СИНАГУРЫ ИВГЪУЫД ЦАРДÆЙ

Æрдз йæ рæсугъддзинадæй нæ фæхъыг кодта Дзауы районы Синагуры хъæуы. Уый æрбынат кодта рæсугъд хæхты астæу æмæ йæ фыццаг хатт чи фены, уый дзы райсы стыр æхцондзинад, адæймаджы зæрдæ æмæ цæстыты фæрæвдауы йæ алæмæттаджы æрдз. Ацы хъæуы  æрдз  нæ фæхъыг кодта йæ хъæздыгдзинæдтæй дæр. Мæры цы фæнды баппар – нæ дæ фæсайдзæн. Зайгæ та дзы кæны картоф, мæнæу, хъæбæрхор, нартхор, алыгъуызон халсæрттæ. Хорз сæм зайынц алыгъуызон дыргъбæлæстæ.

Æддейæ бакæсгæйæ хъæуæн мæгуыргъуыз нæй. Рæсугъд, дыууæуæладзыг хæдзæрттæ. Цас дæ фæнды, уыйбæрц фос дар, хъыгдарæг дæ нæй.

Куыд фæзæгъынц, æддагоны цæст, дам, уынаг у: цы адæм дзы цæрынц, уыдонæн сæ цæстæнгас – фæлмæн, сæ дзыхы ныхас – рæвдаугæ. Иудзырдæй, уайтагъд бафиппайæн ис, ам йæ цардæй хъæстаг кæй ничи у, уый. Ацы хъæуæн æвдадзы хос сты йæ дæттæ, хæрзад æмæ фæлмæн кæй фæхонынц, ахæм. Уый бафиппайдтой, æрæджы Синагуры цæрджыты цард бабæрæг кæныны тыххæй, уырдæм чи фæуазæг сты, уыцы журналисттæ.

Зæгъын хъæуы уый, æмæ ацы хъæуы Советон дуджы дæр цард цæджджинагау кæй фыхтис, уый. Синагуры хъæуы уыдис 150 цæрæг хæдзары. Алы хæдзар дæр дардта фос, уыдис сын сæхи хæдзаргæрон цæхæрадæттæ. Уымæй дарддæр куыстой колхозон быдырты. Колхоз дардтой бирæ ставдкъах фос æмæ фермæйы дæр куыстой хъæубæстæ.

Хъæуы уыд библиотекæ, магазин, хинайæн, хъæусовет, милицийы пост, скъола, рынчындон, хуыйæн цех, хæрæндон. Автобус сæм цыдис бон 6 хатты. Æгæрыстæмæй, Дзæуджыхъæуæй бакодтой маршрут Синагурмæ. Иудзырдæй, ацы хъæуы цæрджытæй алкæмæн дæр уыд куыст.

Ам, хъæуы астæу, уыд, цæрджытæ кæдæм æмбырд кодтой, ахæм бынат, æмæ-иу уым сæ куыстæгтыл, дарддæр сын бакæнинаг цы ис, уыдæттыл дзырдтой. Уыцы бынат хуыдтой Ныхас. Уæлдæр ранымадгонд уагдæттæ та уыдысты йæ алыварс.

Банысан кæнын хъæуы уый, æмæ ацы хъæуы рагæй фæстæмæ кæрæдзийы фарсмæ хæларæй кæй цардысты ирæттæ æмæ гуырдзиæгтæ. Амы цæрæг гуырдзиæгтæ иронау афтæ рæсугъд дзурынц æмæ йæ цалынмæ йæ мыггагæй нæ афæрсай, уæдмæ нæ базондзынæ, ирон у æви гуырдзиаг.

«-Ам стæм гуырдзиаг хæдзар разындзæнис, ирон чындз, кæнæ сиахс кæй къæсæрæй нæ бахызтис. Афтæ иннæрдæм дæр – бирæ гуырдзиаг лæппутæ æмæ чызджытæ бакъахдзæф кодтой ирон бинонтæм чындз æмæ сиахсы номыл. Амы цæрæг гуырдзиæгтæн абарæн нæй æндæр хъæуы гуырдзиаг цæрджытимæ. Не ‘хсæн быцæу ныхас никуы æрцыд, цæрæм хæларæй», – дзырдтой хъæуы ирон цæрджытæ.

