Бахъахъхъæн дæхи æрдзон газæй

Ӕрдзон газӕй пайда кӕныны нормӕтӕ ӕххӕст кӕй нӕ цӕуынц, уый фӕстиуӕгӕн ӕрвылаз дӕр горӕт Цхинвалы ӕрцӕуы дзӕвгар аваритӕ. Не ‘мбӕстӕгтӕй бирӕтӕ уӕлӕнгай цӕстӕй кӕсынц се ‘дасдзинадмӕ ӕмӕ газы ифтонггӕрзтӕм сӕ хъус нӕ фӕдарынц, сӕвӕрын сӕ кӕнынц ӕнӕквалификациджын специалисттӕн. Ахӕм архӕйдтыты фӕстиуӕгӕн ӕрцӕуы ӕнамонд цаутӕ дӕр.

Газдихгӕнӕн пункты службӕйы сӕргълӕууӕг Хъӕцмӕзты Витали куыд фехъусын кодта, афтӕмӕй «Горгаз»-ы кусджытӕ ӕрвылбон дӕр ӕххуысмӕ, иууылкъаддӕр, ацӕуынц дӕс хатты, фӕлӕ зымӕджы ахӕм фӕсидтыты нымӕц бӕрӕг фӕфылдӕр вӕййы. Уымӕн ӕмӕ цӕрджытӕ райдайынц пайда кӕнын хъармгӕнӕнтӕй ӕмӕ фехалынц газӕй пайда кӕныны технологитӕ. Цалдӕр азы размӕ уавӕр уыд бирӕ ӕвзӕрдӕр, фӕлӕ ныр газы хӕтӕлтӕн сӕ 70 проценты бӕрц ӕрцыдысты ногӕй ивд ӕмӕ аваритӕ афтӕ арӕх нал цӕуы. Цы цаутӕ дзы ӕрцӕуы, уыдоны фылдӕр хайы аххосаг у, газ куы ахъуызы, уый. Фӕлӕ иууыл тӕссагдӕр у сыгъдхъӕстӕ газ. Сыгъдхъӕстӕ газӕй фӕхъӕстӕйы фӕстиуӕгӕн ӕрцыдис уды зиӕнттӕ дӕр.

«Калонкӕтӕ ӕмӕ хъармгӕнӕн прибортӕн хинайӕн хатӕны сӕвӕрыны бар нӕй, фӕлӕ бирӕтӕн абон дӕр нырма уым ӕвӕрд сты. Уымӕй уӕлдай ма вентиляцион каналтӕ ӕнӕсыгъдӕгӕй ныууадзынц, фӕздӕгцӕуӕн гофрӕ-трубӕтӕ вӕййынц лӕмӕгъ конд кӕнӕ скъуыд, ӕмӕ уый фӕстиуӕгӕн ӕрцӕуынц фыдбылызтӕ. Цал ӕмӕ цал хатты уыдис сыгъдхъӕстӕ газӕй фӕхъӕстӕ уӕвыны цаутӕ. Фӕлӕ уӕддӕр кӕмӕдӕрты нӕ хъары ӕмӕ йӕ не ‘мбарынц, се ‘дасдзинад сӕхи къухты кӕй ис. Горгазы кусджытӕ куы фӕсидынц цӕрджытӕм, цӕмӕй ӕххӕст кӕной ӕрдзон газӕй пайда кӕныны нормӕтӕ, уӕд сӕхицӕн ницы фӕдомынц», – банысан кодта Хъӕцмӕзты Витали.

Газы ифтонггӕрзтӕ, уагӕвӕрдмӕ, гӕсгӕ ӕвӕрд куы нӕ вӕййынц, уӕд «Горгаз»-ы кусджытӕ хӕдзары хицауӕй райсынц барфыст, куыд цыбыр ӕмгъуыдмӕ аиуварс кӕндзӕнис цухдзинӕдтӕ. Уый фӕстӕ, кӕд ӕмӕ нӕ сараза йӕ газы системӕ уагыл, уӕд ын сӕхгӕнынц йӕ газы хӕтӕл ӕмӕ йыл пломбӕ сӕвӕрынц. Уымӕ ӕнӕкӕсгӕйӕ, бирӕтӕ пломбӕ фехалынц ӕмӕ та дарддӕр фӕпайда кӕнынц ӕрдзон газӕй. Афтæмæй, ӕнамонд цау куы  ӕрцӕуа,  уӕд  «Горгаз»-ы кусӕг цы аххосджын у?

