Стыр Фыдыбæстæйон хæсты советон адæмы Уæлахизы бон æрвылаз дæр нысан цæуы цытджын æгъдауæй. Æппæт уыцы мадзæлттæ уадзыны рæстæджы æрæмысынц, сæрибар чи æрхаста æмæ уыцы тугкалæн тохты чи фæмардис, уыцы æфсæддонты рухс нæмттæ.

Куыд Уæрæсейы Федерацийы, афтæ Хуссар Ирыстоны дæр майы мæйы райдианы райдайдзысты бæрæгбонон мадзæлттæ, Стыр Уæлахизы боныл 74 азы кæй æххæст кæны, уый цытæн. Бæлвырддæрæй нæ республикæйы цавæр бæрæгбонон мадзæлттæ уагъд цæудзысты, уый фæдыл мах бахатыдыстæм нæ культурæйы министр Зассеты Жаннæмæ, цæмæй нæ цыбыртæй базонгæ кæна.

Уый нын куыд радзырдта, афтæмæй ацы аз, 3-æм майæ 5-æм майы онг, фыццаджыдæр,  Стыр Фыдыбæстæйон хæсты ветеранты хъуамæ хæдзæртты бабæрæг кæной. Уый фæстæ нæ республикæйы Культурæйы министрады инициативæмæ гæсгæ,  нæ республикæйы ацы аз фыццаг хатт 4-æм майы конд æрцæудзæн быдырон пост. Уыцы бон не ‘мбæстæгтæй алкæйы бон дæр у æмæ æрбацæуа ардæм æмæ  ныффысса Уæлахизы боны цытæн, бæрæгбонон арфæтæ, фыстæг кæнæ та открыткæ йæ хионмæ, æмгармæ, сыхагмæ кæнæ та йе ‘ввахс адæймагмæ. «Уымæй дарддæр мах,  1945 азы быдырон постæн цы символикæ уыд, ахæм символикæимæ ныззакъаз кодтам мыхуыр. Æмæ мах фæнды, цæмæй уыцы бон Хуссар Ирыстоны алкæцы хæдзармæ дæр æрбацæуа бæрæгбонон арфæ ахæм символикæимæ. Фыстæджытæ сæ хицæуттыл сæмбæлын кæндзысты нæ республикæйы Æнæмæлгæ полчы штабы волонтертæ. 

Ацы бæрæгбонон мадзæлтты рæстæджы ма нæ республикæйы скъолаты ахуыргæнинæгтæн уагъд æрцæудзысты къласон уроктæ, цыран ахуыргæнинæгты зонгæ кæндзысты Стыр Фыдыбæстæйон хæсты уæззау цаутимæ. Нæ республикæйы уагдæттæн, организацитæн æмæ ахуыргæнæн уаг-дæттæн та бацæттæ кодтам методикон æмбырдгонд, кæцымæ хаст æрцыдысты ирон æмæ уырыссаг æвзæгтыл æмдзæвгæтæ, афтæ ма музыкæ, кæцыйы зæлтæ хъуыстысты хæсты рæстæджы æмæ йæ фæстæ  советон адæмы триумфалон Уæлахизы цытæн. Уæлахизы бæрæгбоны цытæн æвдыст æрцæудзысты тематикон равдыстытæ дæр», – банысан кодта Зассеты Жаннæ.

Уæлахизы бæрæгбоны цытæн ма, Зассеты Жаннæйы ныхæстæм гæсгæ, уагъд æрцæудзысты митингтæ, советон салдатты цыртытыл дидинджытæ æмæ веноктæ сæвæрыны церемонитæ, афтæ ма организаци æрцæудзæн куыд æрвылаз, афтæ ныр дæр  быдырон къæбиц.

«Нæ бæрæгбонон мадзæлтты ‘хсæн иууыл ахсджиагдæр бынат ахсы акци «Георгийы лентæ», кæцы уагъд цæуы ахæм девизимæ «Æз мысын, Æз сæрыстыр дæн!». Раз-дæры советон хъайтар-горæттæй 6-æм майы Хуссар Ирыстонмæ саркофагты ласт æрцæудзæн сыджыт æмæ сыл сæвæрдзысты дидинджытæ æмæ веноктæ. 

Уæлахизы бæрæгбоны цытæн уагъд æрцæудзæн бæрæгбонон концерт. 9-æм майы райсомæй 11:00 сахатыл райдайдзæн æф-сæддон парад, æмæ 18:00 сахатыл æмткæй нæ Республикæйы иу минут æмырæй алæугæйæ, алчидæр хъуамæ ссара, Стыр Фыдыбæстæйон хæсты рæстæджы йæ сæр нывондæн чи æрхаста, æппæт уыцы фæмардуæвæг хъайтарты рухс нæмттæ. Уый фæдыл Зассеты Жаннæ хаты нæ республикæйы æмбæстæгтæм, цæмæй уыдонæй уыцы рæстæджы машинæйыл чи цæуа, уый дæр йæ машинæ баурома, æддæмæ рахиза, æмæ уый дæр  ссара уыцы хæстонты рухс нæмттæ, иу уысм æмырæй алæугæйæ.

ТАНДЕЛАТЫ Виленæ

Comments are closed, but trackbacks and pingbacks are open.