Кӕстӕр фӕлтӕрмӕ бирӕ бӕллицтӕ ӕмӕ фӕндтӕ вӕййы, ӕдзухдӕр исты хорздзинад базонынмӕ здæхт вӕййы сӕ хъуыды ӕмӕ сæ архайд. Уыдонӕй иутӕн сӕ курдиат раджы раргом вӕййы ӕмӕ йӕ равзарынц сӕ сомбоны цардвӕндагӕн. Фӕлӕ ӕндӕртӕн, цыма ӕмбӕхст вӕййы, афтӕ фӕкӕсы сӕхимӕ дӕр ӕмӕ йӕ алфӕмбылайы адӕймӕгтӕм дӕр. Фӕлæ уыцы ӕнӕзынгӕ курдиат раргом кӕнын, йӕ басхъауын бирӕ кӕнгӕ вӕййы хистӕр фӕлтӕрӕй. Уыдон лӕмбынӕг куы ӕркӕсынц хицӕнтӕй алы рӕзинаг кӕстӕры ӕвзыгъддзинадмӕ дӕр, семӕ чысыл рӕстӕг уæддæр куы афыдӕбон кӕнынц, уӕд курдиат райхӕлы, хуры зӕрин тынтӕ цардӕгас дунейы куыд барӕвдауынц батæфсын кæнынц, афтӕ сӕхи раргом кӕнынц ӕмбӕхст курдиаты ӕвӕрӕнтӕ дӕр. Иудзырдӕй, сӕ иутимӕ дæр ӕмӕ иннӕтимӕ дӕр кусын фӕхъӕуы уӕхскуӕзӕй.

Нырма, чизоны, цы студийы кой кæнын, уый ахуыргӕнинӕгтӕй æгæр раджы ӕппӕлын, фӕлӕ уал сын цыбыр рӕстӕджы дӕргъы    цы бантыст, уымӕй ис хорз хатдзӕгтӕ скӕнӕн. Иу ӕнтыст сӕ къухты ӕфты иннӕйы фӕдыл, тырнынц фылдӕр ӕмӕ хуыздӕр ӕнтыстытӕм. Уый уын, Цхинвалы районы Къостайыхъӕуы астӕуккаг скъолайы цы нывгӕнӕн аивадон студи байгом, уый кой ракӕнынмӕ хъавын. Бӕрцӕй ӕртӕ азæй фылдæр нӕма архайы, фӕлӕ фидарӕй зӕгъӕн ис, рӕзты фӕндагыл лӕуд кӕй у, уый. Ахуыргӕнӕндоны директор, Республикӕ Хуссар Ирыстоны адӕмон нывгӕнӕг Гӕбӕраты Барис куыд радзырдта, афтӕмӕй сӕм райдианы кӕд цъус сывӕллӕттӕ ахуыр кодта, уӕд ныр афтӕ нал у. Уый уымӕн, ӕмӕ  базыдтой, студийы ахуыр кӕнын сын кӕй хӕссы ӕхцондзинад, кӕй сӕ цайдагъ кӕны се ‘взыгъддзинӕдтӕ базонын ӕмӕ райхалынмӕ. Абоны бонмӕ студийы ахуыр кӕнынц кӕстӕр ӕмӕ хистӕр къордтӕ, ӕдӕппӕт сты 22 ахуыргӕнинаджы. Кӕстӕр къорды ахуыргӕнинӕгтӕ нывкӕныны аивадыл фæндагыл ӕрлӕууынц 2-аг къласӕй суанг 5-ӕм къласмӕ ӕмӕ уымӕй уӕлӕмӕ та хауынц хистӕр къордмӕ. Аивады фӕндагыл ӕнтыстытӕ кӕмӕн ис, йӕхи ӕмӕ ӕндӕрты зӕрдӕтӕ дӕр сӕ аивадӕй чи рухс кӕны, уыдонмӕ хауынц Джиоты Дианӕ, Тараты Иренӕ, Бӕззаты Альмӕ, Джиоты Линӕ, Лохты Сӕрмӕт, Мӕлдзыгаты Аринӕ, Саулохты Янӕ, Хуыбиаты Миленӕ, Аннӕ ӕмӕ ӕндӕртӕ. Райдианӕй фӕстӕмӕ сын йӕ зонындзинӕдтӕ ӕнӕвгъауӕй хæлар кӕны курдиатджын сфӕлдыстадон кусӕг, нӕ республикӕйы сгуыхт нывгӕнӕг Хуыбиаты Роберт. Уымӕй дарддӕр ма дзы ӕрӕджы кусын райдыдта ӕвзонг нывгӕнӕг Зӕгъойты Егнат. Студи каст фӕуыны фӕстӕ сын лӕвӕрд цӕудзысты бӕлвырдгӕнӕнтӕ.

