Чиныджы тых егъау у, уымæн æй хонынц зонындзинæдты суадон æмæ йыл абоны бон дæр иузæрдион сты йæ табугæнджытæ. Раст у, ныры дуджы бирæ сты, адæймаг хъæуæг информаци кæцæй райса, цы бакæса æмæ базона, ахæм алыгъуызон фæрæзтæ, уыдон, фæлæ уæддæр чиныджы ахадындзинад æмæ нысаниуæг бынтон æндæр у.
Цхинвалы районы Культурæйы управленийы дæлбары ис 13 хъæууон æмæ иу та централон библиотекæйы æмæ сæ алчи дæр йæ уавæртæ æмæ фадæттæм гæсгæ архайы чиныгкæсджытæн хуыздæр балæггад кæныныл. Нæ ныхасы сæр у централон библиотекæйы куысты тыххæй. Раздæр азты ацы культурæйы артдзæст уæвынад кодта Ереды хъæуы, фæлæ йæ куыст æрлæууыд, гуырдзиаг хотыхджынтæ Хуссар Ирыстонмæ куы æрбабырстой, уæд. Иугæр нæ райгуырæн къуымы сабырад куы æрфидар, уæд Культурæйы управленийы разамынад ахъуыды кодта, ацы библиотекæ æндæр ранмæ аивыныл. Цасдæр рæстæгмæ уымæн нæ уыд сæрмагонд бынат æмæ уæд управленийы хистæр Гаглойты Ростислав хуыздæрæн разæрста Ногхъæу, æрбаластой йæм чингуытæ æмæ къонагай æфснайд уыдысты уыцы ран. Ивгъуыд аз дзы бакодтой арæзтадон-цалцæггæнæн куыстытæ æмæ йæ кусджытæ Хъазиты Маринæ, Челехсаты Мая, Икъоты Ритæ, Козаты Ритæ æмæ библиотекæйы директор Уалыты Нанули ныр зæрдиагæй бавнæлдтой чингуытæ æрбæстон кæнынмæ. Бæрæг кæныны рæстæджы дæр дзы уыдысты дыууæ сылгоймаджы æмæ чингуытæн сыгъдæг кодтой сæ рыгтæ. Æмбæлон уагмæ цы чингуыты æркодтой, уыдон уал алфавитмæ гæсгæ равæрдтой тæрхджытыл. Уымæй дарддæр ма инвентаризаци кæнынц сæ чингуыты, бирæ дзы фесæфт 2008-æм азы дæр. Библиотекæйы сæргълæууæг Уалыты Нанули куыд загъта, уымæ гæсгæ сæ чингуыты нымæц хæццæ кæны 41109 экземплярмæ, сты ирон æмæ уырыссаг литературæ. Уый ма бафиппайдта, ирон чингуытæ сæм цъус кæй ис, уæлдайдæр та – ирон классикты чингуытæ, афтæмæй та сæ кæсджытæ фæагурынц æхсызгонæй. Чиныгкæсджытæ чингуытæ ахæссынц, управленийы бæстыхайы цур сын цы дыууæ хатæны ис, уырдыгæй, уым цы чиныг нæ разыны, уый та бацагурынц ног бæстыхайы æмæ афтæмæй йæ къух саразынц кæсæгæн.
Библиотекæйы кусджытæн æнгом бастдзинæдтæ ис районы хъæууон библиотекæты кусджытимæ, бакæнынц сын методикон æххуыс, куы бахъæуы, уæд сæм фæкæсынц мадзæлттæ бацæттæ кæнынæй. Сæхæдæг дæр фæстæ нæ лæууынц. Сæ ацы азы куысты плæнттæ дæр къаддæр не сты æмæ сæ бацæттæ кæныныл куытæуы ныридæгæн. Сæ зæрды ис Ирыстоны зынгзæрдæ патриот, йæ радтæг адæмы иузæрдион хъæбул Икъаты Владимиры цард æмæ сфæлдыстады тыххæй литературон мадзал Дменисы хъæуы ауадзын. Ахæм номарæн мадзал ма хъуамæ бацæттæ кæной курдиатджын прозаик Гуыцмæзты Алешы тыххæй дæр æмæ йæ ауадздзысты Джер кæнæ йæ райгуырæн Ортъеуы хъæуы. Афтæ ма 15-æм майы Ирон æвзаджы боны тыххæй дæр ауадздзысты мадзал. Иудзырдæй, ацы куыстуарзаг сылгоймæгтæ уарзынц сæ куыст, ис сæм куыст фæхъæздыгдæр кæныны тыххæй бирæ хорз фæндтæ æмæ сæ æххæст дæр кæндзысты сæ кæсджыты хæрзиуæгæн.
Хуыбиаты Никъала
Comments are closed, but trackbacks and pingbacks are open.