Цхинвалы Æнусон арты цур Хъайтарты аллеяйы Республикæ Хуссар Ирыстоны Гарзджын тыхтæм уалдзыгон æрсидты æвзонг хæстонтæн уыд  æфсæддон ардбахæрды цытджын церемони.

Ацы ахсджиаг цауы тыххæй æвзонг хæстонтæн раарфæ кæнынмæ æрбацыдысты Республикæ Хуссар Ирыстоны Президент æмæ РХИ-йы Гарзджын тыхты сæйраг командæгæнæг Тыбылты Леонид, Хицауады Сæрдар Хъуылымбегты Доменти, Парламенты Сæрдар Бибылты Анатоли, Хуссар Ирыстоны Æдасдзинады советы нымæрдар Плиты Анатоли, Хицауады уæнгтæ, æвзонг æфсæддонты ныййарджытæ æмæ хæстæджытæ.

Ардбахæрд райсыны церемонийы уыдысты Республикæ Хуссар Ирыстоны Хъахъхъæнынады министрады къухдариуæгад министры хæстæ æххæстгæнæг инæлар-лейтенант Гассеты Ибрагимы сæргълæудæй.

Республикæ Хуссар Ирыстоны Паддзахадон гимны зæлтæ куы айзæлыдысты, уый фæстæ Цхинвалы гарнизоны афицертæ æмæ салдатты рæнхълæуды раз æвзонг æфсæддонтæ ард бахордтой Райгуырæн бæстæйыл иузæрдион уæвыны сæраппонд. Æфсæддонты ардбахæрды дзырдтой, зæгъгæ, хъæбатырæй, кад æмæ цытимæ æххæст кæндзысты се ‘фсæддон хæстæ, уыдзысты æхсарджын,  хæрзæгъдау, намысджынæй æххæст кæндзысты æфсæддон уставы домæнтæ, хъæбатырæй, фæстаг сулæфты онг хъахъхъæндзысты сæ Райгуырæн бæстæ, æнувыд уыдзысты сæ адæмыл.

Ардбахæрды фæстæ æвзонг æфсæддонтæн раарфæ кодта Президент Тыбылты Леонид. Уый банысан кодта æфсæддон ардбахæрды ахсджиагдзинад.

«Райгуырæн бæстæйыл æнувыддзинады тыххæй ардбахæрд райсгæйæ, сымах ныр стут Республикæ Хуссар Ирыстоны Гарзджын тыхты хай. Сымах ард бахордтат Райгуырæн бæстæйыл æнувыд уæвыныл, æфсæддон службæгæнджытæ уæвгæйæ, æппæт дæр кæй сараздзыстут, цæмæй Хуссар Ирыстон, йæ Гарзджын тыхтæ уой тыхджындæр. Ацы бон сымахæн тынг ахсджиаг у æмæ йæ цæрæнбонтæм уæ зæрдыл бадардзыстут. Фæнды мæ, цæмæй уат æнæниз, уе службæйы уын уа æнтыстытæ, мæ зæрдæ уын зæгъы, цæмæй уæхиуыл кусат, ахуыр кæнат æфсæддон хъуыддаджы сусæгдзинæдтæ», – загъта Президент.

Уый банысан кодта, фидарæй йæ кæй уырны, æфсады райсгæ зонындзинæдтæ сын кæй фæахъаз уыдзысты сæ дарддæры æнтыстджын куысты, цыфæнды фадыджы архайд куы равзарой, уæддæр.

Президент бузныджы ныхæстæ загъта, æвзонг æфсæддонтимæ чи куыста, уыцы æвзонг командиртæн æмæ Хъахъхъæнынады министрады къухдариуæгадæн, æвзонг æфсæддонты бацæттæ кæнынæн æмбæлон уавæртæ кæй сарæзтой, уый тыххæй.

«Фидарæй мæ уырны, Хъахъхъæнынады министрады къухдариуæгад дарддæр дæр æмбæлон уавæртæ кæй араздзæн уæ дарддæры цæттæдзинады тыххæй», – банысан кодта Тыбылты Леонид.

Президент бузныджы ныхæстæ загъта æфсæддонты ныййарджытæн дæр, Райгуырæн бæстæмæ уарзондзинадыл сæ кæй цайдагъ кодтой æмæ сæ патриоттæй кæй схъомыл кодтой, уыимæ ма сæ сæ патриотон хæс æххæст кæнынмæ кæй цæттæ кодтой, уый тыххæй.

Æвзонг æфсæддонты ныййарджыты номæй раныхас кодта Икъаты Русланы мад Санахъоты Людмилæ. Уый бузныг загъта республикæйы къухдариуæгадæн, Хъахъ-хъæнынады министрады къухдариуæгадæн, æвзонг æфсæддонтыл кæй аудынц æмæ сæм сæ хъус лæмбынæг кæй дарынц, уый тыххæй.

«Æппæт ныййарджыты номæй æвзонг æфсæддонтæн мæ зæрдæ зæгъы фидар удыхъæд, амонд æмæ æнтыстыты фæндиæгтæ», – загъта Санахъоты Людмилæ.

Æвзонг æфсæддонты ротæйы номæй раныхас кодта Гуыдийы фырт. Уый бузныг загъта Республикæ Хуссар Ирыстоны Гарзджын тыхты сæйраг командæгæнæгæн, инæлартæ, афицертæ æмæ сержанттæн, кæй сын баххуыс кодтой æмæ сæ æфсæддон ардбахæрдмæ кæй бацæттæ кодтой, уый тыххæй.

«Ныфс уын дæттæм, кæй уыдзыстæм Райгуырæн бæстæйы æнувыд хъахъхъæнджытæ, кæй службæ кæндзыстæм кад æмæ цытимæ», – банысан кодта уый.

Мадзалы кæрон æвзонг æфсæддонтæ, Республикæ Хуссар Ирыстоны Хъахъхъæнынады министрады афицертæ æмæ æфсæддон дæлхæйттæ цытджын хъарагъулы сæргълæудæй цытджын маршæй рацыдысты Кады аллеяйы.

 

 

Comments are closed, but trackbacks and pingbacks are open.