РХИ-йы Президент Тыбылты Леониды сæрдариуæгадæй уагъд æрцыдис 2015-2017 азты Хуссар Ирыстоны социалон-экономикон рæзтæн ахъазгæнæг Инвестицион программæ реализацийыл контролы фæдыл штабы радон рабадт. Йæ куысты хайад райстой хицауады уæнгтæ, паддзахадон уагдæтты къухдариуæггæнджытæ, горæты æмæ районты адми-нистрациты сæргълæуджытæ, подрядон организациты минæвæрттæ.

Рабадты хайадисджытæ сæ куыст райдыдтой ивгъуыд къуыри республикæйы разамынад цы хæслæвæрдтæ бакодта, уыдон куыд æххæст æрцыдысты, ууыл æруынаффæ кæнынæй. Уыцы хæслæвæрдтæй сæ иуы фæдыл Архитектурæ, арæзтад æмæ цæрæнуатон-коммуналон хæдзарады министр Зæгъойты Эдуард информаци радта арæзтцæуæг объектты бынæттон цæрджытæй цал кусæджы ку-сынц, уый тыххæй. Йæ ныхæстæм гæсгæ арæзтадон объектты ныртæккæ кусынц республикæйы 325 кусæджы. Президент дæр банысан кодта, зæгъгæ, республикæйы территорийыл цы арæзтадон объекттæ арæзт цæуынц, уыдонмæ дарддæр дæр кусынмæ ист хъуамæ цæуой бынæттон цæрджытæ, æмæ уый хъуамæ зоной подрядон организациты æппæт къухдариуæггæнджытæ дæр. Йæ ныхæстæм гæсгæ, нæ бæстæйы разамынад фыццаг хатт нæ уынаффæ кæны ацы фарстыл. Ныртæккæ республикæйы æнцон нæу куыст ссарын, адæмы та фæнды мызд исын æмæ сæ бинонты дарын, уымæ гæсгæ æвæрд цæуы ацы фарст дæр.

Оперативон штабы ивгъуыд къуырийы рабадты горæты администрацийæн хæс уыдис, цæмæй информаци радтаид Цхинвал-Дзауы фæндаггæрæтты цы арæзтæдтæ план цæуынц, уыдоны тыххæй. Йæ ныхæстæм гæсгæ ацы фарстыл уынаффæ кодтой РХИ-йы Хицауады Сæрдар Хъуылымбегты Доментиимæ. «Ацы фæндаджы былтыл  объекттæ аразын кæй фæнда, уыцы потенциалон инвестортæн бамбарынчындæуыд, цæмæй æрбавдисой æмбæлон проекттæ, кæцыты амынд цæуой объектты бынæттæ, уыдонмæ рацæуæнтæ æмæ бацæуæнтæ. Ацы проектæн сæ 80 проценты мах æрæмбырд кодтам», – загъта горæты мэр.

Ацы фарсты фæдыл Тыбылты Леонид банысан кодта, зæгъгæ, ацы фæндаджы былтыл объектты æнæмæнгæй аразын хъæуы горæты генералон планмæ гæсгæ. Горæтмæ бацæуæнты æнæпланон арæзтæдтæн ауадзæн нæй, æххæст кæнын хъæуы æппæт фæткойтæ дæр, цæмæй сын уа бæрæг бæлвырд дизайн.

Хицауады Сæрдары фыццаг хæдивæг Тъехты Алан куыд фехъусын кодта, афтæмæй ацы фарстыл уынаффæ цыдис уæрæсейаг специалисттимæ дæр.

«Уæрæсейы ис ахæм практикæ, æмæ коммерцион объекттæн зæххы фадгуытыл арæзтады рæстæджы арендон бафыстыты аргъ цалдæр хатты сырæзы. Уый амалиуæггæнæджы разæнгард кæны, цæмæй арæзтад тагъддæр цæуа. Мах дæр ахæм амалæй пайда кæндзыстæм, уымæн æмæ бирæ арæзтадты æмгъуыд адаргъ вæййы», – загъта уый.

Республикæйы культурæйы министр рабадты хайадисджыты размæ рахаста Хетæгкаты Къостайы номыл Паддзахадон драмон театры фидæны персоналы номхыгъд. Уый куыд банысан кодта, афтæмæй бацæттæ кодтой æмæ хицауады аппаратмæ барвыстой гæххæтт, кæцымæ гæсгæ ныртæккæ куыст цæуы штатон расписанийыл, аразынц хыгъдтæ театрæн уæлæмхас хæрдзты фæдыл, кæцытимæ базонгæ кæндзысты Уæрæсейы Федерацийы культурæйы министрады.

