Ирзонады патриарх ӕмӕ корифей, дунейы иранисттӕн сӕ зынгӕдӕр, не ’мзӕххон, ХХ-ӕм ӕнусы ӕвӕджиауы фарны лӕг, Абайты Вассойы гуырӕнбон у декабры мӕйы 15-ӕм боны.
Вассо йӕ биографийы никуы амыдта йӕ райгуырӕн боны мӕй ӕмӕ нымӕц. Фыста-иу ӕрмӕстдӕр: райгуырдтӕн 1900 азы Къобы хъӕуы. Къобы хъӕумӕ йӕ фыд Абайты Уанкъа ныццыдис Сыбайы хъӕуӕй куыстагур. Уым йӕ цард баиу кодта Дзæхаты рӕсугъд чызг Ниноимӕ. Цы ӕртӕ фырты ӕмӕ сын дыууӕ чызджы райгуырд, уыдон ахуыр кодтой Тбилисы гимназты ӕмӕ уӕлдӕр ахуыргӕнӕндӕтты. Иууыл номдзыддӕр сӕ ссис ӕфсымӕрты кӕстӕр — Вассо.
Йе ʼмдугонтӕй Вассо хицӕн кодта йӕ зонындзинӕдтӕй, йӕ ӕвӕллайгӕ куыстӕй куыд Ирыстоны, Кавказы, Фӕскавказы, Уӕрӕсейы, афтæ фӕсарӕнты дӕр. Уымӕн та ӕвдисӕн сты йӕ зонадон фундаменталон куыстытӕ, уӕлдайдӕр та йӕ «Ирон ӕвзаджы историон-этимологион дзырдуат» 5 томӕй. Ацы дзырдуаты тыххӕй филологон зонӕдты доктор, В. А. Ефимов фидарӕй зӕгъы: «Вне всяких сомнений, Словарь является наивысшим достижением великого ученого и принадлежит к числу… самых выдающихся явлений в филологической науке ХХ столетия».
Абайты Вассо дзӕвгар зонадон хъаугъаты бацӕугӕйӕ, зонадон бындур ӕрӕвӕрдта, Нарты эпос ирӕтты эпос кӕй у, уымӕн дӕр.
Йæ теоретикон куыстытӕй уӕлдай дзырддаг систы йӕ уацтӕ: «О фонетическом законе» — 1932г., «Язык как идеология и язык как техника» — 1934, 1936 гг. «Понятие идеосемантики» — 1946 г. (1948г.). Ацы куыстыты тыххӕй Абайты Вассо ахуыргӕндты ’рдыгӕй ахӕм ӕфхӕрд баййӕфта ӕмӕ йӕ амарынӕй бахъахъхъӕдтой, ӕвӕццӕгӕн, уӕларвон тыхтӕ. Уымӕн ӕмӕ 1950 азы Советон зонады райдыдта репресситы дыккаг этап. Филологийы фарстатӕ баст уыдысты академик. Н. Марры номимӕ. Н. Марр уыдис Вассойы, зонадон фӕндаг амонӕг, хорз адӕймаг ӕмӕ стыр ахуыргонд. Уый та йӕ фатеры дыууӕ хатӕнӕй иуы бакодта зонадон Институт ӕмӕ ӕрӕвнӕлд-та цалдӕр ахуыргондимӕ (уыдон ӕхсӕн ирон ӕвзонг лӕппу Абайты Вассо дӕр) ӕвӕллайгӕйӕ кусынмӕ. 1940-ӕм азтӕм хъуыстис ӕрмӕстдӕр йӕ хорзы кой, фӕлӕ йыл стӕй ахуыргæндтæ райдыдтой, сӕхӕдӕг цы не ’мбӕрстой, уыцы фарстаты йӕ азымджын кæнын. Суанг-ма ӕрхъавыдысты Н. Марры куыстытӕ басудзынмӕ дӕр. Иу-дзырдӕй, Вассо йӕ ахуыргӕнӕгыл комдзог нӕ рацыд, нӕ балӕууыд Н. Марры иннӕ хъомылгӕнинӕгты, ома «мар-рист»-ты фарсмӕ, кӕд иттӕг хорз ӕмбӕрста ӕмӕ зыдта, зонадон концепциты цы уыдис рӕдыдӕй, уый, уӕддӕр.
Стыр диссаг уый у ӕмӕ Цæгат Ирыстонмæ ӕрцыдысты Уӕрӕсейы ахуыргæндтæ Б. А. Серебренников ӕмӕ В. П. Сухотин ӕмӕ сӕ сразӕнгард кодтой Абайты Вассойы зонадон куыстыты ныхмӕ конференцийыл ӕрдзурын.
