«Бæгъиат»-ы завод минералон дон уадзы 0,5 æмæ 1,5 литруат мигæнæнты. Фæлæ донуадзæн хахх æрмæст иу кæй у, уымæ гæсгæ йæ иу гуырахст мигæнæнæй иннæмæ ракæныны рæстæджы æрлæууын кæнынц, æмæ йæ афтæмæй æндæр режиммæ акæнынц.
Заводмæ минералон дон цæуы километр дæрддзæфæй, сæрмагонд резервуартæм, уырдыгæй та комкоммæ заводы донуадзæн хаххмæ. Ам йедзаг цæуынц доны мигæнæнтæ, ныхæст сыл цæуынц этикеткæтæ, стæй сæ сæрмагонд автомат æхсæзгæйттæй батухы целлофаны æмæ афтæмæй араст вæййынц фæлхасгæнæгимæ фембæлынмæ.
Мах ныхас кæнæм «Бæгъиат»-ы куыстуаты директор Санахъоты Аланимæ.
– Паддзахадон-унитарон куыстуат «Бæгъиат» ныртæккæ цавæр хуызты продукци уадзы?
– «Бæгъиат»-ы суаруадзæн завод уадзы, Хуссар Ирыстоны иууыл тынгдæр кæй агурынц афæдзы алы афон дæр, уыцы минералон дон «Бæгъиатæ». Уадзæм «Суадон»-ы дон дæр, куыд 0,5 литруат мигæнæны, афтæ 5 литруат мигæнæны дæр.
Раздæр азты куыстуат уагъта минералон дон «Дзау» дæр. Фæлæ 2017 азæй Дзауы администрацийы уынаффæмæ гæсгæ, уый лæ-вæрд æрцыд иу амалиуæггæнæгæн æмæ ныртæккæ официалонæй æрмæстдæр уыдо-нæн ис ацы суар уадзыны бар.
Кæд нын зындзинæдтæ ис, уæддæр архайæм, цæмæй нæ продукцийы рауагъд фæфылдæр уа. 2017 азы завод цы продукци рауагъта, уый уыд 42 милуан сомы аргъ. Фæлæ 2018 азы уый схызт 45 милуан соммæ. 2018 аз минералон дон «Бæгъиатæ» 0,5 литруат мигæнæны рауагътам 2,5 милуаны. Уый мах нымайæм рекордыл. Нæ продукцийы рауагъд куыд фылдæр кæны, афтæ фылдæр кæнынц, бюджетмæ цы хъалонтæ хæссæм, уыдон нымæц дæр. 2017 азы хъалонтæ бахастам 4,8 милуан сомы. 2018 азы та 5,5 милуан сомы.
– Уæ продукцийы ма Республикæйæ дарддæр искуыдæм ласут?
– 2018 азы «Бæгъиатæ»-йы дон Цæгат Ирыстонмæ æрвыст æрцыд 686 мин сомы аргъ. Уый официалонæй, фæлæ ма уымæй уæлдай хицæн адæймæгтæ, амалиуæггæнджытæ Цæгат Ирыстонмæ ласынц æмæ реализаци кæнынц нæ дон. Æлхæнгæ та йæ кæнынц, заводы территорийыл цы магазин ис, уым.
– Куыст цæуы, цæмæй Уæрæсейы æндæр регионтæм дæр хæццæ кæна «Бæгъиат»-ы дон?
– Ацы аз мах сарæзтам дистрибьютон бадзырд ООО «Меркури»-йы компаниимæ. Компани ныртæккæ архайы Цæгат Ирыстон-Аланийы территорийыл. Уыдон фæрцы «Бæгъиатæ» ласт цæудзæн Евразийаг цæдисы бæстæтæм. Кæд æмæ сæ къухы бафта Роспотребнадзоры регистраци, уæд суадоны дон «Суадон» дæр экспорт цæудзæн «Бæгъиатæ»-йы æмрæнхъ.
– Дæ размæ заводæн цы сæргълæуджытæ уыд, уыдон архайдтой, цæмæй «Бæгъиатæ» экспорт цæуа æфсымæрон республикæтæ – Абхаз, Сири, Донецк æмæ Луганскы республикæтæм.
– Цæмæй махæн нæ бон уа нæ продукци, сымах цы республикæты кой кæнут, уырдæм арвитын, уый тыххæй заводы хъуамæ куса дыууæ хаххы, кæцытæ сахат уадзой 6 мин авджы. Махæн та абон сахаты мидæг нæ бон у æрмæстдæр 2,5-3 мин авджы уадзын.
– Абон нæ магазинты тæрхджытыл фенæн ис минералон дæттæ «Аландон» æмæ «Дзимыр»-æн, афтæ ма суадæттæ «Ossetian» æмæ ма «Едыс» дæр. «Бæгъиатæ»-йæн уыдон конкуренци кæндзысты æви нæ?
– Кæй зæгъын æй хъæуы, фæстаг рæстæджы «Бæгъиатæ»-йæн бирæ конкуренттæ фæзынд, фæлæ мæнмæ афтæ кæсы æмæ арæхстджынæй куы архайæм, уæд нæ дон йæхи дæлæмæ не ‘руадздзæнис. Уымæн æмæ уый у Ирыстоны бренд.
Мах карзæй хъахъхъæнæм, цæмæй хæлд ма цæуой технологитæ æмæ йæ гъæд та уа æмбæлон æмвæзадыл. Доны дебет афæдзы алы афон дæр вæййы фагæй фылдæр, махæн нæ бон у ноджы фылдæр продукци уадзын. Мах нæ хъæуы цистернæты дон ласын. Стæй алкæцы донæн дæр, кæцы цæуы зæххы бынæй, ис йæхи æууæлтæ. Уымæ гæсгæ алчидæр йæхæдæг хъуамæ равзара, кæцы дон æм хуыздæр кæсы.
«Бæгъиат»-ы минералон дон у паддзахадон унитарон куыстуат, уымæ гæсгæ йæ аргъ у иннæ минералон дæттæй къаддæр.
Нæ хъуыдыйы ис, цæмæй республикæйы районты алы ран дæр бакæнæм нæхи магазинтæ, цæмæй фæлхасгæнджытæ уæлдай аргъмæ ма æлхæной дон.
– Ныртæккæ уæ куысты цы зындзинæдтыл æмбæлут?
– Нæ заводы ныртæккæ цы хахх кусы, уый эксплуатацийы ис ныр 6 азы. Рауæрæхгонд ассортимент та домы кондады модернизаци. Фæнды нæ заводы кондадон гуырахст фæфылдæр кæнын – ноджы ма иу хахх бакæнын. Уымæн бахъæудзæн бирæ хæрдзтæ, фæлæ фæахъаз уыдзæн кондадон процесс фæтынгдæр кæнынæн. Уæд нæ бон уыдзæнис, уæлдæр цы æфсымæрон республикæты кой скодтам, уыдонмæ дæр нæ дон æрвитын. Хъæуы нæ ног транспорт самал кæнын дæр. Уый тыххæй мах хъавæм хицауадмæ бахатын. Нæ зæрды ис Национ бангæй æнæпроцентон кредит райсын дæр. Кæд нæ къухы бафта кредит райсын, уæд нæ хъуыддæгтæ ацæудзысты бæрæг хуыздæр.
Уазæгты Марфа
Comments are closed, but trackbacks and pingbacks are open.