3-æм августы Уанеты Захары номыл ХИЗИИ-йы директор, РХИ-йы зонæдты сгуыхт архайæг, Дунеон æхсæнадон змæлд «Иры Стыр Ныхас»-ы Хуссар Ирыстоны регионалон хайады сæрдар, Гаглойты Роберт Хазбийы фырт банысан кодта йæ 70 азы юбилей.
Гаглойты Роберт (Руслан) Хазбийы фырт у зынгæ ахуыргонд-археолог, историон зонæдты кандидат. Хетæгкаты Къостайы номыл паддзахадон премийы лауреат. У 73 зонадон куысты автор, уыцы нымæцы 6 монографи «Стырфазский могильник», «Южная Осетия и античный мир в I-IV вв. н. э.», «Монастерский могильник I-IV вв. н.э.», «Культы верования населения Южной Осетии I-IV вв. н.э», «Памятники археологии Цхинвальского района Южной Осетии», «Прикладное искусство населения Южной Осетии в I-IV вв. н.э.».
Гаглойты Роберт æрмæст зонадон куыстытæ нæ кæны. Дзыллон информацийы фæрæзты нымыхуыр кодта 90 уацы бæрц. Арæх райсы хайад канд республикæйы фæлгæтты æмæ æхсæ-надæмон конференциты, нæ, фæлæ ма Уæрæсейы стыр зонадон симпозиумты дæр. Куыд, зæгъæм; Мæскуы, Санкт-Петербург, Киев, Краснодар, Налцык, Баку, Тбилис, Ереван, Сухум, Махачкала, Болгари, Турк, АИШ, Испани æмæ а.д.
Гаглойты Роберт райгуырд 1946 азы горæт Сталиниры. Астæуккаг ахуыр райста 2-æм скъолайы. Уый фæстæ ахуыр кæнынмæ бацыд Хуссар Ирыстоны паддзахадон пединституты историон-филологон факультетмæ. 1969-70 азты йе ‘мбæстагон хæс бафыста Советон æфсады рæнхъыты баслужбæгæнгæйæ.
1973 азы ахуыр кæнынмæ бацыд Гуырдзыстоны И. Джавахишвилийы номыл археологи æмæ этнографийы аспирантурæмæ. Ам райста археологийы дæсныйад. 1977 азы та бахъахъ-хъæдта кандидатон диссертаци ахæм темæйæ «Культура населения бассейна реки Большая Лиахва в I-IV вв. н.э.».
Гаглойты Робертæн бантыст раиртасын 37 зæппадзы, астæуккаг æнусы антикон æмæ бронзæйон эпохæйы историйæ. У ма «Культура населения Центрального Кавказа в позднеантично-раннесредневековое время»-йы докторант дæр.
Гаглойты Роберт канд зонадон куыст нæ кæны. Уый æрвылхатт дæр цæттæ вæййы йæ сæр иууыл тынгдæр кæм хъæуы, уыцы фадыджы кусынмæ. 1997 азæй 2002 азмæ куыста РХИ-йы ахуырады министрæй. Уыд 2004 азы æрсидты Парламенты депутат. Ныртæккæ дæр у дунеон æхсæнадон змæлд «Иры Стыр Ныхас»-ы Хуссар Иры хайы сæрдар, РХИ-йы Президенты тæрхон аивыны къамисы хистæр, афтæ ма у Санахъоты Мураты номыл Хуссар Ирыстон æмæ Болгарийы ‘хсæн хæлардзинады æхсæнады сæргълæууæг. Хицауады æххуысæй 2010 азæй фæстæмæ сорганизаци кодта Хуссар Ирыстоны ахуыргæндты балцтæ Болгарийы университетты дунеон зонадон конференцитæм. Йæхæдæг дæр уыд Болгарийы хæларадон фембæлдты бирæ болгараг ахуыргæндтимæ æмæ æхсæнадон архайджытимæ æруынаффæ кодта къорд ахсджиаг фарстытыл.
Уымæй уæлдай Гаглойты Роберт у Цхинвалы администрацийы уынгты нæмттæ фæивыны къамисы уæнг æмæ ма Хетæгкаты Къостайы премийы къамисы уæнг дæр.
Бирæ, тынг бирæ хорзæхтæ æмæ майдантæй хорзæхджын æрцыд Гаглойты Роберт йæ удуæлдай лæггæдты тыххæй. «В ознаменование 10 годовщины РЮО», «В ознаменование 15 годовщины РЮО», «В ознаменование 20 годовщины РЮО», «Во славу Осетии», «В ознаменование 25 годовщины РЮО» æмæ а.д.
Гаглойты Роберт кæд ныртæккæ зонадон куыстыты мидæг ис, уæддæр æй тынг тыхсын кæнынц, ныртæккæ нæ республикæйы цы ивындзинæдтæ æмæ политикон цаутæ цæуы, уыдон. Æрæджы нæ газеты фæрстæй иуы смыхуыр кодта уац «Национ хиæмбарынад куыд нæ адæмы монон хай». Ацы уацы уый лæмбынæг æрдзырдта нæ ив-гъуыд, абон æмæ фидæны рæстæджытыл. Бирæ вазыгджын фарстытæм бавнæлдта æмæ бацамыдта раст фæндæгтæ.
Цытджын Роберт Хазбийы фырт! Ды дæ нæ бæстæйы æцæг патриот, ды дæ размæтырнæг æмæ лæджыхъæдæй хайджын адæймаг! Дæ зонадон куыстытæй дæу зонынц канд Ирыстоны нæ, фæлæ Уæрæсе æмæ æндæр фæсарæйнаг бæстæты зонады минæвæрттæ. Фидарæй нæ уырны, дæ хайадисты фæрцы Республикæ Хуссар Ирыстон æмæ æндæр бæстæты ‘хсæн æмцæдисон ахастытæ дарддæр дæр кæй фидар кæндзысты æмæ рæздзысты æппæт фадгуыты дæр. Мах, газет «Хурзæрин»-ы кусджытæ стыр аргъ кæнæм дæуæн! Нæ зæрдæ дын зæгъы фидар æнæниздзинад, æвидигæ хъарутæ, хæрзиуджытæ æмæ æнтыстытæ дæ Райгуырæн Ирыстоны хæрзиуæгæн, дæ профессионалон архайды.
Уазæгты Марфа
Comments are closed, but trackbacks and pingbacks are open.