Фӕлӕ йӕ практикӕ куыд ӕвдисы, афтӕмӕй исты фыдбылыз куы ӕрцӕуы, уӕд газы кусджытӕ уынгӕджы фӕвӕййынц, – тӕрхондæтты фӕрахау-бахау кӕнынц, бафхӕрынц сӕ, зӕгъгӕ, цӕмӕн бауагътат ӕнамонд цау ӕрцӕуын. «Горгаз»-ӕн уыцы фӕрӕзтӕ нӕй, цӕмӕй сӕхи тыхтӕй уыцы цухдзинӕдтӕ рараст кӕной.  Адӕймаг йӕ     ӕдасдзинад бахъахъхъӕныныл йӕхӕдӕг хъуамæ тыхса.

2019 азы нӕ горӕты сыгъдхъӕстӕ газӕй фӕхъӕстӕ кӕныны цаутӕ ӕрцыдис 10 хатты. Рынчындонмӕ бахаудтой 16 адӕймагӕй фылдӕр, уыдоны ӕхсӕн цалдӕр ӕнахъом сывӕллоны дӕр.

«Горгаз»-ы кусджытӕ кæддӕриддӕр цӕттӕ вӕййынц ӕххуысмӕ бацӕуынмӕ. Ӕдӕппӕт сты 15 кусӕджы ӕмӕ дзы улӕфт бонты дӕр вæййы радгӕс, кӕцы йӕхимӕ фӕнысан кӕны ӕрцӕугӕ цау ӕмӕ арвиты бынатмӕ ӕмбӕлон кусджыты къорд. Ацы службӕмӕ фӕдзурӕн ис мӕнӕ ахӕм номыртӕм 8 929 811 30 04.

Бирӕ зындзинӕдтимӕ ӕмбӕлынц ацы службӕйы кусджытӕ. Хъӕцмӕзты Витали куыд зӕгъы, афтӕмӕй йӕ кусджыты куыстмызд у хӕрзцъус, кусинӕгтӕ та сты бирӕ, ӕмӕ уымӕ гӕсгӕ тыхсынц. Кӕд нырма кусджытӕ фаг кӕны, уӕддӕр ахӕм чысыл мыздыл кусын никӕй фӕнды ӕмӕ сӕ исчи куы ацӕуа, уӕд чи ӕрбакомдзӕн йӕ бынатмӕ кусынмӕ. Сӕ бӕстыхай дӕр ис ӕдзӕллаг уавӕры, – иууылдӕр у цалцӕг кӕнинаг ӕмӕ дзы нӕй хуымӕтӕджы уавӕртӕ дӕр кусынӕн. Хъуаг ӕййафынц ӕнӕмӕнгхъӕуӕг дзаумӕттӕй дӕр. Цы специалон автотранспорт сӕм ис, уыдон дӕр сты зӕронд ӕмӕ цалцӕгкӕнинаг. Исты цау куы ӕрцӕуы, уӕд Хъӕцмӕзты Витали йӕхи сӕрмагонд машинӕйыл ацӕуы аварийы бынатмӕ, ӕмӕ дзы ӕртаг кӕнын уӕддӕр нӕ хъӕуы? «Горгаз»-ы кусджытӕн сӕ куысты уавӕртӕ куы фӕхуыздӕр кӕниккой, уӕд сын адӕмӕн лӕггад кӕнын ӕнцондӕр уаид. Ацы службӕйы куыст кӕд ӕддӕмӕ тынг нӕ зыны, уӕддӕр  адӕмы ӕрвылбонон царды, се ‘дасдзинады, ахсы егъау бынат.

Джиоты Александр