«Культурæйы бонтæ Европæйы» байгом Брюсселы тымбыл фынгæй. «Æмкуысткæнынады хидтæ», зæгъгæ, ахæм темæйыл æруынаффæ кодтой Ирыстоны æмæ Европæйы бæстæты сфæлдыстадон интеллигенцийы минæвæрттæ.
Тымбыл фынджы куысты хайад райстой Уæрæсейаг культурон центры директор Брюсселы Александр Разумов, Ирыстонæй ардæм æрцæуæг нывгæнджытæ æмæ диаспорæты минæвæрттæ, кæцытæ цæрынц Европæйы æндæр æмæ æндæр бæстæты, уæлдайдæр та Голланди æмæ Бельгийы, — уый тыххæй нæ уацхæссæгæн фехъусын кодта Дунеон æнæкоммерцион ассоциаци «Renaissance-Sandidzan»-ы къухдариуæггæнæг Пухаты Радион.
Тымбыл фынджы фарсмæ уынаффæ цыдис ирон культурæ æмæ Ирыстоны æгасæйдæр популяризаци кæныны фарстатыл, афтæ ма нырыккон дунейы ирон культурæйы роль æмæ бынатыл.
«Тымбыл фынджы куысты фæстиуджытæм гæсгæ райст æрцыд резолюци, цыран дискуссийы хайадисджытæ сидынц Хуссар æмæ Цæгат Ирыстоны Хицауадтæм, цæмæй активондæрæй æххуыс кæной нæ мадзæлттæн. Бафæндит нæ, цæмæй официалон адæймæгтæ дæр хайад исой нæ тымбыл фынгты æмæ æндæр мадзæлтты», — банысан кодта Пухаты Радион.
Уый куыд загъта, афтæмæй Хуссар Ирыстоны Президент Тыбылты Леонид хæцы, ассоциаци «Renaissance-Sandidzan» регулярон æгъдауæй кæй уадзы, уыцы мадзæлтты æвварс. Æмæ йын уый тыххæй зæгъы уæлдай бузныг.
Пухаты Радионы ныхæстæм гæсгæ «Ирон культурæйы бонтæ Европæйы» ацыдысты Европæйы 9 бæстæйы æмæ 15 горæты, фæлæ уæддæр уый æфсон нæу ууыл æрлæууынæн æмæ сæ фæнды, цæмæй хъуыды кæной сæ куысты ног гæнæнтыл æмæ цымыдисон перспективæтыл. Уæлдайдæр та уымæн æмæ æмгуысткæнынады тыххæй фæндæттæ райсынц, куыд европæйаг минæвæртты ’рдыгæй, афтæ ирон сфæлдыстадон архайджыты ’рдыгæй дæр.
«Вæййы тынг бирæ инициативæтæ æмгуысткæнынады тыххæй, коммерционтæй райдайгæйæ æмæ культурон æмæ спортивон къабæзтыл фæугæйæ. Уый тыххæй уагъд цæуынц гом дискусситæ дæр, цæмæй уа интерактивон уынаффæкæнынад хъуыддæгтыл æмæ нысан æрцæуой фидæны плантæ», — загъта Пухайы фырт.
Тымбыл фынджы фæстæ байгом равдыст. Пухаты Радион куыд банысан кодта, афтæмæй равдыст уазджытыл тынг бандæвта, уымæн æмæ дзы æвдыст æрцыдысты хуызфыссынады алыгъуызон здæхтытæ. Хуызфыссынад æмæ графикæ æвдыст æрцыдысты нывгæнджытæ Тогъуызты Игорь, Плиты Таймураз, Куымæридтаты Аркади, Ататы Валери, Цæллагæты Виктор, Хъæцмæзты Каринæ æмæ Цæллагæты Фатимæйы куыстыты.
«Бельгийы ирон диаспорæйы кадджын хистæр минæвар Бзаты Алик ракуывта традицион куывд ирон æвзагыл, йæ разы æртæ уæлибых, афтæмæй. Уый кæддæриддæр стыр æнкъарæнтæ сæвзæрын кæны, куыд уазджытæм, афтæ равдысты хайадисджытæм дæр», — банысан кодта Пухаты Радион.
Ассоциацийы къухдариуæггæнæг ма радзырдта, зæгъгæ, 14 майы уыдис стыр концерт æмæ химæрайст Стыр Уæлахизы цытæн, цыран уыдысты нæ нывгæнджытæ дæр. Ацы мадзæлттæ, равдыст кæм уыдис, уым кæй цыдысты, уымæ гæсгæ нæ нывгæнджытæм уыдис уæлдай стырдæр хъусдард æмæ райстой бирæ арфæйы ныхæстæ.
15 майы Бельгийы ирон диаспорæйы минæвæрттæ банысан кодтой Ирон æвзаг æмæ литературæйы бон дæр. Ацы бон, райгуырæн бæстæйæ дард чи цæрынц, уыцы æмфыдыбæстæйонтæ Ирыстонæй нывгæнджыты хайадистæй кастысты ирон зындгонд поэтты æмдзæвгæтæ ирон æвзагыл.
Ныртæккæ ирыстойнаг уазджытæ æхцондзинад исынц европæйаг горæтты уындæй, зонгæ кæнынц европæйаг культурæимæ. План цæуы музейтæ æмæ Бельгийы æндæр фенддаг бынæттæм бацæуын.
Тагъд мадзæлтты бынат ахиздзæн Люксембург æмæ Францмæ. «Ирон культурæйы бонтæ Европæйы» кæронбæттæн этап уагъд æрцæудзæн 1-5 июны Германы сæйраг горæт Берлины.
Республикæ Хуссар Ирыстоны информацион портал
Comments are closed, but trackbacks and pingbacks are open.