РХИ-йы Президент Бибылты Анатолийы официалон балц Республикæ Сербимæ

 

Куыд ма хъусын кодтам, афтæмæй РХИ-йы Президент Бибылты Анатоли официалон балцы ис Республикæ Сербийы. Республикæ Сербийы столицæ Баня-Лукы аэропорты Хуссар Ирыстоны делегацийыл фембæлд Сербийы экономикон ахастыты æмæ регионалон æмгуыстады министр Златан Клокич.

Хуссар Ирыстоны делегацийы сконды сты РХИ-йы Президенты Администрацийы къухдариуæггæнæг Козаты Игорь, Фæсарæйнаг хъуыддæгты министр Медойты Димитр æмæ Фæсарæй-наг хъуыддæгты министры уынаффæгæнæг Уалыты Гела.

Бон раздæр 8 январы Бибылты Анатоли уыд горæт Белграды.

Воеводины автономон крайы горæт Нови-Сады Хуссар Ирыстоны официалон делегаци бабæрæг кодта Сыгъдæг Георгийы аргъуан – Сербийы Бачскаг епархийы чырыстон аргъуаны кафедралон галуан.

РХИ-йы Президент фембæлд Бачскаг епископ Иренеимæ. Бибылты Анатоли епископæн раарфæ кодта Цыппурсы бæрæгбоны цытæн æмæ йын йæ цæст бауарзта Хуыцауы æххуыс йæ куысты.

Фембæлды рæстæджы ныхас цыд иумæйаг чырыстон æргъадтæ бахъахъхъæныны проблемæтыл. Нысан æрцыд, паддзахадтæ иумæйагæй æмæ дины иугæндтæ кæй  хъуамæ архайой хæрзнамысы проблемæтыл æмæ монон къабазы цы тæссагдзинад ис, уый цæуа иуварсгонд.

Хуссарирыстойнаг делегаци ма бабæрæг кодта сыгъдæг архангелтæ Михаил æмæ Гавриллы Моладзандон.

* * *

РХИ-йы Президент Бибылты Анатоли хайад исы, Республикæ Сербийы боны цытæн цы мадзæлттæ уагъд цæуынц, уыдоны.

Цытджын парады трибунæйы уæвæг Республикæ Сербийы хицауад æмæ уазджыты раз цытджын æгъдауæй рацыдысты тыхон ведомствоты дæлхæйттæ æмæ ветерантæ. Афтæ ма бæрæгбонон демонстрацийы хайад истой Баня-Лукы æмбæстæгтæ, республикæйы районты минæвæрттæ, студенттæ, спортсментæ.

Уый фæстæ нæ Республикæйы Президент фембæлд Республикæ Сербийы Президент Милорад  Додикимæ. Бибылты Анатоли раарфæ кодта Милорд Додикæн бæрæгбоны цытæн.

«Махæн тынг æхсызгон у, Республикæ Сербимæ кæй æрцыдыстæм уæ бæрæгбоны. Хуссар Ирыстоны делегацийы номæй уын арфæ кæнын уæ Республикæйы боны цытæн æмæ уын мæ цæст уарзы сабырдзинад æмæ хорз сомбон», – загъта Бибылты Анатоли.

Милорад Додик йæ рады банысан кодта, зæгъгæ, Республикæ Сербийæн ахсджиаг у Хуссар Ирыстоны Президенты æрцыд. Ныр райрæздзысты нæ хæларадон ахастытæ».

* * *

Республикæ Хуссар Ирыстон æмæ Республикæ Серби къухтæ æрфыстой æмгуыстады тыххæй Сразыдзинадыл. Президенттæ Бибылты Анатоли æмæ Милорад Додикы хайадистæй документтыл сæ къухтæ æрфыстой РХИ-йы Фæсарæйнаг хъуыддæгты министр Медойты Димитр æмæ Экономикон ахастыты æмæ регионалон æмгуыстады министр Златан Клокич.

Къухтæ цы документыл æрфыстой, уымæ гæсгæ фæрстæ хæсджын цæуынц инициативæтæ сæххæст кæныны тыххæй æмгуыстад кæнын, кæцытæ дзуапп дæттынц дыууæ паддзахады интерестæн æмæ здæхт сты экономикæйы, сæрмагондæй хъæууон хæдзарады æмæ туризмы, спорт æмæ æндæр фадгуыты æмгуыстад кæнынмæ.

Æмгуыстады организаци æмæ ацы Сразыдзинады реализацийы нысæнттæн арæзт æрцыд кусæгон къорд дыууæ фарсы минæвæрттæй.

Президентты хайадистæй ма къухтæ фыст æрцыдысты республикон политикон парти «Иугонд Ирыстон» æмæ Сербийы Хæдбар социал-демократты цæдисы ‘хсæн æмгуыстады тыххæй Сразыдзинадыл. Документтыл къухтæ æрфыстой РХИ-йы Президенты Администрацийы къухдариуæггæнæг Козаты Игорь (республикон-политикон парти «Иугонд Ирыстон»-ы Сæрдар Тадтаты Аланы æууæнк-мæ гæсгæ) æмæ Хæдбар социал-демократты цæдисы политсоветы сæрдар Славко Митрович (Республикæ Сербийы Президент Милорад Додикы æууæнкмæ гæсгæ).

Бибылты Анатоли æмæ Милорад Додикы официалон фембæлды рæстæ-джы банысанчындæуыд дыууæ республикæты ‘хсæн æппæтфарсон ахастытæ рæзын кæныны тыххæй.

Къухтæ фыст цы документтыл æрцыдысты, уыдон сты дарддæры куысты бындур. «Нæ фембæлды фæстæ æмгуыстад райсдзæн ног план, ног импульс конкретон ахастыты алыгъуызон нормæтæн», – загъта Республикæ Сербийы сæргълæууæг.

Йæ рады Хуссар Ирыстоны Президент Бибылты Анатоли банысан кодта, зæгъгæ, Республикæ Сербимæ йæ визит баст у уыцы баныхæстимæ, кæцытæ къухты бафтыдысты  ивгъуыд аз июны мæйы Санкт-Петербурджы Бибылты Анатоли æмæ Милорад Додикы фыццаг фембæлды рæстæджы. «Æмахастыты рæзты æппæт гæнæнтæ дæр уæрæх сты æмæ мах фæнд кæнæм алыгъуызон здæхтыты кусын», – загъта Бибылты Анатоли.

Президент йæ коллегæйæн фехъусын кодта æмгуыстад æрнывыл кæныны фæдыл Республикæ Сербийы Республикæ Хуссар Ирыстоны минæвар снысан кæныны тыххæй. Мах фæндид, цæмæй Уалыты Гела æвдиса ам Хуссар Ирыстоны. Уый йæхæдæг у Хуссар Ирыстонæй, зоны Республикæ Сербийы, уымæн ам бирæ хæлæрттæ ис æмæ æз хъуыды кæнын, уый кæй суыдзæн нæ ахастыты хорз æхсæны лæг», – банысан кодта Бибылты Анатоли.

Бибылты Анатоли Милорад Додикы фæхуыдта Хуссар Ирыстонмæ 2018 азы августы мæйы, уæд республикæ нысан кæндзæн, Уæрæсейы Федераци Хуссар Ирыстоны хæдбардзинад куы банымадта, уыцы боныл 10 азы сæххæсты бæрæгбон.

РХИ-йы Президент Бибылты Анатолийы официалон балц Республикæ Сербимæ аххæсдзæн 13 январы онг.

Comments are closed, but trackbacks and pingbacks are open.