Бæрæгбонон мадзæлттæм цæттæ кæнынц сæхи хайадисджытæ æмæ æхсæнадон фæтк хъахъхъæнджытæ. Къуырисæры 18 сентябры Театралон фæзуаты æфсæддон парадæн уагъд æрцыд Генералон репетици. Райсомæй 8 сахатыл фæндагон змæлды æдасдзинады инспектортæ æрæхгæдтой горæты уынгты иу хай, кæцытыл хъуамæ рацыдаиккой парадон къордтæ æмæ æфсæддон техникæ.
19 сентябры дæр райсомы 8 сахатæй фæстæмæ Театралон фæзуат æхгæд æрцыд Хуссар Ирыстоны Паддзахадон тырыса сисыны цытджын церемонийы тыххæй.
20 сентябры райсомæй автоинспектортæ æрæхгæндзысты Сталины уынг, Путины уынгæй суанг Харебаты Исахъы уынгмæ. Уымæй уæлдай ма автотранспорты змæлд урæд æрцæудзæн Сталины уынгæй Тæболты æмæ Абайты Уасойы уынгтæм. Дзауы, Хъоцыты фырты æмæ Пушкины уынгтыл дæр ахизæн нæ уыдзæнис Театралон фæзуатмæ ‘ввахс. Ӕфсæддон техникæ райсомæй цæудзысты ахæм маршрутыл — Нарты уынг — Фидауынгæнæджы уынг — Октябры уынг — Чкаловы уынг — Сталины уынг.
Цалынмæ æфсæддон техникæ сæ бынæттæм бахæццæ уой, уæдмæ ацы маршрутыл дæр фæндаг уыдзæнис æхгæд. Уымæ гæсгæ, гæнæнуæвгæйæ, уыцы бонты нæ хъæуы автомашинæйæ пайда кæнын, цæмæй горæты уынгтæ сæрибардæр уой æмæ фæткхалæн цаутæ дæр ма уа. Бар кæм нæй, ахæм рæтты кæй машинæтæ уой урæд, уыдоны хицæуттæ ивар цæудзысты.
Уымæй уæлдай бæрæгбонон мадзæлтты рæстæджы Театралон фæзуатмæ бахизæнты сæвæрдзысты металлодетектортæ, цæмæй тæссаг предметтæ йемæ мачи бахæсса æмæ фыдбылыз ма æрцæуа. Тыхон структурæты саперон къордтæ развæлгъау басгардзысты мадзæлттæ кæм уыдзæн æппæт уыцы объекттæ æмæ фæзуæттæ. Республикæйы фæндæгтыл æмæ горæт Цхинвалы фæфылдæр кæндзысты патрулон экипажтæ. Республикæйы барадхъахъхъæнæг органтæ бæрæгбонон мадзæлтты фæудмæ кусдзысты фæтыхджындæргонд куысты режимы.
ДЖИОТЫ Алыксандр