Рабадты хайадисджытæ байхъуыстой республикон унитарон куыстуат «Водоканал»-ы генералон директор Зассеты Сергейы информацимæ Цхинвалы 6 уынджы хæдзæрттæм зæххы бын коммуникацитæ уагъд кæй æрцыдысты, æмæ бакæнгæ куыстыты гуырахсты фæдыл хъæуæг документаци аразыны тыххæй. Президент æвæрццаг аргъ скодта ацы организацийы архайдæн. Уый сфидаргонд æмгъуыдтæй раздæр фæцис æппæт куыстытæ дæр, æмæ Президент бузныджы ныхæстæ загъта йæ кусджытæн.

Арæзтады министр Зæгъойты Эдуард ма хыгъд радта 2016 азæн Инвестпрограммæйы   объектты арæзтадон куыстытæ куыд цæуынц, уый тыххæй. Уый фехъусын кодта, зæгъгæ, зæххы бын коммуникацитæ хæдзæрттæм цы 6 уынджы уагъд фесты, уымæй дарддæр ма ахæм куыстытæ æххæст цæуынц Фæскомцæдисы, Тугъанты Махарбеджы æмæ Дзадтиайы фырты уынгты. Уыдоны та куыстытæ æхæст кæны подрядон организаци «Ремтруб-сервис». Йæ ныхæстæм гæсгæ ацы уынгты куыстытæ хъуамæ фæуой ацы мæйы кæ-ронмæ. Куыстытæ цæуынц графикмæ гæсгæ.

Министр фехъусын кодта, зæгъгæ, графикмæ гæсгæ куыстытæ æххæст цæуынц иннæ объектты дæр. Цæвиттон Паддзахадон драмон театры арæзтад фæуыдзæнис ацы азы ноябры кæронмæ. Ам æдæппæт кусынц 130 адæймаджы. Ноябры кæронмæ ма план цæуы Цхинвалы бирæпрофилон колледжы ахуыргæнæн æрмадзты арæзтад дæр. Ам та кусынц 25 адæймаджы, кæцытæн сæ фылдæр хай сты бынæттон кусджытæ.

Куыстытæ графикмæ гæсгæ цæуынц университетон комплексы, афтæ ма медицинон комплексы дæр, кæцыйы ис цалдæр объекты:  сывæллæтты республикон рынчындон, операцион-хирургион комплекс æмæ гуырæн хæдзар. Арæзтады министр уæлдай тынгдæр раппæлыд сывæллæтты республикон рынчындоны куыстыты æмбæлон гъæдæй. Уый куыд загъта, афтæмæй сывæллæтты республикон рынчындон хъуамæ арæзт фæуа ноябры мæймæ. Операцион-хирургион комплексы арæзтады фыццаг этап æххæст цæуы, гуырæн хæдзары арæзтад та райдайдзæн ацы аз æмæ фæуыдзæн 2017 азы.

Æнæниздзинад хъахъхъæныны æмæ социалон рæзты министр Григори Кулиджанов ра-дзырдта цы зындзинæдтыл æмбæлынц гуырæн хæдзары арæзтады фарстаты, уыдоны тыххæй. Йæ ныхæстæм гæсгæ, райдианы план цыдис акушерон æмæ гинекологион хайадты, сывæрджын сылгоймæгты паталогийы, афтæ ма ноггуырдтæм зилыны фыццаг этап иу бæстыхайы бакæнын, фæлæ Уæрæсейы Федерацийы æнæниздзинад хъахъ-хъæныны министрад фæндон бахаста, цæмæй гинекологион хайад гуырæн хæдзары ма уа, хаст æрцæуа республикон рынчындонмæ, Уæрæсейы медицинон уагдæтты куыд у, афтæ. Министр куыд банысан кодта, афтæмæй ацы фарстыл нырма уынаффæ цæудзæнис УФ-йы Æнæниздзинад хъахъ-хъæныны минæвæрттимæ, кæцытæ æввахс рæстæджы æрцæудзысты нæ республикæмæ.

Арæзтады министр радзырдта Цхинвалы централон хайы базары арæзтады тыххæй дæр. Ацы объекты арæзтадыл кусы арæзтадон компани «Престиж». Ныр-тæккæ дзы кусынц 12 адæймаджы. Уыдон амайынц къултæ, декоративон агуыритæй сæ фæлындзынц. Закъаз æрцыдысты æфсæйнаг конструкцитæ æмбæрзынæн. Ам дæр куыстытæ æххæст цæуынц графикмæ гæсгæ.

Æмбырды ма уынаффæ цыдис генподрядон организаци «СоюзСтройПроэкт» Хуссар Ирыстоны æмæ Ленингоры районы цы объекттæ аразы, афтæ ма РХИ-йы Автомобилон фæндæгты арæзтад æмæ эксплуатацийы фæдыл комитет Синагур-Карзман æмæ Гуфта-Къуайсайы фæндæгтыл цы куыстытæ æххæст кæнынц, уыдоны темптыл.

Бестауты В.

Comments are closed, but trackbacks and pingbacks are open.