Ацы аз апрелы мæйы Иугонд Нациты Организацийы æдасдзинады Советы сæрдариуæг кодта Уæрæсе. Сæрмагонд æфсæддон операцийы райдианæй фæстæмæ Уæрæсейы фæсарæйнаг хъуыддæгты министр Сергей Лавров фыццаг хатт раныхас кодта ИНО-йы штаб-квартирæйы. Æгас дуне тынг æнхъæлмæ каст Лавровы раныхасмæ, уымæн æмæ абоны бон æрмæстдæр Уæрæсе хæссы йæ ныфс хурныгуылæйнаг бæстæтæн сæ «ных бакъуырынмæ», сæ рæдыдтытæ æмæ сын сæ фыдракæндтæ комкоммæ зæгъынмæ.

ИНО-йы штаб-квартирæ Нью-Йоркы кæй ис, уый рагæй фæстæмæ æвзæрырдæм æндавы ацы организацийы куыстыл – бирæ хæттыты АИШ-ы къухдариуæгад визæтæ нæ ратты, сæ фæндимæ разы чи нæ вæййы, уыцы гоймæгтæн, суанг ма дипломаттæн дæр. Æмæ та ныр дæр Лавровимæ уæрæсейаг журналисттæй чи хъуамæ ацыдаид, уыдонæн нæ радтой визæтæ. Ацы инциденты фæдыл Уæрæсе радта карз дзуапп, зæгъгæ, аххосджынтæ æнæфхæрд нæ баззайдзысты æмæ фидæны АИШ-ы минæвæрттыл дæр ахæм бон акæндзæнис. Уымæй уæлдай ма Лавров фæндон бахаста, цæмæй ИНО-йы штаб-квартирæ рахæссой Нью-Йоркæй æндæр бæстæмæ. Ацы хъуыды бирæ бæстæты минæвæртты зæрдæмæ фæцыд æмæ йыл æввахс рæстæджы, æвæццæгæн, æрдзурдзысты.

Лавров ма бафарста, зæгъгæ ИНО-мæ уæнгон фиддонтæ æндæр валютæйы бахæссæн цæмæннæ ис? Ома, долларæй уæлдай спайдагæнæн ис юанæй дæр. Ацы фæндон бындуронæй ницы фæивдзæнис, организацийы куыстыл нæ бандавдзæнис, фæлæ доллары кад ноджы тыхджындæр фæцуддзæнис. Уымæ гæсгæ Лавровы ныхæстæн ис стратегион нысаниуæг. Ныридæгæн бирæ бæстæтæ хизынц националон валютæтæм æмæ ацы тенденци æнæнхъæлæджы сарæзтой АИШ сæхæдæг. Дарддæр Ӕппæтдунеон валютон фонд æмæ Ӕппæтдунеон банг цы бауыдзысты, уый зын зæгъæн у. Доллар баивыны процесс дугъы бацыд æмæ йын ныр æрлæууæн нал ис.

Боны фæткы сæйраг темæ уыд ИНО-йы уагæвæрды принциптæ бахъахъхъæнын æмæ алчидæр æнхъæлмæ каст Лавровы карз раныхасмæ.

