Nog adres

Адæм, кæрæдзи уарзгæйæ цæрут!

Æрыгон нывгæнджыты куыстытæ уыдзысты Мæскуыйы равдысты

vistavka.pngНæ республикæйы перспективон æрыгон нывгæнджыты куыстытæ бавдыст æрцæудзысты, 22 апрелы Мæскуыйы чи байгом уыдзæн «Уæрæсейы æрыгон нывгæнджытæ», зæгъгæ, ахæм равдыстмæ. Уый уагъд цæудзæн Нывгæнджыты централон хæдзары, - фехъусын кодта РХИ-йы Культурæйы министрады сæйраг специалист, кæцы лæудзæн Хуссар Ирыстоны æрыгон нывгæнджыты делегацийы сæргъ.
Организацион æгъдауæй æрыгон нывгæнджытæн баххуыс кодта республикæйы Нывгæнджыты цæдис æмæ Культурæйы министрад.
Раздæр ма куыд хъусын кодтам, афтæмæй аивады æрыгон хуссарирыстойнаг архайджыты куыстытæ равзæрстой Хуссар Ирыстоны Нывгæнджыты цæдисы æмæ равдысты агъоммæ электронон хуызы бавдыст æрцыдысты Уæрæсейы Нывгæнджыты цæдисы къамисмæ, кæцытæ сæ рады уыдонæй равзæрстой ноджы хуыздæрты.
Организатор - Уæрæсейы Нывгæнджыты цæдисы уавæртæм гæсгæ равдысты сæ куыстытæ гæнæн ис равдисой, 35 азы онг кæуыл цæуы, ахæм нывгæнджытæ.
Се сфæлдыстадон куыстытæ æрыгон нывгæнджытæ бавдыстой аивады ахæм хуызтæй: хуызфыссынад, скульптурæ, графикæ, монументалон аивад, адæмон аивад, аивадзонынад æмæ æндæртæ. Равдыст байгом кæнынмæ бацæттæ æрцæудзæн «Уæрæсейы æрыгон нывгæнджыты» каталог.

Зæронд бæлæсты бынаты - назбæлæсты талатæ

marfa.jpgБæлас адæймагæн æнæниздзинад хæссæг у. Уымæн фæзæгъынц: «Хъуамæ алы адæймаг дæр æнæмæнг йæ царды сараза хæдзар, ныссадза бæлас æмæ рауадза цот». Нæ горæт рагæй дæр цæвиттойнаг уыд: бирæ бæлæстæ сагъд дзы уыд æмæ цъæх-цъæхидæй зындысты. Уæлдай рæсугъд æмæ аив та дардтой сæхи, Мæскуыйы уынджы цы цъæх назбæ-лæстæ уыд, уыдон. Сагъд уыдысты уынджы дыууæ фарс æмæ æнæниз-дзинады хос уыдысты, ам цы адæм цæрынц, уыдонæн.
Хъыгагæн, уыдон хъыгдард баййæфтой, ацы уынг капиталонæй арæзт куы æрцыд, уæд. Куыд зонæм, афтæмæй ам канд асфальт æвæрд нæ цыд, фæлæ ма баивтой коммуникацийы æппæт хызæгтæ дæр. Хæрзарæзтады кусджытæ кæд тырныдтой, цæмæй æнусон нæзыты уидæгтæ ма бахъыгдарой, уæддæр æндæр гæнæн кæй нæ уыд, уымæ гæсгæ лыг æрцыдысты иуæй-иу бæлæстæн сæ уидæгтæ.
Тæссаг уыд дымгæ бон мыййаг куы рафæлдæхой бæлæстæ, æмæ зиан куы æрхæссой, канд, уынджы хæдзæрттæн нæ, фæлæ, сæ бынты чи цæуы, уыцы адæймæгтæн дæр.
Мæскуыйы уынджы цæрджытæ æрæмбырд кодтой къухфыстытæ, æмæ сæ бахастой горæты администрацимæ. Сæ куырдиаты уыдон домдтой, цæмæй сæ бахизой фыдбылызæй - дымгæ бон бæлæсты змæлдæй бæрæг у, сæ уидæгтæ фидар кæй нал сты æмæ тæссагдзинад кæй хæссынц.

