20 июны Хуссар Ирыстон æрымысы, Гуырдзыстон 1920 азы ирон адæмы ныхмæ цы геноцид сарæзта, уый амæттæгты нæмттæ. Уыцы æнæадæймагадон фыдракæндты амæттæгтæ баисты мингай ирæттæ, мингæйттæ та систы лигъдæттæ, бирæтæ фесты æбæрæг сæфт.

Бирæ фыдракæндтæ арæзтой йæ рæстæджы гуырдзиаг лæгхортæ ирон адæмы ныхмæ – уæд 13 коммунарæн ингæн скъахын кодтой æмæ сæ уым баныгæдтой, Ереды хъæуы 12 бæлццоны баныгæдтой удæгасæй, Зары фæндагыл сабырцæрæг лигъдæтты сухты цагъд ныккодтой… æмæ сын чи фæнымайдзæн сæ сырдон фыдмитæ ирон адæмы ныхмæ.

Гуырдзиаг меньшевикты къухæй 20 июны 1920 азы цы 13 коммунары æрцыд мард, уыдон ном ары-ны цытæн ацы аз дæр 20 июны Згъудеры уæлмæрдмæ сæ иумиаг цырты размæ æрбацыдысты бæстæйы сæргълæууæг Гаглойты Алан, республикæйы министрадтæ æмæ уагдæтты сæргълæуджытæ æмæ æхсæнады минæвæрттæ.

Мадзалы хайадисджытæ веноктæ æмæ дидинджытæ сæвæрдтой ирон адæмы ныхмæ геноциды амæттæгты ном арыны боны цытæн 13 коммунары цырты раз.

Бæстæйы сæргълæууæг бузныг загъта, ирон адæмы геноциды амæттæгты ном ссарынмæ чи æрбацыд, уыдонæн се ‘ппæтæн дæр.  Банысан кодта, ирон адæмы историйы бирæ мысæн бонтæ кæй ис.

«Абон мах ардæм æрбамбырд стæм, цæмæй ссарæм гуырдзиаг удхортæ цы 13 коммунары фехстой, уыдон рухс нæмттæ. Махæн нæй бар æмæ рох кæнæм уыцы адæмы. Мах хъуамæ нæ хъайтарты сгуыхтдзинæдтæ дзурæм нæ фæдонтæн æмæ ма рох кæной уыдон хъæбатырдзинæдтæ», – дзырдта бæстæйы сæргълæууæг.

Уый бахæс кодта горæты администрацийæн, цæмæй Стыр Фыдыбæстæйон хæсты ветеранты ингæнтæ æмæ 13 коммунары цырт æмбæлон уагмæ конд æрцæуой.

Æртындæс цæхæрцæст коммунар хæстоны уыдысты: Уалыты Данел æмæ Никъала, Цхуырбаты Кышыл, Котолиты Никъала, Джиоты Андри, Ходты Пашка, Гобозты Соскъо, Тедеты Иван, Цхуырбаты Тотыр, Дзеранты Буту, Джиголаты Резо æмæ Сашæ, Куымæридтаты Гиго.

Comments are closed, but trackbacks and pingbacks are open.