Абайы фырты ӕркодтой Мӕскуымӕ Ленинградӕй. Уӕд Вассо куыста ИЯМ-йы. Ӕрцыдис йӕ аспирант, фӕстӕдӕр зынгӕ ахуыргонд, Исаты Мӕхӕмӕтимӕ.
Ӕвзагзонынады Институты уагъд ӕрцыдис зонадон Советы æмбырд. Уым Исаты М. куыд загъта, афтӕмӕй цыдис сӕрмагондӕй ныхас Абайты Вассойы уӕлдӕр ӕрхӕсгӕ куыстыты тыххӕй ӕмӕ-ма, зӕгъгӕ, «марристты» фарсмӕ цӕуылнӕ балӕууыд, цӕуылнӕ ӕххӕст кӕны И. Сталины амындтытӕ ӕвзагзонынады раст фӕндагмӕ раздахыны тыххӕй. Вассойы ’фхӕрджытӕ фӕдзырдтой 2 сахатӕй фылдӕр. Исаты М. дзуры йӕ мысинӕгты: «Лӕвӕрдтон ӕм блокнот ӕмӕ ручкӕ, фӕлӕ сӕ нӕ айста». Исаты лӕппу та тарстис искӕцы зылынгӕнӕг фарста дзы, зӕгъгӕ, куы ӕрбайрох уа дзуапгӕнгӕйӕ.
Абайты Вассо 2 сахаты дӕргъы фӕдзуапп кодта алкӕцы ӕфхӕрӕгӕн дӕр. Стӕй бафарста æмбырды сӕрдары (акад. В. В. Виноградовы), кӕд-ма искӕмӕ ис фарста, зӕгъгӕ. Ахуыргæндтæ сӕ сӕртӕ сӕ гуыртыл ӕрӕппӕрстой ӕмӕ сӕ хъыпп-сыпп дӕр нал райхъуыст. Виноградов зӕгъы Вассойӕн: «Я хочу Вас спасти, Василий Иванович, надо Вам покаяться за свои ошибки». Вассо уымӕн сдзуапп кодта афтӕ: «Спасибо за сочувствие, но, право от моей совести меня никто не может спасти, кроме меня самого… Если ко мне нет больше вопросов, то всего вам хорошего». Абайты Вассо рацыд Ленинградӕй ногӕй саразгӕ ӕвзагзонынады Институтмӕ, ирайнаг филологийы секторы сӕргълӕууӕгӕй, ӕрӕвнӕлдта уӕхскуӕзӕй, цыран фӕкуыста, цалынмӕ пенсийы ацыд, уӕдмӕ.
Исаты Мӕхӕмӕтӕн та ӕнцой нӕ лӕвӕрдта ахӕм фарста: «Вассойы цӕуылнӕ бафхæрдтой, цы ’рцыдис?» Уый ныхъхъавыдис Кремлы партархивмӕ цыфӕнды хуызы дӕр бацӕуын ӕмӕ фена уыцы æмбырды суагъӕйы ӕрмӕг. Йӕ къухы бафтыдис ӕрмӕстдӕр ӕвзагзонынады Институты партчыры нымӕрдар куы ссис, уӕд. Уым ссард-та уыцы бонты (1952 азы) ӕхстмӕ кӕй рауӕлдай кодтой, уыцы ахуырты номхыгъд. Номхыгъд бавдыста Л. Берия И. Сталинмӕ. Номхыгъды фыццаг фыст ӕрцыд Абайты В. И. Фæлæ йæ бакомкоммӕ сырх кърандасӕй И. Сталин ныффыста: «Этого оставить. Хороший ученый. Перевести в Москву». «Вассо мӕлӕтӕй аирвӕзт куыд ирон лӕг, ӕви куыд стыр ахуыргонд?» Зын нын у сдзуапп кӕнын, фӕлӕ уӕддӕр Хуыцауы бузныг И. Сталинӕн. (И. Сталины стъолыл, дам, ӕдзухдӕр уыдис Вассойы чиныг «Осетинский язык и фольклор»).
1958 азы дунейы ахуыргæндтæ базонгӕ сты Абайты Вассойы «ИÆИЭДз»-ы I-аг томимӕ. Дунейы зонады уыцы куысты фӕзынд уыдис сенсаци. Фыстой йӕм бузныджы телтӕ ӕппӕт бӕстӕтæй. Раздӕхтой йӕм се ’ргом Цӕгат Ирыстоны дӕр.
