«Цалдæр азы размæ Цхинвалы районы Дменисы хъæуы цæрæг Икъаты Ибрагим Хъæууон хæдзарады министрады дæлбар цы 4 гектар зæхх уыд, уый райста арендæйы. Зæхх афтид бæргæ нæ уыд, уый размæ азты дзы сагъд æрцыд 300 фæткъуыйы тала – «Голден», «Айдаред» æмæ «Семеренка»-йы хуызтæ. Ацы дыргъдон саразыны нысан уыд республикæйы экономикæ сæндидзын кæныныл бандавын æмæ бынæттон цæрджытæн кусæгон бынæттæ радтын. Дыргъдон арендæйы райстой бынæттон лæппутæ. Фæлæ кæрæдзиимæ иумæйаг æвзаг не ссардтой æмæ дыргъдон æдзæллаг уавæрмæ æрхауд. Талатæ кæрдæджы бын фесты, донхæр сæ кæй нæ кодтой, уымæ гæсгæ сæ фылдæр бахус сты. Уыйадыл Хъæууон хæдзарады министрад арендатортимæ цы бадзырд сарæзта, уый фехæлдта. Разынд та ногæй æндæр арендатортæ. Уыдон дæр сарæзтой ног бадзырд министрадимæ, райдианы зæрдиагæй æрæвнæлдтой, сæмбонд кодтой дыргъдоны территори, цæмæй йæм хъæуы фос ма цæуой æмæ талатæн ма зиан кæной. Фæлæ та уыдон дæр цасдæр рæстæджы фæстæ дыргъдонмæ нал зылдысты, талатæ нæ донхæрæг кодтой, хъацæнтæ сæм нæ хастой æмæ бæлæстæ хус кодтой.
Иу ахæмы министрадмæ бахатыд æвзонг куыстуарзон лæппу Икъаты Ибрагим, цæмæй уымæн арендæйы радтой дыргъдон. Ныр та уыимæ сарæзтой бадзырд министрад æмæ сын ацы хатт фæрæстмæ ис. Икъаты Ибрагим нæ республикæйы хъуыстгонд у, куыд аивады кусæг, эстрадон зарæггæнæг. Фæлæ йæ хъæубæстæ та зонынц йæ чысылæй фæстæмæ тæлтæг лæппу æмæ зæххы куыст уарзагæй. Ныр цыппæрæм аз зилы дыргъдонмæ æмæ бæлæстæ сæ хуыз скалдтой. Зæгъы, зæгъгæ, дыргъдон арендæйы куы райста, уæд талатæн сæ фылдæр уыд хус. Цы талатæ бахус сты, уыдоны бынæтты ногтæ ныссагъта. Интернеты тыгъдады фæткъуыбæлæсты тыххæй цы информаци ис, уый сахуыр кодта. Цафон æмæ сæм цы хъацæнтæ хъæуы бахæссын, мæр донхæр кæд хъæуы, уыдæттæ лæмбынæг сахуыргæнгæйæ, счъилдысæй бавнæлдта дыргъдонмæ æвзонг арендатор. Арæх-иу æрбауад, хъæууон хæдзарады министрады цы специалисттæ ис, уыдонмæ дæр фæрсынмæ. Амындтытæ афоныл æххæст кодта æмæ дыргътæ дæр сæхиуыл схæцыдысты, цадæггай тыллæг дæттын райдыдтой.
Ибрагим хъæуы схъомыл ис. Гыццылæй уыдта, хистæртæ куыд куыстой, æмбисонд Дменисы хъæуы дыргъбæлæстæ уыдысты. Нырма дæр бирæ ис, хъæуы дыргъгуыст чи кæны, ахæм адæм. Уыдоны дæр афæрстытæ кæны. Бирæ фыдæбон сыл ис, кусджытæ йын нæй, æхсæдгæ дæр сæ йæхæдæг кæны, иунæгæй. Дыргъдоны фарсмæ уыд æнæкуыст зæхх æмæ ма афтид зæххы дæр ныссадзы пъамидортæ, къабуска æмæ цъæхыгтæ. Фарон сæрд уыдон радтой хорз тыллæг. Уыдон æвзонг арендатор иууылдæр фæуæй кодта бынæттон базары. Цæхæрайы сыфтæ та йын истой цæттæ къæбицты хицæуттæ – кæрдзын кæнынæн. Бæлæсты рæгъыты ‘хсæн ын сагъд ис сæнæфсиры талатæ дæр. Арендатор зæгъы, зæгъгæ, дам, аргъ кæнын хъæуы зæххы алы гæппæлæн дæр. Ивгъуыд аз балхæдта трактор, кредиты хуызы цы æхцайы фæрæзтæ райста хицауадæй, уыдонæй. Балхæдта родтæ дæр. Базилы сæм æмæ сæ ауæй кæны. Цы æфтиæгтæ райсы, уыдонæй бафиды йæ кредит. Ивгъуыд аз дæр фæнд кодта ногæй кредит райсын, цæмæй йæ куыст ноджы рауæрæхдæр кодтаид, фæлæ йæ коронавирусы пандеми бахъыгдардта. Ныр дæр та балæвæрдта йæ гæххæттытæ Экономикæйы райрæзты министрадмæ хатырон кредит райсыны тыххæй. Йæ зæрды ис йæ быдыры фарсмæ хъæрмуат саразын, цæмæй зымæджы дæр зайын кæна цъæхыгтæ. Кæд хатырон кредит чи дæттынц, уыдоны зæрдæмæ йæ бизнес-план фæцæуа, уæд ма йæ зæрды ис ставдкъах фос дæр балхæнын. Зоны, уыдæттæн стыр фыдæбон хъæуы, фæлæ куыст фæстиуæг куы хæсса, уæд æвзонг адæймаг фыдæбон дæр ницæуыл фæнымайы. Канд коронавирус нæ, фæлæ ма æндæр аххосæгтæм гæсгæ дæр арæх æрæхгæнынц, Хуссар Ирыстонмæ цы иунæг фæндаг цæуы Уæрæсейæ, уый. Уый та иууыл фыццаг бандавы хæлцадон продуктты цухдзинадыл. Икъаты Ибрагимы хуызæн арендатортæ нæм куы уа, уæд фæндаджы æхгæд æппындæр не ‘ндавдзæнис фæлхасгæнджытыл. Кусын хъæуы канд арендатортæ æмæ фермерты нæ, фæлæ алы хъæууон адæймаджы дæр. Иу зæххы гæппæл дæр ныууадзын нæ хъæуы æнæ куыстæй. Ибрагим загъта, куыддæр уалдзыгон бонтæ райдыдтой, афтæ сæумæцъæхæй изæрдалынгтæм вæййы йæ кусинæгты уæлхъус. Æмæ йын фæстиуджытæ дæр уымæн ис! Дардмæ дæр зæрдæ рухс кæны йæ хæрзкуыст дыргъдонæй.
УАЗÆГТЫ Марфа
Comments are closed, but trackbacks and pingbacks are open.