Æвзонг натуралистты станц - скъоладзауты уарзондæр бынат

IMG_20160405_122202.jpgРæзгæ фæлтæрæн æрдзмæ, хъæддаг сырдтæ æмæ хæдзарон цæрæгойтæм уарзондзинад сæвзæрын кæнын, аудгæ ахастыл сæ сахуыр кæнын æнцон куыст нæу. Уый домы тынг бирæ рæстæг æмæ уавæртæ.
Цхинвалы Æвзонг натуралистты станцы кусджытæ ныр æрдæг æнусæй фылдæр цæсгомджынæй æххæст кæнынц ацы куыстытæ скъоладзау фæсивæдимæ æмæ сын, кæй зæгъын æй хъæуы, æнтыстытæ дæр ис. Ацы станц кусын райдыдта 60-æм азты æмæ уæдæй нырмæ цал æмæ цал æвзонг фæлтæрæн бацамыдтой йæ кусджытæ æрдзмæ, цæрæгойтæ æмæ зайæгойтæм аудгæ ахаст дарын, уыдоны цардуагон уавæрты сусæгдзинæдтæ. Æрдæг æнусы дæргъы ацы станцы дуæрттæй цал æмæ цал сабийы рахызт, - ам ссардтой сæ чысыл зæрдæтæн æнцойдзинад æрдзимæ комкоммæ «ныхас кæнгæйæ». Нæ республикæйы æппæты зындæр дуджы дæр станц йæ дуæрттæ бирæ рæстæг нæ ныууагъта æхгæдæй, кæд сын кусыны уавæртæ тынг хорз нæ уыдысты, уæддæр.
Æвзонг натуралистты станцы директор Мæргъиты Ирбег нын куыд загъта, афтæмæй станцмæ ныртæккæ цы скъоладзаутæ цæуы, уыдоны нымæц у 450 бæрц. Уыдон сты æртыккаг къласæй иуæндæсæм къласы онг кары сабитæ. Сахатты нывæст конд у скъолайы ахуырты рæстæгыл бындуриуæггæнгæйæ, æмæ уымæ гæсгæ сты дыууæ сменæйы - боны 12 сахатыл æмæ сихоры 14 сахатыл.
«Ныртæккæ махмæ цæуынц сабитæ горæты алы скъолатæй дæр, ис нын скъолаты къухдариуæггæнджытимæ бадзырдтæ. Станцы агъуыст горæтмæ тынг дард кæй у, уый тыххæй сабиты æрбакæнæм автомашинæйыл. Нæ машинæ тынг рагон у æмæ фехæлы арæх, уæд мах дæр æмæ сабитæ дæр февзарæм зындзинæдтæ. Сабитæ нæм цæуынц райгондæй, фæцух кæнын сæ нæ фæфæнды станцы ахуыртæй æмæ уый тыххæй мах дæр амæлттæ кæнæм, цæмæй машинæйы тыххæй ма æвзарой зындзинæдтæ»,- загъта станцы директор Мæргъиты Ирбег.

Куы уа тырнындзинæдтæ - уыдзæн æнтыстытæ дæр

SAM_2897.JPGКуыд зонæм, афтæмæй æрæджы Хетæгкаты Къостайы номыл Хуссар Ирыстоны паддзахадон драмон театры аивадон къухдариуæггæнæгæй нысан æрцыд не 'мзæххон Дзуццаты Тамерлан. Нæ уацхæссæг фембæлд йемæ, ныхас кодтой театры абоны æмæ сомбоныл. Дæлдæр мыхуыр цæуы сæ ныхас.
- Тамерлан, райдианы мæ фæнды, цæмæй дын раарфæ кæнон дæ ног куысты тыххæй. Уæд дын æнæниздзинад, дæхи æмæ сценæмæкæсджыты зæрдæтæ чи рухс кæна, ахæм æнтыстытæ?
- Дæуæн, стæй редакцийы æппæт кусджытæн дæр стыр бузныг уæ арфæ æмæ æрхъуыдыйы тыххæй. Æз архайдзынæн, æппæт дæр араздзынæн, цæмæй ирон театруарзджытæ райгонд уой мæ куыстæй.
- Зæгъ-ма, æнæнхъæлæджы дын уыд театры аивадон къухдариуæггæнæгæй дæ снысан кæндзысты, уый. Хабар фыццаг кæмæй фехъуыстай ?

