Нæ горæты цæрджытæ стыр æхцондзинад исынц, фæстаг азты цы уынгтæ æрцыдысты хæрзарæзт, уыдоны уындæй, уæлдайдæр та — Октябры уынджы рæсугъддзинадæй, фæлæ, хъыгагæн, нæ горæты æмбæстæгтæй разыны ахæмтæ, кæцытæ бынтондæр нæ тыхсынц горæты уынгты сыгъдæгдзинад æмæ рæсугъддзинад бахъахъхъæныныл. Уый нæ, фæлæ ма иуæй-иутæ æрмæстдæр хъуыды кæнынц, сæ аивдзинадæн сын цы зиан ракæной, ууыл.

Нæ горæты цæрджытæн иууыл уарзондæр, рæсугъддæр æмæ рæстæгæрвитæн бынæттæй сæ иу у Октябры уынг кæрæй-кæронмæ. Уый бирæтæн ссис сæхи аирхæфсæн, тезгъогæнæн бынат. О, фæлæ та не ’хсæн разыны ахæм адæймæгтæ, кæцытæн сæ къух æртасы, ам цы фонартæ ис, уыдонæй асæттынмæ æмæ брондоны сæртæ ацъæл кæнынмæ. Ацы уынг нырма æрæджы æрцыд хæрзарæзт, фæлæ, хъыгагæн, уыцы рæстæгмæ саст æрцыдысты, рæсугъддзинад ын чи дæтты, уыцы фонартæй цалдæр, афтæ ма брондоны асыччытæй цалдæрæн сæ сæртæ. Нæ горæты æмбæстæгтæй иуæй-иутæ афтæ уазал ахаст куы дарой горæты рæсугъддзинадмæ, фыдаудæн ыл куы кæной, уæд уынгтæ сæ рæсугъд хуыз фесафдзысты бынтон цыбыр рæстæгмæ, æмæ афтæмæй горæт размæ никуы ацæудзæн. Кæй зæгъын æй хъæуы, ацы уавæрмæ кæсгæйæ, горæты алы кары æмбæстæгтæ равдыстой се ’нæразыдзинад æмæ дзурынц сæ хъуыдытæ:

Дыгъуызты Аннæ, ХИПУ-йы 6-æм курсы студенткæ:

— Ацы уынг капиталон арæзт куы фæцис, уæд мæ цинæн нал уыд кæрон. Афтæ рæсугъд арæзт кæй æрцыд, уый алкæмæн дæр æхсызгон уыд, æгæрыстæмæй мæм ам уæлдæф дæр сыгъдæгдæр кæсы, тæмæнтæ калы, фæлæ куы федтон ацы хабар, уæд мæ зæрдæйæн уыдис тынг зын. Цымæ чи уыдаид ацы дурзæрдæ адæймаг? Хорз уаид, æмæ ахæм æмбæстæгтæй карз дзуапп куы ’рдомдтаиккой.

Цъæхилты Владик, 2-æм скъолайы ахуырдзау:

— Æз ме ’мбæлттимæ хъæлдзæг рæстæг æрвитын ацы уынджы æмæ мæ фæнды, цæмæй нæ горæт кæддæриддæр тæмæнтæ кала. Мæнæн мæ зæрдæмæ иууыл тынгдæр Цхинвалы уынгтæй цæуы ацы уынг, уымæн æмæ у тынг рæсугъд æмæ мæ фæнды, цæмæй алыхатт дæр уа рæсугъд æмæ сыгъдæг, нæ мæ фæнды æмæ йæ исчи фыдуынд кæна.

Дриаты Фатимæ, пенсиисæг, нæ горæты цæрæг:

— Æз ме ’взонджы бонтæ арвыстон ацы уынгыл æмæ мын у мæ чысылæй фæстæмæ уарзон уынг. Октябры уынг уыдис раздæр дæр рæсугъд, гъеныр та у алкæмæй нырыккондæр. Мæ зæрдæмæ дзы алцыдæр цæуы, у тынг рæсугъд. Алы райсом æмæ алы изæр дæр æз мæ хъæбулы хъæбултимæ тезгъо кæнын ацы уынджы. Иу изæр куы федтон рухсытæй саст, уæд мын уыд тынг зын. Чи сын радта уыцы бар, æмæ уынгты рухсытæ æмæ брондæттæ сæттой. Алкæмæн дæр хъуамæ нæ горæт уа адджын æмæ йын хъуамæ йæ рæсугъддзинадыл аудæм алыварсонæй. Ацы горæты рæзынц нæ фидæны кæстæртæ æмæ абон мах хъуамæ батыхсæм рæсугъддзинад бахъахъхъæныныл, цæмæй нæ кæстæртæ æмбарой, цас тыхтæ бахардз ацы уынджы арæзтадыл. Уавæрæй пайда кæнгæйæ, сидын алкæмæ дæр, цæмæй аудæм нæ горæты дарддæры рæзтыл, ма чъизы кæнæм рæсугъд бынæтты, ма сæ кæнæм æдзæллаг уавæрмæ.

Дзукъаты Л.

Comments are closed, but trackbacks and pingbacks are open.