Куыд зонæм, афтæмæй дзидзакуыстгæнæг комбинат «Растдон» йæ продукци систематикон æгъдауæй  уадзын райдыдта 2017 азы июлы мæйы «Нартские», зæгъгæ, ахæм маркæйы бын. Нырмæ дæр «Растдон»-ы продукци балхæнæн уыдис нæ горæты иуæй-иу магазинты, уымæ гæсгæ нæ горæты цæрджытæ хорз зонгæ сты комбинаты уагъд продукцийы хуызтимæ æмæ гъæдимæ.  Банысан кæнын хъæуы уый æмæ «Растдон»-ы продукци фæндаг кæй ссардта канд нæ горæты магазинтæм нæ, фæлæ Уæрæсейы Федерацийы базармæ дæр.

Дзидзакуыстгæнæн комбинаты радон æнтыстыл банымайæн ис уый дæр, æмæ 29 январы официалон æгъдауæй кæй æрбакодта йæхи сæрмагонд магазин, ахæм номимæ – «Нæртон», зæгъгæ.

Магазины байгом кæныны церемонимæ æрбацыд Хицауады Сæрдар Пухаты Эрик æмæ райгондæй банысан кодта дзидзакуыстгæнæн заводы куыст æмæ йæхи сæрмагонд магазины æрбаконды ахсджиагдзинад дæр. Ам ныр балхæнæн уыдзæнис 20 хуызы хæрзад, тахынæг. Цæрджытæн ныр сæ бон уыдзæнис къухæй-къухмæ нæ, фæлæ йæ бынаты, йæхи аргъæй балхæнынæн.

Уый фæстæ Хицауады Сæрдар алыг кодта сырх лентæ æмæ бахызтысты магазинмæ. Ам продукцийы алыхуызæй дæр уыд райсæн, ацаходæн   æмæ йын саргъ кæнын йæ адмæ гæсгæ. Банысан кæнын хъæуы æмæ тахынæгтæ кæй сты æнæуæлдай хъацæнтæй, нæй сыл, адæймаджы организмæн зиан чи хæссы, ахæм ахорæнтæ. Магазины ма уæй цæуынц æргæвст гогызтæ, уымæй уæлдай ма дзы балхæнæн ис стуры фыд дæр.

Хицауады Сæрдар ма йæ раныхасы банысан кодта, кæй бацархайдзысты ууыл дæр, цæмæй «Цæгаттаг» микрорайонмæ цы автотранспорт цæуы,  уый цæуа дзидзакуыстгæнæн заводы онг, уæд транспорты проблемæ нæ уыдзæнис ацы магазинмæ цæуæг фæлхасгæнджытæн æмæ комбинаты кусджытæн дæр.

Зæгъын хъæуы уый æмæ ацы магазины æрбакондæй куысты бынæттæй ноджыдæр ифтонг кæй æрцыдысты 3 адæймаджы. Ныр комбинаты кусы æдæппæт 40 адæймаджы.

Комбинаты генералон директор Морготы Константин куыд банысан кодта, афтæмæй сæм сæ фыццаг продукцийы рауагъдæй фæстæмæ цыдысты адæм æмæ фарстой, кæм балхæнæн ис сæ продукцийæн, уымæй. Уымæ гæсгæ бакуыстой магазин саразыны тыххæй проектыл æмæ йæ аразгæ дæр скодтой сæхи тыхтæй. Магазины уæй цæудзысты куыд «Растдон»-ы, афтæ «Евродон»-ы продукци дæр, ахæм маркæйы бын – «Нартские», «Индолина» æмæ «Утолина».

Уæдæ  ныр, магазины æрбакондæй, фæлхасгæнджытæн фадат уыдзæнис «Растдон»-ы рауадзгæ продукци балхæнынæн æнæ уæлдай аргъæй.

Бестауты Валя

Comments are closed, but trackbacks and pingbacks are open.