Æфсымæр æфсымæрæй у тыхджын, фæзæгъынц. Уый, æцæгдæр, афтæ у, уымæн æмæ æфсымæр йæ мадызæнæджы уæлхъус куы æрбалæууы бахъуыды рæстæджы, уæд ын уый стыр ныфс вæййы, йе ххуысы хай йын бакæны. Афтæ у цард, кæддæриддæр æххуыс хъæуы фæкæсинаг адæймагмæ æмæ уæд уымæн дæр фенцондæр уыдзæн. Йе ххуысы хай æндæртæн чи кæны, ахæм хицæн æмбæстæгтæ, куыстуæттæ æмæ уагдæттæ арæх сты æмæ сæ буц æмæ сæрыстыр стæм сæ иузæрдион архайды тыххæй.

Нæ республикæ æвзонг у, нырма æндидзгæ кæны, алцы йæ къухты æнцонтæй не ‘фты æмæ уæд иуæй-иу коллективтæ, стæй хицæн адæймæгтæ балæууынц йе ‘нцой, бакæнынц ын цæстуарзон æххуыс. Ахæм æфсымæрон æххуыс æрæджы банкъардтой Цхинвалы районы иумиагахуырадон скъолатæ дæр. Зындгонд куыд у, афтæмæй скъолаты нæ фаг кодта ахуыргæнæн чингуытæ хицæн предметтæй, æнæ чиныгæй та ахуыргæнинæгтæ тынг тыхсынц æмæ мæгуырауæрдæм æндавы ахуыры процессыл. Уый тыххæй тынг тыхстысты куыд районы адæмон ахуырады минæвæрттæ, афтæ скъоладзаутæ æмæ сæ ныййарджытæ дæр. Фæлæ алкæцы зындзинадæй дæр ис рахизæн  æмæ  сын уыцы арфæйаг хъуыддаг сæ цæст бауарзта Цæгат Ирыстон-Аланийы цалдæр ахуыргæнæн уагдоны. Цхинвалы районы адæмон ахуырады хайады сæргълæууæг Лолоты Барис куыд загъта, афтæмæй уыцы æфсы-мæрон æххуыс сæйраджыдæр банкъардтой Ногиры фыццæгæм астæуккаг скъолайы коллективæй. Уыдон сын лæвары хуызы æрæрвыстой ахуыргæнæн чин-гуытæ 300 иуæгæй фылдæр, уыцы нымæцы сты физикæ, математикæ, биологи, хими, географи, информатикæ æмæ æндæр предметтæй. Ныртæккæ уыцы чингуытæ адæмон ахуырады минæвæрттæ сæхи рады адих кодтой скъолатыл æмæ фæхæццæ сты бынæттæм. Ахæм æфсымæрон æххуысæй тынг райгондæй баззадысты районы скъолатæ æмæ сæ цæгаттаг коллегæтæн зæгъынц стыр бузныг. Уадз, æмæ æфсымæрон æххуыс æмæ кæрæдзийы уарзондзинадæн макуы уæд фæцудæн, фæлæ ноджыдæр кæнæд тыхджындæр!

Хуыбиаты Н.

Comments are closed, but trackbacks and pingbacks are open.