8-æм сентябры Цхинвалы банысан кодтой, йæ ном дардыл кæмæн айхъуыст, уыцы номдзыд ирон композитор, фольклорист, Хуссар Ирыстоны гимны автор Æлборты Феликсы юбилейон изæр «Чарующий музыкальный мир Феликса Алборова», зæгъгæ, ахæм номимæ. Мысæн мадзал сорганизаци кодта РХИ-йы Культурæйы министрад.

Зындгонд композитор ацы аз 8-æм сентябры банысан кодтаид йæ 85 азы юбилей, фæлæ уый ныр, хъыгагæн, не ‘хсæн нал ис æмæ йын хуссарирыстойнаг дзыллæйад ары йæ рухс ном.

Юбилейон мысæн изæры хайад райстой хуссарирыстойнаг музыканттæ, аивадиртасджытæ, афтæ ма Æлборты Феликсы аивадæн чи табу кæны, æппæт уыдон. Мадзал бацæуæн ныхасæй байгом кодта Республикæ Хуссар Ирыстоны Культурæйы министр Зассеты Жаннæ. Уый йæ раныхасы, фыццаджыдæр банысан кодта Æлборты Феликсы стыр курдиат. «Æлборты Феликсы курдиатджын композитор уый тыххæй нæ рахуыдтон, æмæ не ‘мзæххон кæй у, фæлæ æцæгæйдæр йе сфæлдыстад, йæ музыкæ у тынг аив æмæ кæлæнгæнæг кæй хонынц, ахæм кæй у, уый тыххæй. Æлборты Феликс цард мах рæстæджы æмæ йæ кæй зыдтам, уый тыххæй абон стæм сæрыстыр. Абон уый махæн у сæрæгас, уымæн æмæ йе ‘нæмæлгæ музыкæ цæры немæ, уымӕн æмæ йын йе сфæлдыстад ахуыр кæнынц нæ фæсивæд. Бирæ ис дзурæн ацы курдиатджын æмæ хорз адæймагыл, кæцы махæн ныууагъта сфæлдыстадон æргъадтæ. Мах нæхи хъуамæ нымайæм амондджынтыл, ахæм композитор, не ‘мзæххон, ирон лæг кæй уыдис, уый тыххæй», – загъта Зассеты Жаннæ.

Юбилейон изæры æрæмбырдуæвджытæй бирæтæ сæ мысинæгты дзырдтой зындгонд композиторы цард æмæ сфæлдыстады тыххæй, ансамбль «Симд»-ы, йæ куысты тыххæй , цавæр æнтыстытæ йын уыд, йæ уацмыстæ куыд гуырдысты, куыд гоймаг, афтæ цахæм уы-дис æмæ йын абон куыд кад кæнынц йæ рухс номæн, æп-пæт уыдæтты тыххæй.

«Æз чысылæй зыдтон, кæй хъуамæ суон музыкант, уымæн æмæ йæ хатыдтæн, музыкæ куы ныууадзон, уæддӕр мæ музыкæ йæхæдæг кæй никуы ныууагътаид», – дзырдта кæддæр Æлборты Феликс йæхæдæг.

Æлборты Феликсы рæстæджы паддзахадон ансамбль «Симд»-ы чи кафыд, уыдонæй сæ иу Гаглойты Венерæ дæр йæ мысинæгты радзырдта, Феликс сын уæд тынг хорз аивадон къухдариуæггæнæг æмæ сæйраг дирижер кæй уыдис, уый. «Æлборты Феликсы æз тынг хорз хъуыды кæнын. Уый уыдис æцæг хорз лæг æмæ къухдариуæггæнæг. Никуы никæй фæхъыг кодта дзыхы ныхасæй, алкæмæ дæр дардта хъарм ахаст, уарзта йæ куыст æмæ йын уыдис стыр æнтыстытæ. Уымæ гæсгæ махæн Феликс у æнæмæлгæ, кæддæриддæр ын хъуыды кæндзыстæм йæ рухс ном», – банысан кодта Гаглойты чызг.

Æлборты Феликсы номыл Цхинвалы музыкалон ахуыргæнæндоны директор Гæджиты Жаннæ дæр йæ раныхасы банысан кодта, абоны онг дæр сæ ахуыргæнæндоны кæй зыны, Феликс йæ фæстæ цы кад æмæ фарн ныууагъта, уыцы атмосферæ. «Феликс гениалон у йæ музыкæйæ, кæцыйæ стæм сæрыстыр. Уый ма æмбырд кодта адæмон сфæлдыстад, уыд хорз рацаразæг – абон æй схуыдтаиккой дæсны аранжировщик», – загъта Цхинвалы музыкалон ахуыргæнæндоны директор.

Æлборты Феликсы стыр курдиаты тыххæй ма сæ хъуыдытæ телефонон бастдзинады руаджы загътой зындгонд композитор Магкоты Ацæмæз æмæ йе ‘мкъласон Хуссар Ирыстоны автономон областы компартийы фыццаг нымæрдар Санахъоты Феликс, кæцытæ банысан кодтой, зæгъгæ, Ӕлботы Феликс у Ирыстоны символ. Дарддæр мадзалы айзæлдысты Æлборты Феликсы фыст музыкæйы зæлтæ, кæцыты сæххæст кодта Адæмон инструментты паддзахадон оркестр «Айзæлд».

ЦХУЫРБАТЫ Ларисæ

Comments are closed, but trackbacks and pingbacks are open.