УЫЦЫ ХЪИЗÆМАЙРАГ АЗТÆ…

Афтæ адджынæй цардысты, цалынмæ 90-æм азтæ не ‘рбалæууыдысты, уæдмæ. Стæй уæд райдыдтой сæ хъизæмæрттæ. Æнæнхъæлæджы сæм фæмидæг сты æмæ сын аскъæрдтой сæ совхозы фос æмæ сæ афтид аззадысты. Æмæ, ууыл куы аирвæзтаиккой: æрцæуæггаг гуырдзиæгтæ цыдысты ирон  хæдзæрттæм æмæ сæ къухы хорзæй цы æфтыд, уыдон хастой.

Ам ахæм хæдзар нæ уыд, мыды чыргъæдтæ чи нæ дардта æмæ-иу сын ахастой сæ мыд. Сæ цыхтытæ-иу сын систой сæ хæндгуытæй. Сæ фос-иу сын аскъæрдтой. Æцæг, æндæр ирон хъæуты хъауджыдæр, ацы хъæуы иу хæдзар дæр нæ басыгътой. Фæлæ хъæуы цæрджытæ тынг фæтарстысты æмæ фæлыгъдысты – чи Цæгат Ирыстонмæ, чи та Уæрæсемæ æндæр æмæ æндæр рæттæм.Дыккаг хатт та Синагуры хъæуы цæрджытæ зæрдæдзæф фесты, зæхх куы нынкъуыстис æмæ сæ фарсмæ уæвæг Хахеты хъæу, зæххы бын куы фæцис. Уæд дæр та хъæуы цæрджытæ фæтарстысты æмæ та дзы бирæтæ фæлыгъдысты.

2008 азы хæстæй дæр æвыдæй нæ аирвæзтысты. Тарстысты, гуырдзыимæ æмарæн кæй кодтой æмæ сæ куы ныццагътаиккой, уымæй æмæ та æртыккаг хатт дæр фæлыгъдис хъæуы цæрджытæй.

СКЪОЛА – ЦАРДЫ ÆВДИСÆНДАР

Куыд Ирыстоны æндæр хъæуты, афтæ Синагуры хъæуы дæр 30-æм азты арæзт æрцыд скъола. Хъæу дардыл ивæзта йæ къабæзтæ. Фылдæрæй фылдæр кодтой йæ цæрджытæ. Æмæ дзы арæзт æрцыд дыууæуæладзыгон капиталон скъола. 1974 азы скъолайы ахуыргæнинæгтæ баисты 380 бæрц. Нал фаг кодтой кълæстæ æмæ сæ дыууæ сменæйыл адих акодтой.

Скъоладзаутæй иутæ ахуыр кодтой райсомæй, иннæтæ та – сихорæй. Зæгъын хъæуы уый, æмæ дзы иурæстæджы кæй бакодтой изæры скъола дæр. Хъæуы гуырдзиæгтæ æмæ ирæттæ иумæ кæй цардысты, уымæ гæсгæ фæдих дыууæ секторыл: ирон æмæ гуырдзиаг. Афтæ ахуыр кодтой фæрсæй фæрстæм ирон æмæ гуырдзиаг сывæллæттæ. Фæлæ ацы скъолайы хъыс-мæт дæр бæллиццаг нæ разынд хъæубæсты цæрджытæн сæхиау. Зæххæнкъуысты рæстæджы ныппырх.

Хъæуы ма абон цæргæйæ чи баззадысты, уыцы сывæллæттæн скъола æрбакодтой хъæуы рынчындоны бæстыхайы. Фæлæ  уый уыд рæстæгмæ. Уый фæстæ сын нæ республикæйы разамынады хъæппæрисæй æлхæд æрцыд дыууæуæладзыгон хисæр-магонд хæдзар. Скъолайы ахуыргæнæг Джиоты Зæлинæ куыд зæгъы, афтæмæй сын ахуыркæнынæн æппæт уавæртæ дæр ис.

