15-æм ноябры РХИ-йы Хицауады Сæрдар Хъуылымбегты Доменти фæуазæг Къуыдаргоммæ. Социалон нысаниуæгджын объекттæ зымæджы сезонмæ хъармдзинадæй куыд ифтонг сты, Къуайсайы Культурæйы хæдзары арæзтад цы æмвæзадыл ис æмæ Гуфта-Хъемултайы фæндаджы проблемон фадыг куыд арæзт цæуы, уыдон бабæрæг кæнынмæ.

Хицауады Сæрдаримæ иумæ уыдысты Фæндагон арæзтады æмæ автомобилон фæн-дæгты эксплуатацимæ дæттыны комитеты сæрдар Гуыззыдтаты Эдуард æмæ Уæлвæткон уавæртæ æмæ æрдзон æнамонддзинæдтæ ликвидаци кæныны фæдыл министр Санахъоты Сергей.

Инспекцион азылды райдайæны Хицауады Сæрдар æмæ йе ‘мбæлццæттæ бабæрæг кодтой Кировы иумæйаг ахуыргæнæн скъолайы. Уазджытыл фембæлд ацы ахуыргæнæндоны директор Æлборты Зинаидæ: «Кировы скъолайы ныртæккæ ахуыр кæны 16 ахуыргæнинаджы. Къуайсайы ног скъола куы сырæзт, уæд нæ ахуыргæнинæгтæй фарастæй ахызтысты уырдæм. Уымæ гæсгæ, ахуыргæнинæгты нымæц бæрæг фæкъаддæр. Зымæгмæ хъармдзинадæй стæм ифтонг. Нæй нæм предметон ахуыргæнджыты хъуагдзинад дæр. Не скъола ифтонг у æппæт инвентарæй, æрмæст скъоламæ хæтæлты цы дон цæуы, уым донсыгъдæггæнæнтæ кæй нæ лæууы, уый аххосæй доны хæтæлтæ быро-нæй байдзаг вæййынц æмæ сæ арæх бахъæуы сыгъдæг кæнын», – дзырдта скъолайы директор.

Хицауады Сæрдар байхъуыста ахуыргæнджыты проблемæтæм дæр. Музыкæйы   ахуыргæнæг Танделаты Луизæ бахатыд Хицауады Сæрдармæ, цæмæй скъолайæн баххуыс кæна музыкалон инструмент – ирон фæндыр балхæнынæн. Цæрæнуатон хъуагдзинад кæй æййафынц хъæуы иуæй-иу цæрджытæ æмæ хъæддаг сырдтæй кæй тыхсынц – дзырд цыд уыцы фарстатыл дæр. Хицауады Сæрдар йæхимæ фæнысан кодта æппæт ацы фарстытæ æмæ ныфс бавæрдта, сæ проблемæтæм сын гæнæнуæвгæйæ лæмбынæг кæй æркæсдзæн.

Дарддæр Хъуылымбегты Доменти, Гуыззыдтаты Эдуард æмæ Санахъоты Сергей ацыдысты горæт Къуайсамæ. Ам уазджытыл фембæлд Къуайсайы горæты администрацийы сæргълæууæг Гæззаты Роберт.

Премьер-министр цымыдис кодта, Къуайсайы Культурæйы хæдзары цы арæзтадон-цалцæггæнæн куыстытæ арæзт цæуы, уыдоны уавæрмæ. Ам ивгъуыд азæй нырмæ цæуы цалцæггæнæн куыстытæ. Рахицæнгонд ын æрцыд 9 милуан сомы. Куыстытæ хъуамæ фæ-уой азы кæронмæ æмæ уæд къуайсайæгтæн фадат уыдзæн ног сцалцæггонд Культурæйы хæдзары алыгъуызон мадзæлттæ уадзынæн. Хицауады Сæрдар конкретон хæслæвæрдтæ радта, арæзтады рæстæджы цы згъуыдтæ уагъд æрцыд, уыдон аиуварс кæныны тыххæй. «Абон махæн фадат ис Уæрæсейы Федерацийы æххуысæй канд цардуагон объекттæ саразын нæ, фæлæ ма хъæууон хæдзарад сæндидзын кæнын дæр. Уый тыххæй лæвæрд цæуы стыр ресурстæ. Мах нысанмæздæхтæй хъуамæ спайда кæнæм уыдонæй, цæмæй нæ фидæны фæлтæрæн уа æнцондæр цæрæн. Социалон фарстатæ хъуамæ скъуыддзаг цæуой кæрæдзи æмбаргæйæ», – дзырдта Хицауады Сæрдар.

Хъуылымбегты Доменти ма бабæрæг кодта скъолайы кары агъоммæйы уагдон дæр. Сабидоны къухдариуæггæнæг Тедеты Индирæ уазджыты базонгæ кодта сабиты рæвдауæндоны куыстимæ. «Махмæ ис 62 сывæллоны. Уавæртæ нын ис, фæлæ агъуысты уæлхæдзар у цалцæггæнинаг».

Къуайсайы горæты администрацийы хистæр Гæззаты Робертæн хæс æрцыд, цæмæй лæмбынæг сахуыр кæна фарст æмæ тагъд рæстæджы аскъуыддзаг æрцæуа проблемæ.

Уый фæстæ та Хицауады Сæрдар æмæ Фæндагон арæзтад æмæ автомобилон фæн-дæгты эксплуатацимæ дæттыны комитеты сæрдар Гуыззыдтаты Эдуард Къуайсайы горæты администрацийы хистæримæ иумæ бабæрæг кодтой,  Къуайсайы централон фæндæгтæй сæ иуыл цы арæзтадон куыстытæ цæуы, уыдон уавæр. Куыд зонæм, афтæмæй Президенты амындмæ гæсгæ, ноябры мæйы кæрон ацы уынг хъуамæ фæуа асфальтгонд, цæмæй скъолайы агъоммæйы уагдонмæ цæуæг сабитæ æмæ ныййарджытæ, стæй скъолайы ахуыргæнинæгтæ къæвдабонты, миттайæнты цæуой сыгъдæгæй.

Хъуылымбегты Доменти куыд загъта, афтæмæй: «Фидæнмæ аз æркастæуыдзæнис иннæ уынгтæм дæр. Хъуамæ алчи дæр æмбара, нæ уавæртæ къуындæг кæй сты, æмæ уыцыиу рæстæджы нæ бон бавналын кæй нæу æмткæй алцыппæт аразынмæ».

Инспекцион балцæн фæстиуджытæ аразыны рæстæджы Хъуылымбегты Доменти æр-дзырдта, ныртæккæ Хицауады ‘рдыгæй цас хъусдард здæхт цæуы дæрддзæф районтæм, ууыл дæр: ацы аз Гуфта-Къуайсайы фæндаджы иу хай арæзт æрцыд æмæ фидæнмæ йæ иннæ хай дæр фæуыдзæн арæзт; Хъемултайы хъæумæ æввахс цы проблемон фадыг уыд, уый та арæзт кæй цæуы капитало-нæй.

Хицауады Сæрдар ныфс бавæрдта, дарддæр дæр РХИ-йы Хицауад кæй кусдзæн республикæйы инфраструктурæйы райрæзты фарстатæм лæмбынæг хъусдаргæйæ.

УАЗÆГТЫ Марфа

Comments are closed, but trackbacks and pingbacks are open.