Ахуыргӕнджытӕ сӕ ахуыргӕнинӕгты развӕлгъау базонгӕ кӕнынц сӕрмагонд литературӕимӕ, нывкӕнынады аивады тыххӕй та бакӕсынц кинонывтӕм. Уымӕй дарддӕр ма сын ӕрдзурынц нывкӕнынады аивады хицӕн ӕмӕ хицӕн хуызты фӕдыл ӕмӕ уый фӕстӕ та фӕкӕнынц практикон куыст. Студийæн, æрвылаз дӕр равдыстытӕ вӕййы районы администрацийы бӕстыхайы. Уыдон баст вæййынц Республикӕ Хуссар Ирыстоны расидыны бон, Хетӕгкаты Къостайы райгуырды боны цытӕн ӕмӕ ӕндӕр зӕрдылдаринаг цаутимæ. Ивгъуыд аз Сочӕйы, Лазаревскы районы ӕвзонг нывгӕнджытӕн уыд ӕхсӕнадӕмон равдыст-конкурс ӕмӕ дзы нӕ республикæйæ хайад райстой Аивӕдты лицей ӕмӕ Къостайыхъӕуы нывгӕнӕн аивады студийы ахуыргæнинæгтæ. Уым фесты цалдӕр боны, базонгӕ сты йӕ фенддаг бынӕттимӕ ӕмӕ стӕй уыцы зӕрдылдаринаг бынӕттӕ сныв кӕныныл бакуыстой лӕмбынӕг. Студийы 7 ахуыргӕнинаджы бацахстой призон бынӕттӕ. Бынатмӕ ацӕуынӕн сын ӕхцайы фӕрӕзтӕй баххуыс кодта нӕ республикӕйы Президент Бибылты Анатоли, стӕй районы адӕмон ахуырады сӕргълӕууӕг Лолоты Барис. Ӕндӕр ӕмӕ ӕндӕр хъуыд-дӕгты сӕм йе ‘ххуысы къух фӕдаргъ кодта Сывӕллӕтты сфӕлдыстады галуаны директор Джиоты Арянӕ ӕмӕ дзы коллектив у бузныг. Алыгъуызон литературӕйӕ сӕм фӕкаст Уӕрӕсейы Федерацийы адӕмон нывгӕнӕг, Хетӕгкаты Къостайы номыл премийы лауреат Челехсаты Магрез ӕмӕ уымæй дæр баззадысты райгондӕй.

Цӕмӕй нывкӕнынады аивад ӕндӕртӕ дӕр бауарзой, сӕ зӕрдӕмӕ йӕ арф айсой, уа сын хӕларадон ахастытӕ, уыцы нысанӕн студийы ахуыргӕнджытӕ ӕмӕ ахуыргӕнинӕгты иу къорд амӕйразмӕ уыдысты Знауыры ӕмӕ Цхинвалы районы Сатихъары астӕуккаг скъолаты, уыцы рæтты бацӕттӕ кодтой равдыстытӕ ӕмӕ сын базонгӕ сты сӕ куыстытимӕ. Уый стыр ахъаз фӕуыдзӕн сомбоны курдиӕттӕ рабӕрӕг ӕмӕ хӕларадон ахастытӕ сфидар кӕнынӕн. Студийы коллектив фӕнд кӕны, цӕмӕй сӕрдыгон практикӕ арвитой Цхинвалы районы Ортъеуы хъӕуы, уым базонгӕ уыдзысты нӕ фенддаг къуымтӕй сӕ иуимӕ, батыхсдзысты ӕрдзы хъӕбыс бафснайын ӕмӕ йӕ фӕткмӕ ӕркӕныныл.

Нывгӕнӕн студийы коллективмӕ бирӕ хорз фӕндтӕ ӕмӕ хъуыдытӕ ис ӕмӕ сын уӕд ӕнтыстытӕ.

Хуыбиаты Никъала

Comments are closed, but trackbacks and pingbacks are open.