Ацы бонты та Цæгат Кавказы хæххон-металлургон институт радон хатт кадджын уавæры фæндараст загъта йæ хуыздæр студенттæн Но-рильскмæ, практикон зонындзинæдтæ райсынмæ. Норильскы никелы комбинаты Ирыстоны минæвæрттæ хъуамæ хъазуатонæй бакусой, ба-зонгæ уой нырыккон технологитимæ, райсой практикон фæлтæрддзинад, нæ республикæйы кад бæрзонд хæссой.
Ацы аз æрмæст уæлдæр амынд институтæй нæ ацыдысты, фæлæ йæ дæсныйад металлургиимæ баст кæмæн у, уыцы иннæ ахуыргæнæндæттæй дæр: хъæууон хæдзарадон институтæй, æфсæнвæндаджы, электронон, арæзтадон æмæ политехникон колледжтæй – æдæппæт 504 студенты.
Советон дугæй нырмæ студентты арæзтадон къордтæ цæттæ кæныны фæтк хæлд не ‘рцыд. Кæмдæриддæр æмæ кæддæриддæр ирыстойнæгтæ вæййынц хуыздæрты æмрæнхъ.
Студент Биганаты Зелим куыд радзырдта, афтæмæй цæуы дыккаг хатт. Бынаты сыл сæмбæлынц тынг æхсызгонæй. Сæхи дæсныйадæй уæлдай ацæуынц уæлæмхасæн ахуыртæ, раттынц сын специалистты разрядтæ. Ифтонг сæ кæнынц цæрæнуат, хæлц æмæ хорз мыздæй. Уыцы æнкъарæнтæ сты æнæферохгæнгæ.
Бафиппайын хъæуы уый æмæ нæ лæппутæн стыр кад кæй ис дунейыл зындгонд компани «Норильский Никель»-ы куыстуаты. Уы-мæн æвдисæн, цы бирæ арфæйы фыстæджытæ æрцæуы уырдыгæй ардæм, уый.
Студенттæ Норильскмæ фæцæуынц практикæ кæнынмæ, фылдæр зонындзинæдтæ райсынмæ, стæй сæ ахуырмæ ‘рыздæхынц. Фæлæ, сæ бон у, диплом райсыны фæстæ, бынтондæр сæ хъысмæт сбæдтой дард Норильскы зындгонд компаниимæ æмæ кусгæйæ баззайой уым. Уый тыххæй сын куыстуаты дуæрттæ кæддæриддæр сты гом.
МЕДИЦИНÆЙЫ КЪАБАЗМÆ – ФЫЛДÆР ÆРГОМ
Æрæджы хицауады цы æмбырд уыд, уым боны фæткы сæйраг фарста уыд медицинæйы къабаз. Архайдтой дзы Хицауады уæнгтæ, муниципалон скондты разамонджытæ, структурон ведомствотæ.
Бæрæг куыд у, афтæмæй республикæйы Сæргълæууæг Сергей Меняйло, æрæджы Сочийы форумы уæвгæйæ, æмгуыстады бадзырд бафыста Новгороды медицинон мобилон комплексы компанийы сæргълæууæг Юрий Протасовимæ. Уый фæлгæтты Стыр Новгородæй æрцыд цæлхытыл поликлиникæ алыхуызон специалисттимæ, зилдзæн дæрддзæф хъæутыл æмæ лæвар лæггад кæндзæн адæмæн. Ныртæккæ уал йæ куыст райдыдта Михайловскы хъæуæй. Уым бафæстиат уыдзæн дыууæ къуырийы æмæ дарддæр ацæудзæн æндæр хъæутæм. Цæугæ поликлиникæ ам кусдзæн афæдзы кæронмæ.
Республикæйы разамонæг куыд бафиппайдта, афтæмæй ацы проект уыд æнæмæнгхъæугæ, уымæн æмæ дæрддзæф хъæуты цæрджытæн зын у горæтмæ цæуын дохтыртæм, арæх сæ сæ къух нæ амоны. Куыд ма фæнысан кодта, афтæмæй иннæ аз йæ зæрды ис нæхи республикæйæн дæр ахæм медицинон комплексы машинæтæ самал кæнын.
Ныхас ма цыд, цæмæй профилон ведомствоты разамонджытæ фылдæр æргом аздахой республикæйы медицинон кусæндæттæ туаггуырæй æфсадыны фарстамæ. Кæд ковидæй рынчынтæ афтæ арæх нал сты, уæддæр туаггуыр рынчындоны кæддæриддæр бахъæ-уы. Сергей Меняйло куыд банысан кодта, афтæмæй хæстæгдæр рæс-тæджы азилдзæн æппæт медицинон уагдæттыл æмæ сбæрæг кæн-дзæн, алы ран дæр туаггуыры хи станцæ ис æви нæ, уый.
Профилон министрады разамынды æргом сæрмагондæй здæхт æрцыд медицинон къабазы кусджытæн мызд фидыны фарстамæ. Республикæйы разамонæг ведомствæйы бæрнон кусджытæн бахæс кодта, цæмæй æркæсой, иннæ регионты уыцы фарста куыд лыггонд цæуы, уымæ. «Мæнмæ гæсгæ, медицинон кусджытæн мызд фидыны хъуыддаджы ис аиппытæ. Дохтыртæн уæлæмхасæн мызд фидынц сæ профессион дæсныйад æмæ фæлтæрддзинады, стæй стажы тыххæй. Æнæниздзинады къабазы кусджытæн хъуамæ уа аккаг мызд. Уый хауы медицинæйы алы къæпхæны кусджытæм дæр». – Загъта Сергей Меняйло.
Уый ма куыд фæбæрæг кодта, афтæмæй фылдæр æргом раздахын хъæуы адæмы куырдиæттæм. Республикæйы разамонæг йæ администрацийы сæргълæууæгæн бахæс кодта, цæмæй фæнывылдæр кæна адæмы куырдиæттимæ куысты фæтк.
Иннæ фарста – æххуысхъуаг адæмæн хостæ дæттын. Рынчын адæмæн æвæстиатæй æмæ æххæстæй лæвæрд хъуамæ цæуой хъæугæ хостæ. Сæрмагонд æргом аздахын хъæуы, дæрддзæф цæрæн бынæттæм хостæ куыд хæццæ кæнынц, уыцы фарстамæ дæр.
Ныхас ма цыд онкологон рынчынты бартæ хъахъхъæныныл, медицинон лæггæдты конституцион бартыл, санаторион – курортон дзæбæхгæнæндæтты юридикон фарстатыл æмæ бирæ æндæр ахсджиаг хъуыддæгтыл.
Нæ уацх.
Comments are closed, but trackbacks and pingbacks are open.