Æрвылаз дæр 27-æм майы куыд Уæрæсейы, афтæ нæ республикæйы дæр цытджын æгъдауæй банысан кæнынц библиотекæты æппæтуæрæсейон бон. Ацы нысаниуæгджын бон у æппæт библиотекарты профессионалон бæрæгбон дæр.

Нæ горæты Сывæллæтты республикон библиотекæйы уагъд æрцыд бæрæгбонон мадзал библиотекæты кусæджы боны сæраппонд. Мадзалмæ æрбацыдысты Зонад æмæ культурæйы уæрæсейаг центр «Россотрудничество»-йы сæргълæууæг Сергей Скворцов, ацы центры кусæг Алла Мандражи, РХИ-йы Культурæйы министры хæдивæг Дзеранты Джульеттæ, культурæйы министрады библиотекæты куысты фæдыл сæйраг специалист Дриаты Нателæ, 2-æм астæуккаг скъолайы æмæ «Альбион»-ы  ахуыргæнинæгтæ сæ ахуыргæнджытимæ.

Библиотекæйы директор Джиоты Аллæ æрæмбырд-уæвджытæн раарфæ кодта библиотекæты боны сæраппонд æмæ банысан кодта, сæ сæйраг хæс кæй уынынц æрыгон чиныгкæсджытæн чиныг уарзын кæныны.

Библиотекæйы методикон кабинеты сæргълæууæг Мæргъиты Маринæ дæр арфæ ракодта æрæм-бырдуæвджытæн æмæ банысан кодта адæймаджы царды библиотекæты нысаниуæджы тыххæй. Библиотекæты, зæгъгæ, банымфайæн ис адæймагады æууæнкджын мысынадыл. «Библиотекæты сты æппæт уыцы зонындзинæдтæ, кæцытæ æрæмбырд кодтой алы адæмты фæлтæртæ даргъ историон фæндагыл», – загъта уый. 

Уый загъта, зæгъгæ, чизоны исчитæ ахъуыды кæной, ома, нæ абон, Интернеты дуджы чингуытæ цæмæн хъæуынц, фæлæ уый раст нæу.  Ахъуыды ма кæнут, Пушкины «Евгений Онегин»-ы Интернеты бæсты чиныджы кæсгæйæ цымыдисондæр нæу. Сывæллæттæн ауагъта викторинæ.  Лæвæрдта сæм чиныгимæ баст фарстытæ æмæ сын уыдон дæр дзуапп кодтой æзфæраздæронæй. Ахуырдзаутæ бакастысты æмдзæвгæтæ, равдыстой инсценировкæтæ чингуыты тыххæй. Мæргъиты Маринæ æрдзырдта библиотекарты куысты тыххæй дæр, загъта, зæгъгæ, уый у рагон професси. Библиотекары куыст, зæгъ, у тынг цымыдисон æмæ алыгъуызон. Ацы куыст, зæгъ, æрмæст чиныг радтын нæу, фæлæ, зæгъ, у сфæлдыстадон професси. Уымæн æмæ библиотекæты уагъд фæцæуынц алыгъуызон мадзæлттæ, интеллектуалон хъæзтытæ, литературон афæлгæстытæ, поэзийы æмæ сфæлдыстадон изæртæ. Библиотекары сывæллон хъуамæ уына, чи йæ æмбары, ахæм æмныхасгæнæджы, кæцы йын бауынаффæ кæндзæн чиныг равзарыны тыххæй.

«Æрвылаз дæр нæ библиотекæйы уагъд æрцæуы акци «азы чиныгкæсæг». Нæ бæрæггæнæнтæм гæсгæ, «азы чиныгкæсæджы» ном райста 2-æм астæуккаг скъолайы 4-æм къласы ахуырдзау Костя Старцев. Костя нæ библиотекæйы чиныгкæсæг  у  скъолайы  агъоммæйы карæй фæстæмæ. Кæй зæгъын æй хъæуы, Костя Старцев, нæ иунæг чиныгкæсæг нæу. Æрвылаз дæр нæ уагдонмæ æрбацæуынц 2 мин чиныгкæсæджы онг. Нæ библиотекæйы ис ахæм клубтæ, куыд, зæгъæм, «Почемучка», «Глобус». 2016 азæй фæстæмæ нæм архайы проект «Я самый умный – я много читаю», – загъта мадзаламонæг.

 «Россотрудничество»-йы сæргълæууæг Сергей Скворцов дæр раарфæ кодта æмæ ныфс бавæрдта,  чингуыты фонд баххæст кæнынæн сын кæй æххуыс кæндзæн, уымæй. Ныр дæр афтид къухæй не ‘рбацыд – балæвар сын кодта чингуытæ», – загъта уый.

 Библиотекæйæн ма чингуытæ балæвар кодтой культурæйы министрады минæвæрттæ. Уагдоны директор Джиоты Аллæ сын загъта бузныджы ныхæстæ   сæ хъусдарды тыххæй. Банысан кодта, зæгъгæ, сæрдыгон улæфтыты рæстæджы сæ чиныгкæсджыты нымæц бæрæг  фæфылдæр вæййы.

Мадзалы ма бæрæгбоны сæраппонд арфæйы ныхæстæ загътой Дзеранты Джульеттæ æмæ Дриаты Нателæ.

Уый фæстæ æвзонг чиныгкæсджыты къорд хорзæхджын æрцыдысты  РХИ-йы Культурæйы министрады Кады грамотæтæй.

Джиоты Екатеринæ

Comments are closed, but trackbacks and pingbacks are open.