Куыд ма хъусын кодтам, афтæмæй 16 декабры Дзæуджыхъæуы уыд Уæрæсейы Федераци æмæ Республикæ  Хуссар Ирыстоны ‘хсæн социалон-экономикон æмгуысткæнынады фæдыл Æхсæнхицауадон къамисы æвддæсæм рабадт.

Къамисы æмсæрдæрттæ, хуссарирыстойнаг фарсæй – Хуссар Ирыстоны Хицауады Сæрдар Хъуылымбегты Доменти, уæрæсейаг фарсæй – Уæрæсейы Федерацийы Хицауады Сæрдары хæдивæг Александр Хлопонин æмæ къамисы уæнгтæ уынаффæ кодтой 2016 æмæ 2017 азты Хуссар Ирыстонæн финансон æххуыс бакæнын, 2015-2017 азты Республикæ Хуссар Ирыстоны социалон-экономикон рæзтæн ахъазгæнæг Инвестицион программæйы реализацимæ хауæг фарстатыл, афтæ ма æркастысты, Уæрæсейы Федераци æмæ Хуссар Ирыстоны ‘хсæн Æмцæдисад æмæ интеграцийы тыххæй 2015 азы 18-æм марты къухтæ фыст цы Бадзырдыл æрцыдысты, уый фæлгæтты арæзтæрцæуæг сразыдзинæдтæ бахынцгæйæ, республикæйæн финансон æххуыс бакæныны фарстатæм, 2017-2019 азты бюджетон инвестицитæ сæххæст кæнын æмæ, Хуссар Ирыстоны социалон-экономикон рæзтæн ахъазгæнæг инвестицион архайдæн баххуыс кæныны нысанæн.

Рабадты банысан æрцыд, зæгъгæ, 2016 азы Хуссар Ирыстоны социалон-экономикон рæзты, уыцы нымæцы Уæрæсейы Федераци æмæ Республикæ Хуссар Ирыстоны ‘хсæн Æмцæдисад æмæ интеграцийы тыххæй Бадзырды фæлгæтты сразыдзинæдты реализацийы нысанæн федералон бюджетæй финансон æххуыс уыд 8225,87 милуан сомы. 2015-2017 азты Инвестицион программæйы реализацийæн финанскæнынады иумиаг гуырахст та уыд 9111,82 милуан сомы, 2017 азæн – 3066,67 милуан сомы.

Æхсæнхицауадон къамисы уæнгтæ банысан кодтой фидæны плæнтты дæр. 2017 азы фыццаг кварталы куыстгонд æрцæудзысты 2018-2019 азты Инвестицион программæмæ ахастытæ, кæцыйы нысан  æрцæудзысты республикæйы социалон-экономикон рæзты приоритетон здæхтытæ, уыцы нымæцы экономикæйы реалон сектор дæр.

Æхсæнхицауадон къамисы суагъæйыл къухтæ æрфыссыны официалон церемонийы фæстæ фембæлдæн хатдзæгтæ аразгæйæ, Александр Хлопонин банысан кодта хуссарирыстойнаг коллегæтимæ æнтыстджын æмгуысткæнынад

«Хуссарирыстойнаг командæимæ æмгуысткæныны рæстæджы саразын бантыст хорз куысты практикæ, кæцыйы фæрцы æрæвæргæ хæслæвæрдтæ скъуыддзаг цæуынц æнтыстджынæй æмæ æххæст гуырахстæй. Æппæт хæслæвæрдтæ дæр æххæст цæуынц Уæрæсейаг фарсы ‘рдыгæй дæр æмæ хуссарирыстойнаг фарсы ‘рдыгæй дæр, æмæ ацы Инвестицион программæ реализаци куыд цæуы, уым æз ницахæм критикон фиппаинæгтæ уынын», – бахахх кодта уый æмæ ноджыдæр бузныджы ныхæстæ загъта Хуссар Ирыстоны Хицауады командæйæн йæ эффективон куысты тыххæй, сæрмагондæй та æргом æмгуыст кæныны тыххæй.

Уавæрæй пайда кæнгæйæ, Александр Хлопонин раарфæ кодта йæ хуссарирыстойнаг коллегæтæн æмæ Хуссар Ирыстоны адæмæн æрæввахсуæвæг Ног азы цытæн æмæ сын загъта сабыр арвы бын цæрын æмæ адæймагон амонды фæндиæгтæ.

«Ныфс мæ ис, æмæ 2017 аз ацы азæй кæй уыдзæн рæсугъддæр æмæ амондджындæр, æмæ æппæт фæндтæ дæр кæй сæххæст уыдзысты!» – йæ ныхасмæ бафтыдта уый.

Йæ рады Хъуылымбегты Доменти Хуссар Ирыстоны къухдариуæгад æмæ цæрджыты номæй бузныджы ныхæстæ загъта йæ уæрæсейаг коллегæйæн, республикæйы цардмæ йæ æвæллайгæ хъусдарды тыххæй.

«Нæ стратегион партнер, стыр Уæрæсейы фарсхæцынады, Инвестицион программæйы реализацийы фæрцы нæ бæстæйы экономикæйы æнтыстджын рæзтæн, экономикæйы реалон фадыгæн, æнæхъæнæй йæ фæрныгады æмвæзад фæбæрзонддæр кæнынæн  лæвæрд æрцыд импульс, – банысан кодта уый.  Уæрæсейаг фарсы ‘рдыгæй æппæт фæндæттæн мах ссардтам оптималон уынаффæ. Æмæ афтæ нымайынæн ис бындур, зæгъгæ, дарддæр дæр Æхсæнхицауадон къамисы фæлгæтты æмгуысткæнынад уыдзæн эффективон».

РХИ-йы Президент æмæ Хицауады пресс-службæ

Comments are closed, but trackbacks and pingbacks are open.