Советон Цæдисы ныппырхимæ Хуссар Ирыстоны адæмы бахъуыд сæхи бахъахъхъæныны сæр, уымæн æмæ нæ гуырдзиаг фашисттæ Гамсахурдияйы сæргълæудæй хъавыдысты скуынæг кæнынмæ. Расидтыстæм хæдбар паддзахад æмæ йæ бахъахъхъæдтам, кæд нæ туджы зæйты бын фæкодтой не знæгтæ, уæддæр.
Уыцы уæззау заманты арæзт æрцыдысты Хуссар Ирыстоны гарзджын тыхтæ дæр, кæцыты рæнхъыты æрлæууыдысты Ирыстоны хуыздæр хъæбултæ æмæ знæгтæн радтой аккаг ныхкъуырд. Не ‘мбæстæгтæй бирæтæ баслужбæ кодтой нæ республикæйы гарзджын æмæ тыхон структурæты рæнхъыты, фæлæ нымад паддзахад кæй нæ уыдыстæм, уый фæстиуæгæн не ‘фсæддон билеттæн тых нæ уыд. Фæстæдæр уыцы документ дæр нал лæвæрдтой, уымæн æмæ нæ республикæйæ дарддæр æндæр бæстæты уыцы ‘фсæд-дон билет ницы пайда уыд. Иттæг цæттæ æфсæддоныл нымад дæ, ис дын æнтыстытæ, баслужбæ кодтай бирæ азты дæргъы, фæлæ дын нымады нæ цæуынц. Ацы проблемæ аскъуыддзаг кæнын йæ хæсыл нымадта нæ бæстæйы сæргълæуджытæй алкæцы дæр, фæлæ суанг 2016 азмæ нæ бантыст ацы хъуыддаг æрнывыл кæнын.
2016 азы кæрон Хуссар Ирыстоны Хъахъхъæнынады министрад райдыдта цæттæ кæнын æфсæддон билеттæ, кæцытæ нымад уыдзысты Уæрæсейы Федерацийы территорийыл. Ацы хъуыддаг та къухты бафтыд РХИ æмæ УФ-йы ‘хсæн æмцæдисад æмæ интеграцийы тыххæй бадзырдмæ ма уæлæмхасæн бадзырд бафыссыны руаджы. Ацы бадзырд бацæттæ кодтой РХИ æмæ УФ-йы Хъахъхъæнынады министрадтæ. Йæ руаджы ма Хуссар Ирыстоны æмбæстæгтæн дæр уæдæй фæстæмæ фадат ис Уæрæсейы Федерацийы æфсæддонты рæнхъыты службæ кæнынæн.
Ног æфсæддон билеты дизайн сарæзтой Хъахъхъæнынады министры бардзырдмæ гæсгæ. Йе ‘ддаг цъарыл ис Хуссар Ирыстоны паддзахадон символикæ, сты дыууæ æвзагыл фыст – иронау æмæ уырыссагау. Ацы æфсæддон билеттæ фыццаг рады дæттынц, ныридæгæн чи службæ кæны, уыдонæн. Фæлæ раджы чи службæ кодта æмæ кæмæ æмбæлы, уыдон дæр сæ исынц. Нырма сæ дæттынц, рæнхъон службæгæнджытæй прапорщикы онг цы æфсæддон нæмттæ лæвæрд æрцыд, уыдонæн. Нæ республикæйы æфсæддон комиссар Бибылты Роберты ныхæстæм гæсгæ тагъд рæстæджы райдайдзысты дæттын афицеры нæмттимæ æфсæддон билеттæ дæр.
«2016 азы кæрон райдыдтам дæттын æфсæддон билеттæ æмæ абоны онг сæ нымæц схызт 1800-мæ. Æмбæлгæ бирæтæм кæны æфсæддон билет, фæлæ, æвæццæгæн, алкæмæн рæстæг нæй йæ райсынæн кæнæ та йæ нæ фехъуыста. Стæй ма бирæтæн сæ сæрмагонд хъуыддæгты документаци æххæст æмбырд нæу æмæ сын куы фæзæгъæм, цæмæй æнæмæнхъæуæг гæххæттытæ æрбахæссой, уæд фæзивæг кæнынц æмæ дзы бирæтæ цæугæ дæр нал æрбакæнынц. Ныридæгæн закъазгонд сты афицеры нæмттимæ æфсæддон билеттæ дæр æмæ сæ тагъд рæстæджы райдайдзыстæм дæттын», – банысан кодта Бибылты Роберт.
Æфсæддон билет ныры дуджы æнæмæнгхъæуæг у, – æнæ уымæй куыст дæр зынтæй ссардзынæ. Ӕфсæддон билет бирæ хъуыддæгты баивы паспорты дæр æмæ фæпайда уыдзæнис æндæр хъуыддæгты дæр. Йæ райсынæн та бирæ ницы хъæуы – 3 нывы, паспорты халдих, диплом кæнæ аттестаты халдих æмæ ма дын кæд машинæ скъæрынæн бары гæххæтт ис, уæд уый халдих дæр. Йæ райсыны процедурæ дæр бирæ рæстæг нæ ахæссы.
ДЖИОТЫ Александр
Comments are closed, but trackbacks and pingbacks are open.