалы Абайты Васойы хæдзар-музейæн, уыцы нымæцы «Нарты кадджытæ»-йы æмбырдгонд, кæцы мыхуыры рацыд Дзæуджыхъæуы.

Банысан кæнын хъæуы  уый дæр, æмæ фæстаг рæстæджы бæрæг æнтыстытæ кæй ис куыд æндæр фадгуыты, афтæ культурæйы къабазы дæр. Дæргъвæтин азты дæргъы хæстон уавæрты цæргæйæ ма чи ахъуыды кодтаид æмæ ма не ‘взонг республикæ чингуытæ уадзынхъом фæуыдзæн. Фæлæ, табу Хуыцауæн, нæ цард размæ цæуы æмæ нæ ныфс ис, не ‘взонг паддзахадæн ноджы стырдæр æнтыстытæ кæй уыдзæн, уымæй.

ДЖИОТЫ Екатеринæ