Бæлас æрмæст хъæды нæ фидауы. Уый садзынц горæты дæр æмæ ахъаз кæны уæлдæфы сыгъдæгдзинадæн, æхцондзинад фæисæм йæ быны аууоны цæугæйæ.  Нӕ горӕты дæр раздӕр азты сагъд ӕрцыдысты алыгъуызон бӕлӕстӕ ӕмӕ  абон дæр нæ горæты рæсугъддзинадмæ æфтауынц рæсугъддзинад. Фӕлӕ алцӕмӕ дӕр фӕхъӕуы хъус дарын, рӕстӕгӕй рӕстӕгмӕ зилын, ӕмӕ уыцы хъуыддаг та рох нӕу нӕ горӕты хӕрзарӕзтады комбинаты разамонджытӕ ӕмӕ кусджытӕй. Кӕд зымӕг нæма фæци, уӕддӕр хъарм бонтӕ кӕны æмæ уый фадат дӕтты бӕлӕсты хус ӕмӕ уӕлдай къалиутӕ бахсӕдынӕн. Ахӕм куыстмӕ ӕрӕвнӕлдтой мӕйы размӕ ӕмӕ уал сын бантыст Октябры, Сталины ӕмӕ Лужковы уынгты бӕлӕстӕ ӕмӕ декоративон зайӕгойтӕм базилын. Цы бон сæ бабæрæг кодтам, уыцы бон дӕр дзы ӕмӕзмӕлд кодтой 25 адӕймаджы бӕрц, сӕ иутӕ лыг кодтой уӕлдай къалиутӕ, иннӕтӕ та сӕ ӕвгӕдтой уӕзласӕн машинӕмӕ. Кусджыты змӕлдмӕ йӕ хъус лӕмбынӕг дардта ӕмӕ сын ӕмбӕлон амындтӕ лæвæрдта декоратор Къӕбулты Зауыр. Уый куыд радзырдта, уымӕ гӕсгӕ ӕхсӕдын стыр ахъаз у бӕлӕсты рӕзынӕн, цӕмӕй сыл алырдыгӕй дӕр хуры тынтӕ ныдзӕвой. Сӕ хӕстӕ зӕрдиагӕй ӕххӕст кодтой Гӕбӕраты Толик, Цхуырбаты Нугзар, Къацты Ботаз, Цхуырбаты Лианӕ, Тасойты Циури, Битеты Серги, Гуыцмӕзты Джемал, Бестауты Важа, Хъуылымбегты Алик ӕмӕ ӕндӕртӕ.

Хуыбиаты Никъала

Comments are closed, but trackbacks and pingbacks are open.