Горæт Цхинвалы администрацийы сæргълæууæг Коцты Алан уыд нæ горæты 3-æм астуæккаг скъолайы цытджын линейкæйы, цыран уый раарфæ кодта ахуыргæнджытæ, скъоладзаутæ æмæ ныййарджытæн Зонындзинæдты боны цытæн.
Уый банысан кодта, зæгъгæ, абон у иууыл зæрдæмæхъаргæ æмæ цымыдисондæр бон фыццагкъласонтæн, уымæн æмæ уыдон зонгæ кæнынц сæ фыццаг ахуыргæнджытимæ æмæ æмкъласонтимæ.
«1 сентябрь у нысаниуæгджын бон. Ацы бонæй райдайы фæндаг фидæнмæ. Зонындзинæдты бон у ирд бæрæгбон ахуыргæнинæгты, ахуыргæнджыты æмæ ныййарджыты егъау æмæ хæлар бинонтæн. Ахуыргæнджытæн мæ зæрдæ зæгъы куырыхондзинад æмæ быхсындзинад, æмæ зынаргъ фыццагкъласонтæн та мæ зæрдæ зæгъы, цæмæй скъолайы 11 азы суой уыдонæн æнæферохкæнгæ рæстæг. Æз мæхæдæг дæр ахуыр кодтон ацы скъолайы, фæнды мæ зæгъын, сывæллæттæ кæй уыдысты хорз ахуыргæнджыты, адæймæгты къухты, кæцытæ иузæрдион сты сæ профессийыл. Уыдонæн сæ бон суыдзæн сымахæн зонындзинæдтæ радтын, цардмæ уæ бацæттæ кæнын», – банысан кодта Коцты Алан.
Цытджын линейкæйы фæстæ Цхинвалы администрацийы сæргълæууæг азылд кълæстыл. Горæты администрацийы тыхтæй сцалцæг кодтой цалдæр къласы, ивд æрцыдысты рудзгуытæ дæр. Коцты Алан сын ныфс бавæрдта скъолайы кæрты спортивон фæзуат саразынæй, цæмæй фидæн аз цытджын линейкæ уагъд æрцæуа уым.
Ахуыргæнинæгты, ахуыргæнджыты, ныййарджыты æмæ цытджын линейкæмæ чи æрбацыд, уыдоны раз æф-сæрмдзæстыгæй ралæууыдысты фыццагкъласонтæ.
«Æз ацы скъолайы куы ахуыр кодтон, уæд нæ мадзæлттæ, уыцы нымæцы бæрæгбонон линейкæ дæр уагъд цыдысты скъолайы кæрты. Зонын æй, абон нын ахæм фадат нæй, фæлæ фидæн аз традицимæ гæсгæ скъолайы линейкæ уагъд æрцæудзæн уым», – банысан кодта Коцты Алан.
Ацы аз 3 -аг скъола райста 16 фыццагкъласоны. Æдæппæтæй та скъолайы ахуыр кæндзæн 130 ахуыргæнинаджы.
Comments are closed, but trackbacks and pingbacks are open.