«Хурныгуылæйнаг бæстæтæ æмæ се ‘мцæдисонтæ иннæ адæмтæй сты бирæ къаддæр æмæ сын ничи радта бар, дунейы дзыллæты номæй дзурын, дзыллæтæ сæ райсгæ фæткыл цæрын кæнын. Уыимæ ма иумæ сæхи саразгæ демократийы дæр цæсты бафтыдтой. Ацы хъуыддæгтæн цæвиттон у украинæйаг фыдгæнæг режим, кæцы йæ кураторты æппынæдзухон æххуысы фæрцы куынæг кæны уæрæсейаг æвзагыл дзурæг цæрджыты æмæ сын абоны бон дæр «макæ» зæгъæг нæй. Алкæмæн «демократон» цард амонынц, фæлæ сæхи демократон принциптæм гæсгæ цæрын нæ фæнды, хæдбар паддзахадтæн ницы аргъ кæнынц, дæлдзиныг сæ кæнынц. ИНО-йы къухдариуæгад дарддæр йæхи афтæ лæмæгъ куы æвдиса, уæд æй тагъд рæстæджы дунейы æхсæнад бынтондæр ницæмæуал дардзæнис. Æз домын ИНО-йы Генералон секретарь Антониу Гутерришæй, цæмæй цæсты гагуыйау хъахъхъæна организацийы уагæвæрды бындурон принциптæ. Мах æвдисæн стæм, ИНО-йы къухдариуæгад сæ цæстытæ куыд сæхгæдтой – АИШ-ы разамынад æнæзакъонон методтæй визæтæ куыд нæ дæтты, тыхы руаджы куыд исынц дипломатон хиисбонад, æмæ æндæр ахæм фыдракæндæн», – загъта УФ-йы фæсарæйнаг хъуыддæгты министр.

Æппæтдунеон æмахастыты тенденци ныридæгæн цæуы бирæполярон архитектурæмæ æмæ ИНО-йы æдасдзинады Советы æнæмæнг хъæуы реформæтæ саразын. Йе скондмæ йын æрбахонын хъæуы цалдæр хъомысджын бæстæйы Азийæ, Африкæйæ æмæ Латинаг Америкæйæ. Рæстдзинадыл куы дзурæм, уæд Бразили æмæ Инди æнæмæнг хъуамæ уаиккой ИНО-йы æдасдзинады Советы уæнгтæ – уыдон дæр активон хайад истой дыккаг дунеон хæсты æмæ нымад сты уæлахиздзаутыл. Франц ницæйаг хайбавæрд бахаста фашистты ныддæрæн кæныны хъуыддагмæ – немыцæгты ныхмæ фæлæууыдысты æрмæстдæр 43 боны бæрц. Сталинграды хæсты ма Павловы хæдзар дæр 58 боны фæлæууыд гитлеронты ныхмæ. Æмæ афтæмæй Инди æмæ Бразилийы уæлдай Франц у ИНО-йы æдасдзинады Советы уæнг.

Украинæйы проблемæйыл дзургæйæ Лавров æрæмбырдуæвджытæн бамбарын кодта, зæгъгæ дзы сабырдзинад рæхджы нæ ныллæудзæнис æмæ уымæн ис бæрæг аххосæгтæ.

«Фыццаджыдæр уал мах хъуамæ бахъахъхъæнæм нæ бæстæйы æдасдзинад. Дыккаджы та, Украинæ куы нæ æрурома йæ дискриминацион политикæ, дарддæр куы куынæг кæной уырыссаг æвзаг æмæ уырыссаг æвзагыл дзурджыты, уæд сабырдзинадыл нæ уыдзæнис дзурæн. Ӕртыккаджы та, Украинæйы активонæй уадзынц репресситæ чырыстон диныл хæст цæрджытæн, уæрæсейаг культурæйы ныхмæ, чысылнымæц нацитæн, национализм дзы ссис паддзахадон политикæ, дзыллон информацийы фæрæзты хурхыл ныххæцыдысты. Хурныгуылæйнаг бæстæты ацы проблемæтæй иу дæр не ндавы – æгæрыстæмæй ма дзы кæцыдæртæ цин дæр кæнынц. Фæлæ фашисттæн Уæрæсе ацы хъуыддæгтæ нæ ныббардзæн, дарддæр архайдзыстæм нæхи пайдайæн, хъахъхъæндзыстæм уæрæсейаг æвзаг æмæ нæ адæмы скуынæг кæнын нæ бауадздзыстæм. Мах æй уынæм, киеваг режимы фыдракæндты тыххæй цахæм реакци ис «демократон» бæстæты æмæ ИНО-йы, æмæ уæм дарддæр дæр хорзæй ницæмæ æнхъæлмæ кæсæм. Цалынмæ æппæт ацы проблемæтæ аиуварс кæнæм, уæдмæ сæрмагонд æфсæддон операци цæудзæнис».