Абайты Вассо йӕ хъус лӕмбынӕг дардта ирон ӕвзаджы райрӕзт ӕмӕ архайдмӕ. Зӕгъӕн ис ӕмӕ йын иу проблемӕ дӕр нӕ аирвӕзтис ӕнӕркастӕй. Цæгат Ирыстоны фысджытимӕ иу фембӕлды йӕм радтой фарста: «Нӕ растфыссынады ӕгъдӕутты прогресс нӕма ис?»
«Прогресс нӕ, фӕлӕ фӕстӕмӕ акъахдзӕф кодтам, — загъта Вассо. — Латинаг графикӕ куы истам, уӕд арӕзт ӕрцыдис къамистӕ, биноныг куыстытӕ фӕкодтам, фӕархайдтам, хуыздӕр цӕмӕй уа, ууыл. Уырыссаг графи-кӕмӕ куы хызтыстӕм, уӕд та ахӕмӕй ницы уыд, алцы дӕр талф-тулфӕй кодтам, куырмӕджы. Уымӕ гӕсгӕ нӕ орфографи у бындуронӕй рацаразинаг…».
Иуахӕмы йӕм фысджытӕ бахатыдысты ирон ӕвзаджы уавӕры тыххӕй. Абайы-фырт загъта: «Относительно судьбы нашего языка, я уже высказывался не раз. Верно то, что язык, судьба нашего языка внушает тревогу. И есть признаки, что он может постепенно исчезнуть. Я имею в виду в особенности судьбу нашего языка, в кругу семьи. Если язык исчезнет в семье, в домашнем быту, то не поможет уже ни радио, ни газеты, ни телевидение. Поэтому надо особенно беречь судьбу нашего языка в семье: если дети с молоком матери не усваивают родной язык и не пользуются им дома, то язык можно считать обреченным. Я настроен оптимистически. И почему? Потому что есть исторические примеры, когда языку угрожала полное исчезновение и, тем не менее, он не только не исчез, но расцвел. Я уверен, что наш язык будет жить».
Фӕнды-ма мӕ зӕгъын, Абайты Вассойы лекциты тыххӕй рагон ирайнаг («Авеста») ӕмӕ рагон персайнаг ӕвзӕгты тыххӕй.
1976-1982 азтӕ кусын ирон ӕвзаджы фонетикӕ, фонологийыл ХИЗИИ-йы ӕвзаджы хайады разамонӕг профессор Гӕбӕраты Н. Я. хӕсмӕ гӕсгӕ. Бӕлвырд позициты сонорон /Й/ ӕмӕ /У(ы)/-йы архайд нӕ хатыдтӕн. Мӕхи фӕндонмӕ гӕсгӕ ӕрвыст ӕрцыдтӕн г. Мӕскуымӕ ӕвзагзонынады Институты ирайнаг филологийы сектормӕ стажерӕй. Вассойӕ бар ракургӕйӕ, райдыдтон цӕуын йӕ лекцитӕм («Авеста»). Цалынмӕ райдыдта, уӕдмӕ мӕм бадзырдта ӕмӕ зӕгъы: «Аспиранттау дӕу дӕр фӕрсдзынӕн ӕрмӕгӕй». Ӕмӕ та бар ракуырдтон, цӕмӕй мын сӕ магнитафоныл бауадза фыссын. Афтӕмӕй сӕ фӕфыстон кассетӕтыл 1982-1984 азы марты мӕймӕ. Сӕ иу хай — «Авеста» — йӕ раздӕры аспиранткӕ, авестолог Виноградова С. П.-имӕ мыхуыры рауагътам Вассойы 115 азы юбилеймӕ. Гъеныр та тагъд рухс фендзӕн рагон персайнаг ӕвзаджы лекциты курс дӕр.