«Кæй зæгъын æй хъæуы, нæй нын хицæн кабинеттæ физикæ, хими æмæ биологийæ, фæлæ уый сæ ахуырыл тынг нæ æндавы. Ахуыргæнинæгтæн сæ ахуырфæразондзинады æмвæзад у бæрзонд. Нæ рауагъдонтæ сæ ахуыр адарддæр кæнынц куыд нæхи республикæйы, афтæ Уæрæсейы уæлдæр ахуыргæнæндæтты дæр», – банысан кодта Зæлинæ.

Скъоламæ æмбæлон хъусдард здахы Дзауы районы адæмон ахуырады хайад. Рæстæгыл ифтонг цæуынц ахуыргæнæн чингуытæй. Зымæджы кълæстæ вæййынц хъарм, рæстæгыл æрцæуынц сугæй ифтонг. Урокты фæстæ сын ауадзынц уæлæмхас уроктæ. Чызджыты ахуыр кæнынц хуыйын, бийын. Лæппуты та ахуыр кæнынц бæхыл бадын. Уыдон та сты скъолайы директор Бестауты Аркадийы хисæрмагонд бæхтæ.

Скъолайы æрмæст Синагуры хъæуы сывæллæттæ нæ ахуыр кæнынц, фæлæ йæм цæуынц йæ алыварс хъæутæ – Теделет, Карзманæй дæр. Ам, хæхбæсты, мит бирæ уары. Бирæ хатт вæййы афтæ, æмæ 2 метры бæрц дæр æруары. Уæд скъоламæ цæуын фæзын вæййы уыцы хъæуты сывæллæттæн, æркæнынц сæ бæхтыл æмæ  сæ фæстæмæ дæр акæнынц уыдоныл.

Æнæуый та скъолайæн 7 азы размæ нæ республикæйы разамынад æмæ РХИ-йы Ахуырады министрады хъæппæрисæй æлхæд æрцыд УАЗ-ик машинæ æмæ ууыл ластой ахуыргæнинæгты скъоламæ. Уæд РХИ-йы Ахуырады сæргъ лæууыд Джиоты Арянæ. Фæлæ уыцы машинæ фехæлд æмæ тыхстысты. Ам та стыр хъæппæрис равдыста нæ республикæйы прокурор Дзæгъиаты Уырызмæг. Уый скъолайæн балхæдта, «Хантер» машинæ кæй хонæм, уый æмæ та сын фенцондæр. Æнæуый дæр йæ хъус дары скъоламæ æмæ сын бакæны ногазон бæрæгбонон лæвæрттæ дæр. Уый тыххæй дзы стыр бузныг сты скъолайы ахуыр-гæнджыты коллектив.

Зæгъын хъæуы уый, æмæ ахуыргæн-джытæ сæ куыстмыздæй дæр райгонд кæй сты. Математикæйы ахуыргæнæг сæм æрбацыдис горæтæй, иннæтæ иууылдæр сты бынæттон цæрджытæ.

Банысан кæнын хъæуы уый дæр, æмæ Синагуры хъæумæ æввахс уырыссаг æфсæддон базæ кæй æрбынат кодта. Уыцы æфсæддонтæн 23-æм февралмæ æмæ 9-æм маймæ скъолайы ахуыргæнинæгтæ сæ ахуыргæнджытимæ бацæттæ кæнынц бæрæгбонон программæттæ. Æрбахонынц сæ скъоламæ æмæ сын ракæнынц бæрæгбонон арфæтæ.