Украинæйаг фашистты цахæм темптæй ифтонг кæнынц æхсæнгарзæй, финанстæй æмæ æндæр хуызы æххуыстæй, уымæй Уæрæсе сарæзта хатдзæгтæ. Лавровы ныхæстæм гæсгæ абоны бон НАТО æмæ Евроцæдисæй ницыуал хицæндзинад ис, сæ дыууæ дæр систы агрессивон æфсæддон организацитæ, кæд æмæ НАТО йæхи æдасадон хоны, уæддæр.

«Абоны бон лæууæм æртыккаг дунеон хæсты къæсæрыл æмæ ацы сæвзæргæ уавæры аххосджын чи сты, уыдон æвдисынц Уæрæсемæ, ома мах стæм змæнтджытæ. АИШ æмæ йе ‘мцæдисонтæ æппынæдзух сайынц, факттæ зыгъуымырдæм зилынц, цæмæй сæ гегемони ма фесафой».

Лавров æрдзырдта æппæт риссаг хъуыддæгтыл – ракодта Афганистаны, Израилы, Палестинæйы, Суданы, Ливийы, Сирийы, Иракы, Йемены, африкæйаг бæстæты кой. Банысан кодта, зæгъгæ АИШ алыран дæр архайы æрмæстдæр йæхи пайдайæн, йæ дывæр стандарттæ  стыр зиæнттæ кæй хæссынц æнæхъæн регионтæн.

Фæсарæйнаг дзыллон информацийы фæрæзтæ Лавровы раны-хасæн скодтой аккаг аргъ. Китайы æмæ ма æндæр хæдбар бæстæты информацион фæрæзтæ раппæлыдысты Лавровы ныфсхастдзинадæй, аххосджынтæн сæ рæдыдтытæм комкоммæ кæй бацамыдта, уымæй. Ныры онг афтæ никуы уыдис – АИШ-ы критикæ кæнын ничи уæндыдис. Хурныгуылæйнаг прессæйæн дæр фактты ныхмæ сæ бон ницы уыд зæгъын æмæ сразы сты уæрæсейаг дипломаты ныхæстимæ.

«Хурныгуылæйнаг бæстæты фæндыд Уæрæсейы бафхæрын Украинæйы тыххæй, фæлæ сын нæ рауад. Азийы æмæ Африкæйы бæстæтæ ныры онг дæр сæ къахыл нæма слæууыдысты хурныгуылæйнаг колониалон бæстæты аххосæй æмæ уымæ гæсгæ нæ разы кæнынц Уæрæсейыл цъыф бакалыныл. Уымæй уæлдай ма разы сты ИНО-йы æдасдзинады Советы реформæтимæ.

Украинæ æмæ Уæрæсе сты егъау экспортер-бæстæтæ. Хойраджы бадзырдæн йæ нысан уыд, цæмæй æвæрæз бæстæтæ ифтонг æрцæуой хæлцæй. Лавровы ныхæстæм гæсгæ хурныгуылæйнаг бæстæты аххосæй хойраджы бадзырд гуманитарон инициативæйы бæсты ссис коммерцион – украинæйаг хойрагæй хæрзцъус хæццæ кодта мæгуыр бæстæтæм», – фыссы «New York Times».

«Лавров хурныгуылæйнаг бæстæты гегемонийæн кæрон саразынмæ кæй сиды, уый тынг æхсызгонæй райстой африкæйаг, азиаг æмæ латинаг америкæйаг бæстæтæ. Се ‘ппæты дæр фæнды реформæтæ саразын, цæмæй сын фидæны фылдæр бартæ уа. Уымæй уæлдай ма бæстæты минæвæртты фылдæр хайы Украинæйы темæйыл бынтондæр ницы дзырдтой – нæ сæ фæндыд. АИШ-ы экономикон санкцитæ та нымайынц æнæзакъононыл», – фыссы «Washington Post»-ы журналист Карен Де Янг.

ДЖИОТЫ Алыксандр

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.