1982 азы октябры мӕйы кӕрон ӕз Абайтӕм, развӕлгъау бар ракургӕйӕ, бацыдтӕн консультаци райсынмӕ. Мӕнӕн мӕ цӕстытӕ ратӕх-батӕх кодтой йӕ библиотекӕйы гуырахстыл, цармӕ кӕрӕдзийыл амад тӕрхӕджытыл. Дзӕвгар рагон чингуытӕ мын ӕвдисгӕ дӕр ракодта. Цалдæр хатты йæм бахатыдтӕн, цæрæнуат дын куы сфæрæз кæниккам, зæгъгæ. Амӕсты, йӕ кӕсӕнцӕстытӕ йӕ ныхыл авӕрдта, ӕмӕ мын тӕркӕй афтӕ: «Зоя, ты что — секретарь Обкома?» Ӕз ма йӕ ноджыдӕр афарстон: «Чъребайы ӕви Дзауы?». «Чъребайы, Чъребайы, цӕмӕй-иу мӕм мӕ хӕлӕрттӕ ӕрбацӕуой!» Мӕ ных сарӕзтон Пединституты историон-филологон факультеты декан Цыбырты Людвигмæ. Уыдон нывгӕнӕг Хъотайты Г. С.-имӕ ссыдысты Къӕбулты Т. Ш.-мӕ. Радзырдтой йын ӕппӕт дӕр. Уый уыцы уысм бацыдис Партийы Обкомы 1-аг нымӕрдармӕ. Санахъоты Ф. С. сразы ис Вассойæн финаг агъуыст саразыныл.
Вассо дӕр йӕ бинойнаг Цхуырбианимӕ ӕрхӕццӕ сты Гурмӕ. Ӕрбакодтам ӕй ӕмӕ йӕм Цыбырты Л. А. радта дӕгъӕлтӕ, зӕгъгӕ, дӕхӕдӕг бакӕн дуар. Уый бакаст агъуыстмӕ, тынг йӕ зӕрдӕмӕ фӕцыдис.
Июлы мӕйы 1987 азы Вассомӕ уынынмӕ ӕрцыдысты Джыккайты Ш. Ф. ӕмӕ Тахъазты Х. А. Цӕгат Ирыстонӕй. Ӕз сӕ фӕуазӕг кодтон нӕхимӕ, семӕ Хъотайты Г. С., Гаглойты Ю. С. дӕр. Æрбахуыдтам Вассо ӕмӕ йӕ би-нойнаджы дӕр. Цалынмӕ фынгыл ӕрбадтысты, уӕдмӕ Вассо ӕрдомдта магнитофон сиу кӕнын. Сӕххӕст ын кодтон йӕ куырдиат ӕмӕ диссӕгтӕ — загъта ныстуан, йӕ библиотекӕ кӕй уадзы махӕн, нӕ хъарм ахасты тыххӕй: «Всю свою библиотеку я хочу подарить Южной Осетии. Это будет скромный знак моей благодарности Южной Осетии, общественности Южной Осетии, за все что она для меня сделала. Я представляю себе технически это дело так: на первых порах библиотека не будет вливаться в какую-нибудь Цхинвальскую библиотеку, а будет размещена у меня в доме. Для того, чтобы кто-нибудь заведовал этой библиотекой, так ска­зать, следил за ним, чтобы там было все цело. Ну, техническая работа такая, со­ставление каталогов. Я надеюсь, что это возьмет на себя Ксения Григорьевна. Надо будет составить 3 каталога: русский, иностранный, осетинский. Библиотека должна быть общественной, т. е. доступной каждому, кто интересуется книгами. Ну, в далеком будущем она, наверное, вольется в местные библиотеки. Может быть, изначально обязанности заведую­щей библиотеки возьмет на себя Ксения Григо-рьевна… Посмотрим».
Фӕлӕ стӕй хӕст… агъуыст басыгътой гуырдзы, йӕ бинойнаг — Цхуырбиан иу мӕй уӕззау рынчыны фӕстӕ 1996 азы ахицӕн йӕ цардӕй. Ӕнӕхъӕн афӕдз ӕмӕ ӕрдӕг компьютерыл иу нӕлгоймаг Вассойы удӕгасӕй фӕцарӕзта чингуытӕн номхыгъд… Вассо ахицӕн йӕ цардӕй марты мӕйы 18 боны 2021 азы. Чингуытæ ралас-той СОИГСИ-йы библиотекӕмӕ.
Ног агъуыст-музей арӕзт ӕрцыдис РХИ-йы къухдариуӕгады ӕххуысӕй. Стыр бузныг уыдонӕн иууыл дӕр. Уырны мӕ, ацы музей кӕй суыдзӕн ХИ-йæ культурон-рухстауӕг объект ӕмӕ нӕ интеллигенцийы ’ххуысӕй сӕндидзын кӕндзыстӕм, Вассойы цы проблемӕтӕ тыхсын кодтой, уыдон ӕппӕтварсонӕй дӕр: ӕгъдау, фарн, ӕхсар ӕмӕ лӕджыхъӕд.
Дзӕнӕты бад! Нӕ зонды мӕсыг, ӕнӕхъӕн дунейы фарны лӕг!
Филологон зонӕдты кандидат, профессор Битарти З. А.