Боныгъæды æндæвдад адæймаджы æнæниздзинадыл

Yeni-Üniversite.jpgХатт горæты цæрджыты бынтондæр æрбайрох вæййы, адæймаг кæй у æрдзы хъæбул, бæлвырддæрæй та - стыр хъомысджын системæйы иу хай, кæцыйы фæзындтыты мах банкъарæм дымгæ куы фæдымы, къæвда кæнæ мит куы фæуары, уæд. Æмæ мах цасфæнды нæхи ма хизæм æрдзы фæзындтытæй, уæй уæддæр уый нæ къухты æххæстæй никуы бафтдзæн.
Уымæн æвдисæн у боныгъæды æндæвдад адæймаджы æнæниздзинадыл. Ахæм фæзындтытæ, куыд атмосферон æлхъывдад, уæлдæфы уымæлад æмæ температурæ куыд æндавынц нæ хиæнкъарынадыл, уый тыххæй дзырд цæуы ацы уацы.

Боныгъæды æндæвдад адæймаджы æнæниздзинадыл кæддæриддæр у индивидуалон

Ис ахæм адæймæгтæ, кæцытæ сæ царды уавæртæ æмæ архайдмæ гæсгæ арæх цæуынц иу ранæй иннæ ранмæ, иу бæстæйæ иннæ бæстæмæ æмæ бахауынц куы тæвд бынатмæ, куы та - уазал бынатмæ. Æмæ бирæтæ уый æппындæр ницæмæ æрдарынц. Бирæтæ та йæ зынтæй сфæразынц æмæ хуыздæрыл банымайынц ахæм балцыты нæ цæуын.

Бавдыст æрцыд Джусойты Нафийы номыл литературон премимæ

vladikavkaz1423636500big.jpgМАСТ ÆМÆ ЦÆССЫДЖЫ ДЗÆКЪУЛТÆ…
2014 азы Наниты Асиатæн мыхуыры рацыд йе сфæлдыстадон куыстыты æмбырдгонд «Уацмыстæ». Ам сты йæ уацаутæ, йæ радзырдтæ-æцæг хабæрттæ, тæлмæцтæ. Иудзырдæй, йе сфæлдыстадон фæллæйттæ иумæ рахаста чиныгкæсджыты размæ. Раст зæгъгæйæ, уый тынг бæркадджын æмæ цæсты ахадгæ хуын у ирон аив дзырдуарзаг дзыллæйæн. Ацы æмбырдгондмæ хаст æрмæджытæ йæ рæстæджы хицæн чингуытæй мыхуыр æрцыдысты æмæ сæ чиныгкæсæг тынг зæрдиагæй айста. Сæ хъуыдытæ дæр ын загътой, æмæ авторæн та чиныгкæсæджы хъуыды æппæты стырдæр æмæ зынаргъдæр лæвар у - йæ дарддæры куысты стимулдæттæг æмæ ног уацмыстæ сфæлдисынæн разæнгардгæнæг.
Фыссæг царды йæхæдæг цытæ бав-зары, йæхи сæрмагонд цæстæй цытæ фены, уыдæттæ йын аив дзырдæй зæгъын зын ма хъуамæ уа, фæлæ, раст зæгъгæйæ, алы хатт æмæ алы фыссæгæн йæ фыст ахæм нæ рауайы, рæбынмæ чи нынкъуысын кæна чиныгкæсæджы зæрдæ. Цалын-мæ аргументтæ æрхæссон, уæдмæ йæ развæлгъау зæгъын - Нанионæн ацы зын куыст бантыст æмæ мын тынг æхсызгон у.

