Æрвылаз дæр 22-ноябры Уæрæсейы Федерацийы банысан кæнынц Психологы бон – психологийы фадыджы кусæг фыдыбæстæйон специалистты профессионалон бæрæгбон. Ацы бон Уæрæсейы кæд официалонæй фидар нæма æрцыд, уæддæр ацы специалистты куыст у тынг ахсджиаг стресстæй йемыдзаг нырыккон царды, уымæн æмæ адæймаджы психикон æнæниздзинад физикон æнæниздзинадæй къаддæр ахсджиаг нæу. Æнæниздзинады дунеон организацийы бæрæггæнæнтæм гæсгæ, психикон æнæниздзинад дзурæг у царды фæрныгады уавæртыл, цыран адæймагæн йæ бон у йæхи сæрмагонд потенциал среализаци кæнынæн, йæ бон у хуымæтæджы цардуагон стресстимæ тох кæнын, афтæ ма æхсæнады цардмæ йæ хайбавæрд хæссын дæр. Æрвылаз дæр 10-æм октябры фæнысан кæнынц психикон æнæниздзинады дунеон бон.

2007 азы психикон æнæниздзинады дунеон боны фæлгæтты фыццаг хатт уагъд æрцыд Психологы бон. Куыд загътам, уымæ гæсгæ кæд нырма Уæрæсейы Психологы бон паддзахадон æмвæзадыл фидар нæма æрцыд, уæддæр ацы бон банысан кæнынц организацитæ æмæ университеттæ. 22-æм ноябры баконд æрцыдысты психологийы факультеттæ. 1994 азы 22-æм ноябры Мæскуыйы уыд уæрæсейаг психологион æхсæнады бындурæвæрæн съезд, æмæ 2000 азы 22-æм ноябрæй та Мæскуыйы нысан кæнынц Психологы бон. Мадзалы сæйраг инициатор у Мæскуыйы университет. Бæрæгбонон мадзалы сæйраг нысан у, цæмæй радон хатт адæмы зæрдыл æрлæууын кæной психологы профессийы ахсджиагдзинады тыххæй. Психологы боны уагъд æрцæуынц лекцитæ, æмбырдтæ æмæ семинартæ.

Тыбылты Алыксандры номыл Хуссар Ирыстоны паддзахадон университеты психолгийы факультет баконд æрцыд 2012 азы æмæ уæдæй фæстæмæ азæй азмæ ацы професси фæсивæдмæ æвзæрын кæны стырдæр цымыдисдзинад, уымæн æмæ психолгои у вазыгджын æмæ бæрнон дисциплинæ. Адæймагмæ байхъусын æмæ йæ бамбарын алкæцы адæймаджы бон нæу æмæ психологы хæс та у тыхст адæймагæн баххуыс кæнын. Æрвылаз дæр Хуссар Ирыстоны паддзахадон университеты Психологы боны ацы факультет ауадзы алыгъуызон мадзæлттæ. Афтæ та уыд ацы аз дæр, 22-æм ноябры университеты конференц-залы психологийы кафедрæйы æмæ ацы факультеты студенттæ ауагътой мадзал Психологы боны цытæн. Мадзалмæ хуынд æрцыдысты университеты иннæ факультеты ахуыргæнджытæ æмæ студенттæ, скъолаты ахуыргæнджытæ æмæ ахуыргæ-нинæгтæ. Фидæны психологтæ æмæ абон ныридæгæн ацы дæсныйадыл чи кусы, уыцы специалисттæн раарфæ кодтой нæ горæты 6-æм астæуккаг скъолайы ахуыргæнинæгтæ. Университеты ректор Тедеты Вадим дæр раарфæ кодта æмæ хъарм ныхæстæ загъта ацы факультеты ахуыргæнджытæ æмæ студенттæн сæ профессионалон бæрæгбоны цытæн. Бафæндыд æй уыдонæн фыццаджыдæр æнæниздзинад æмæ фидæны сæ дæсныйады стыр æнтыстытæ сæ къухты цы бафта, уый.

Уый фæстæ психологийы факультеты деканы хæдивæг Гæззаты Мадинæ активондæр студентты схорзæхджын кодта Кады грамотæтæй. Психологийы фа-культеты  архайы  организаци «Хорз хъуыддæгты службæ», зæгъгæ. Ацы организацийы уæнгтæ æрвылаз дæр сорганизаци кæнынц алыгъуызон мадзæлттæ, кафедрæйы ахуыргæнджытæ æмæ студенттæ цы æхцайы фæрæзтæ æрæмбырд кæнынц, уыдоны хардзæй. Ныр дæр та уыдон нæ горæты Сывæллæтты сфæлдыстады галуаны хъомылгæнинæгтимæ иумæ куклæты театр равдыстой Цхинвалы скъола-интернаты ахуыргæнинæгтæн. Скъоладзаутæй бирæтæ куклæты театр федтой фыццаг хатт. Психологийы факультеты 4-æм курсы студенттæ бузныджы ныхæстæ загътой, скъола-интернаты ахуыргæнинæгтæн ахæм хорз мадзал бацæттæ кæнынæн сын чи баххуыс кодта, уыдонæн.

Психологи æмæ æрдзон зонынæдты факультеты декан Джиоты Циалайы ныхæстæм гæсгæ, уыдон дарддæр дæр фæнд кæнынц ахæм акцитæ уадзын. Джиоты чызг банысан кодта нырыккон дунейы тæссагдзинæдтæ æмæ стрессты рæстæджы психологийы факультеты ахсджиагдзинады тыххæй.

Нæ уацх.

Comments are closed, but trackbacks and pingbacks are open.