Зæгъын хъæуы уый дæр, æмæ Синагуры скъолайы ахуыргæнинæгтæн ам фадат кæй вæййы дыууæ урокы фæстæ аходæн бакæнынæн дæр. Иудзырдæй, ацы скъолайы ахуыртæ цæуынц æмбæлон æмвæзадыл, фæлæ ахуыргæнджыты тыхсын кæны иу хъуыддаг: ахуыргæнинæгтæ кæнынц азæй аз къаддæр. Уымæн та йæ аххосаг у уый, æмæ адæм уæддæр æндæр рæттæм цæрынмæ кæй лидзынц.

Скъолайы гуырдзиаг секторы цы сывæллæттæ ахуыр кæнынц, уыдон хъысмæтмæ куы бацымыдис кодтам, уæд нын загътой, уыдонæн та гуырдзиагау ахуыр кæныны фадат кæй нал уыд, уымæ гæсгæ сæ кæй акодтой гуырдзиаг хъæу Переумæ. Уыимæ ма йын ноджыдæр уыд иу аххосаг: Синагуры скъолайы нæй англисаг æвзагыл ахуыр кæныны фадат. Рæвдауæндæттæм дæр сæ кæнынц Переуы хъæумæ. Ныр арæн æхгæд æрцыд æмæ стыхстысты. Ардыгæй чи баззад, уыдонæн фадат нал ис уыцырдæм ахизынæн. Уырдыгæй дæр – афтæ. Уымæ гæсгæ гуырдзиаг цæрджытæ дæр æвдыстой се ‘нæразыдзинад.

Арæны сæхгæды аххосаг – Гуырдзыстоны цы тæссаг низ – хуыйы грипп фæзынд, уый.

 

СИНАГУРЫ ХЪÆУЫ РЫНЧЫНДОНЫ СЫРÆЗТ

Хъæуы рынчындоны сырæзт стыр æхсызгондзинад æрхаста канд синагуй-рæгтæн нæ, фæлæ ма йæ алыварс хъæутæ -Теделет, Карзман, Дзалабет æмæ Хахетæн дæр. Уæд ма уый цардæгас хъæу уыд æмæ дзы цард цæдджинагау фыхт.

Ныр уавæримæ фæивта æппæт дæр. Цæрджытæ куы скадавар сты хæсты æмæ зæххæнкъуысты фæстиуæгæн, уæд рынчындонæй арæзт æрцыд амбулатори. Дохтыр Гæбæраты Тамарæ йæ хъус дары ацы хъæуты цæрджыты æнæниздзинадмæ. Ис сын сæхи машинæ æмæ кæд исчи фæтыхсы, уæд уайтагъд йæ уæлхъус балæууынц æмæ йын бакæнынц фыццаг медицинон æххуыс. Амбулатори æххæст у æнæмæнгхъæуæг хостæй. Цæрджытæ сæхæдæг куыд дзурынц, афтæмæй фылдæр хос кæнынмæ цæуынц Гуырдзыстонмæ – Сачхеремæ, кæд сæм стыр хъусдард здæхт цæуы Дзауы районы æнæниздзинады хайад æмæ РХИ-йы Æнæниздзинад хъахъхъæныны министрады ‘рдыгæй дæр, уæддæр. Рæстæгыл ифтонг æрцæуынц хостæ æмæ медикаменттæй дæр.

Ацы бонты сæм æрцыдысты Цхинвалæй дохтыртæ æмæ сын сарæзтой, чи апарахат, уыцы тæссаг гриппы æмæ фадынæджы ныхмæ судзинтæ. Сарæзтой сæ хъæуы цæрджытæй алкæмæн дæр чысылæй зæрондмæ.

Ам хъæуы цæрджытæн афæдз дыууæ хатты та ауагъд æрцæуы диспансеризаци. Цхинвалæй сæм æрцæуынц дохтыртæ æмæ цæрджытæн фадат вæййы се ‘нæниздзинад лæмбынæг басгарынæн.

ЦÆУЫЛ ТЫХСЫНЦ СИНАГУЙРÆГТÆ?

