Хуссар Ирыстоны географион равæрд афтæ у æмæ дзы ис куыд быдыртæ, афтæ хæххон бынæттæ дæр. Нæ æрдз у алæмæттаг, алы комæн дæр дзы ис йæхи рæсугъддзинад. Æмбисондæн баззадис Къуыдаргомы бынаты равæрд. Уый йæ рæсугъддзинадæй йæхи бауарзын кодта æрцæуæггаг адæмæн дæр æмæ ныр рагæй дзырд цæуы, цæмæй ацы ран бынат æвзæрст æрцæуа хæххон къахдзоныгътыл бырынæнкурортæн.

Ацы фарст аскъуыддзаг кæныны фæдыл ивгъуыд къуыри горæт Цхинвалмæ РХИ-йы къахдзоныгъты спорты федерацийы фæхуындмæ гæсгæ æрцыдис Цæгат Ирыстон-Аланийы зындгонд геолог Олег Гончаренко. Олег Гончаренко, РХИ-йы къахдзоныгъты спорты федерацийы президент Тедеты Лери æмæ къахдзоныгътыл бырæг Тедеты Тамерлан ацыдысты Дзауы районы Цъоны хъæумæ. Сæ балцы нысан уыдис, цæмæй азылдаиккой æмæ сахуыр кодтаиккой ацы бынаты сомбон аразæн уыдзæнис хæххон курорт, æви нæ. Сæ куысты фæстæ уыдон æрæздæхтысты æмæ информацион агентад «Спутник»-ы пресс-центры радтой чысыл пресс-конференци. «Спутник»-ы уазджытæ сæрмагондæй радзырдтой Хуссар Ирыстоны хæххон къахдзоныгътыл бырæн зона райтынг кæныны перспективæтыл æмæ уыимæ иумæ банысан кодтой махмæ дæр ацы спортæн зындгонд европæйаг курорттимæ абаргæйæ къаддæр ахадындзинад кæй нæ уыдзæнис, уый. Цæгатирыстойнаг геологы ныхæстæм гæсгæ Цъоны фæзуат у иууыл перспективондæр ацы хъуыддаджы. «Æз куыд федтон, уымæ гæсгæ мæ бон у зæгъын Цъоны бынатæй кæй хъæуы хъуыддаг райдайын. Ацы бынат у диссаджы дзæнæттаг бынат, æмæ ифтонг у æппæт инфраструктурон ифтонгадæй. Афтæ ма хорз уаид спортсментæн сæхи цæттæ кæнынæн дæр», – загъта Олег Гончаренко. Уый ма куыд банысан кодта, афтæмæй сæ хъус адардтой æдасдзинады фарстмæ дæр. Ацы хæххон бынаты тас нæу зæйтæ рацæуынæй æмæ уымæй дæр сты райгонд. «Бæрæг куыд у, афтæмæй фылдæр хæххон къахдзоныгътыл бырæн фæндæгтæ тæссаг вæййынц зæйтæ рацæуынæй, фæлæ ам, Хуыцауы фæрцы æдас у ахæм уавæрæй», – банысан кодта геолог.

Цъоны фæзуатыл дзургæйæ, Олег Гончаренко ацы хæххон бынат абарста Францы бæстæйы хæххон къахдзоныгътыл бырæн курорт Шамони-имæ. «Францийы ис район Шамони хæххон къахдзоныгътыл бырæн курортимæ. Æз афтæ нæ зæгъын æмæ территоримæ гæсгæ æмиас сты, фæлæ Цъоны фæзуатимæ сты æмхуызон. Мæ цæстытыл ауадис фæсарæйнаг хæххон лыжæйон курорт. Цъоны дæр фæндаг куы хæххон къуылдымтыл ацæуы, куы та хъæдтыл. Диссаджы бынат у, хуыздæр гæнæн нæй. Уымæй дарддæр ма ацы бынатæй спайдагæнæн ис куыд сæрдыгон улæфæн  афтæ. Ам ис зæххæй абухгæ хæрзад æмæ гъæдджын дæттæ, кæцытæ ныр сты стæм», – банысан кодта геолог.

Уый ма радзырдта, зæгъгæ, Цæгат Ирыстоны геологийы комитеты кусгæйæ ахуыр кодта Хуссар Ирыстоны хомысон базæ, æмæ бæстон зонгæ у республикæйы æрдзимæ.  Уымæ гæсгæ хорз уаид улæфæн бынæттæ дзы саразын.

Республикæйы къахдзоныгъты спорты федерацийы президент Тедеты Лери ацы хъуыддагыл дзургæйæ, сæ кусæгон балц банымадта ахсджиаг къахдзæфыл, уымæн æмæ у сæ куысты райдиан этап. «Фыццаджыдæр мæ бузныджы ныхæстæ зæгъын фæнды нæ уазæг, геолог Олег Гончаренкойæн, кæй нæм æрцыдис ацы хорз хъуыддаджы фæдыл, уый тыххæй. Мах фæндыдис байхъусын специалисты амындтытæм, цæмæй зонæм дарддæр та нæ цы къахдзæфтæ саразын хъæудзæн, уый тыххæй. Нæ зæрды ис нæ бæстæйы къухдариуæгадмæ бахатын ацы фарсты тыххæй, цæмæй Цъоны фæзуаты арæзт æрцæуа хæххон къахдзоныгътыл бырæн курорт. Уымæн æмæ федерацимæ нæй йæхи финансон фæрæзтæ. Республикæйы къухдариуæгад ацы фарсты фæдыл æрбалæууыд нæ фарсмæ æмæ уал нæм æввахс рæстæджыты Санкт-Петербургæй хъуамæ æрцæуой специалисттæ. Уыдон бацæттæ кæндзысты проектæн коммерцион хатдзæг», – загъта Тедейы фырт.

Уый ма куыд банысан кодта, афтæмæй ацы аз сæ зæрды ис, цæмæй инвесторты æххуысæй саразой канатон фæндæгтæ. РХИ-йы къахдзоныгъты спорты федерацийы президенты ныхæстæм гæсгæ ацы хъуыддаг у сомбон курортон амалиуæгад чи райтынг кæндзæн, ахæм къахдзæф.

Нæ уацх.

Comments are closed, but trackbacks and pingbacks are open.