Синагуры хъæуы, куыд ма йæ загътам, раздæр дæр цард цæдджинагау фыхтис. Ныр дæр сæм цард йæ мидбылты худы. Алы фадæттæ дæр сын ис æмбæлон цард кæнынæн. Дар, цас дæ фæнды, уыйбæрц фос, хъыгдарæг дæ нæй. Æркæрд, цас дæ фæнды, уыйбæрц хос, кус дæр зæххытæ æмæ дæм уæд цард йæ мидбылты худдзæн. Алы хæдзары раз дæр фенæн ис хисæрмагонд рог машинæ. Къуыри иу хатт – дыццæджы та сæм цæуы Цхинвалæй автобус æмæ цæрджытæн фадат ис сæ уæййæгтæ, царв, цыхт, хъæдур, картоф горæтмæ æрласын æмæ ауæй кæнынæн.

Хъæуы сæйраг у дон æмæ уымæй дæр цух не сты йæ цæрджытæ.

Уæдæ ма цæуыл тыхсынц синагуйрæгтæ? Уыдон сты фæндаг æмæ бынæттон телеуынынад. Фæндаг тынг хорз арæзт у хъæумæ ссæуæны онг, фæлæ хъæуæн йæхи мидæг цы фæндаг цæуы, уый у æххæл-мæххæлтæ.

Хъæууон администрацийы сæргълæууæг Гæджиты Олег куыд загъта, афтæмæй йæ алæгъз кодтой, хуыр ыл æркалдтой, фæлæ дзы дондзæуæн къанаутæ арæзт не ‘рцыд æмæ йæ тæрккъæвдатæ фæластой.

Зымæгон митуарды рæстæгыл асыгъдæг кæнынц фæндæгты. Хъæубæстæ бузныг сты тракторист Æлборты Валикæй. Уый сæйраг фæндаджы ахафы Ерцъойы хъæуы онг æмæ сын бирæ фенцондæр вæййы.

Хъæуы цæрджытæ ма хъаст кæнынц, бынæттон телеуынынад сæм кæй не ‘вдисы æмæ сын фадат кæй нæй бынæттон алæвæрдтæм бакæсынæн, ног хабæрттæ базонынæн. Зæрдæ æвæрынц, ацы хъуыддаг кæмæ хауы, уыдон ацы фарст кæй æрбæстон кæндзысты. Фæлæ уал нырма уавæр у афтæ.

ПАРТИ «ИУУОН ИРЫСТОН»-Ы ÆХХУЫС – СИНАГУЙРÆГТÆН

Нæ республикæйы разамынад стыр хъусдард здахы хъæууон цæрджыты цардуагон уавæртæ фæхуыздæр кæнынмæ. Ам Инвестпрограммæйы фæлгæтты арæзт æрцы-дысты 14 хъæдын хæдзары бирæсывæллонджын æмæ цыбыркъух бинонтæн. Уыдонæй 7 арæзт æрцыдис Синагуры хъæуы, иннæ 7 та – Теделеты хъæуы.

Æрæджы та Парламентон парти «Иууон Ирыстон» Синагуры, Теделеты æмæ Карзманы хъæуты цæрджытæн бакодта æххуыс æнæмæнгхъæуæг продукттæй. Парти «Иу-уон Ирыстон»-ы уæнгтæ куыд нымайынц, афтæмæй республикæйы дæрддаг хъæутæн ахæм социалон æххуыс партийы ‘рдыгæй лæвæрд цыд раздæр дæр. Ныр зымæгон зын уавæртæ хынцгæйæ, хъæууон цæрджытæн хæлцадон продукттæй баххуыс кæнын нымайынц æнæмæнг хъуыддагыл.

Зæгъын хъæуы уый, æмæ Синагуры кæй ис хисæрмагонд магазинтæ дæр. Уыдоны ис æнæмæнгхъæуæг продукттæ æмæ дыргътæ балхæнæн. Уымæ гæсгæ ацы хъæуты цæрджыты тынг арæх нæ хъæуы горæтмæ æрцæуын продукттæ æлхæныны тыххæй.

Бестауты Валя

Comments are closed, but trackbacks and pingbacks are open.