Стыр Уæлахизы бонмæ/ КÆСТÆР ÆФСЫМÆР

Ивгъуыд æнусы 20-30 азты цы фæсивæд рахъомыл, уыдонмæ амонд йæ мидбылты нæ бахудт. Иуæй дугивæнмæ æрхауд сæ цард, зæронд цардæвæрды ивта ног æмæ уый та баст уыдис тохимæ, гæвзыкдзинадимæ, бирæ хъизæмæрттимæ. Иннæмæй та сæм разæй æнхъæлмæ каст ноджы стырдæр фыдæвзарæн Стыр Фыдыбæстæйон хæст, кæцы мингæйттæй, милуангæйттæй нынныхъхъуырдта, цард аразынæн чи райгуырдысты, уыцы гъæйттмардзæ лæппутæ æмæ чызджыты.
Хæст йæ иувæрсты нæ ахызт Дзауы районы Хуымысæрты хъæуккаг цардæмбæлттæ Никъа æмæ Пенайæн дæр. Цалынмæ нæ райдыдта, уæдмæ уыдонæн сæ зæнæг конд уыдысты баисты аст сывæллоны мад æмæ фыд. Ныры рæстæджы махмæ диссаг фæкæсы, уыйбæрц сывæллæттæ искæмæн ис, уый куы фехъусæм, уæд. Уыцы рæстæджы та кæмæн ноджы фылдæр уыд, кæмæн та чысыл къаддæр. Æмæ алы хæдзары дæр уыйбæрц бинонты 'хсæн цы лæппутæ рахъомыл сты, уыдоны хæст ассывта…
Никъа æмæ Пенайæн æхсæз фырты уыдис. Уыдонæй сæ иу хæсты агъоммæ 17 аздзыдæй, йæ лæджы кары куы бацыд, уæд фæзиан. Бавзæрстой кæстæры рис æмæ ныр, хæст куы райдыдта, уæд сæ рыст зæрдæтæ ноджы ныккæрзыдтой. Хæсты туг кæлы, хæсты маргæ кæнынц, сæ хæдзары та хæстхъом лæппутæ ис…

Дзадтийы фæдонтæй иу – Тотырбег

dzhatiev_totyr.jpgТотырбег уыд Дæллаг Сыбайаг, уым райгуырд 1910 азы,уым арвыста йæ сабион бонтæ дæр. Нæ уыдысты нывыл Тотырбегæн йæ уалдзыгон бонтæ.1919 азы фæхъуыд йæ мад, 1920 азы та - йæ фыд Гуырдзыйы меньшевикты ныхмæ тохгæнгæйæ. Сидзæр сабитæ ма аирвæзтысты Дзæуджыхъæумæ, фæлæ сын цард агурын фæзын.
Дæсаздзыд Тотырбег баззад уынджы къæйыл йæ кæстæртимæ, йæ дыууæ хо æмæ йæ иунæг æфсымæримæ. Тотырбег æвзонгæй ссис бинонты «дарæг», æххуырсты куыстæй иста маамæлайы къæбæры фаг æмæ дзы ирвæзын кодта сидзæрты.
Советон хицауад куы æрфидар, уæд Хуссары Ир йæ пырх æмæ сыгъд уæзгуытæм здæхын райдыдтой. Кæй нал бафæндыд, уыдонæн Цæгат Иры зæххы хай радтой Терчы галиу фарс. Ног æрцæуджытæ сарæзтой хъæу æмæ йæ схуыдтой Ногир (Нæуæг Ир). Уым æрбынат кодтой Исмæлы сидзæртæ дæр 1923 азы. Тотырбег ма уæддæр фыййауы лæдзæг фæхаста 1926 азмæ. Уæд бам-бæрста чиныджы ад, цалынмæ скъоламæ нæ бацыд, уæдмæ базыдта кæсын æмæ фыссын.
Дзæуджыхъæуы типографи ирон сидзæрты мад уыд, уым райдыдта кусын Тотырбег дæр. Бон - кусгæ, æхсæв - ахуыр. Æвзонг лæппу фердæхтджын уыд, уайтагъд æй райстой фæскомцæдисы рæнхъытæм. Фæкуыста дзы æртæ азы, стæй йæ ракодтой Дзæуджыхъæуы горкоммæ. Уæд йæ тæмæны уыд колхозон арæзтад, хицауад арæх æрвыста Тотырбеджы хъæутæм.

Æмбырд тыхон структурæты къухдариуæггæнджытимæ

Знон РХИ-йы Президент Тыбылты Леонид æмбырд ауагъта барадхъахъхъæнæг министрадтæ æмæ ведомствоты къухдариуæггæнджытимæ, цыран хайад райста республикæйы Генералон прокуроры бынатмæ нысанæрцæуæг Дзæгъиаты Уырызмæг дæр, - фехъусын кодта Президенты пресс-секретарь Гана Яновская.
Тыбылты Леонид банысан кодта, зæгъгæ йын йæ кандидатурæйы бавдыста республикæ-йы Парламентмæ æмæ æмхъæлæсæй депутатон корпус рахæцыдис йе 'вварс.
Президент загъта ахæм ныфс, зæгъгæ, Генералон прокуратурæ дарддæр эффективон куыст кæндзæн, йæ разы цы фарстатæ лæууынц, уыдон скъуыддзаг кæныны фæдыл.
Йæ рады республикæйы ног Генералон прокурор æппæт профилон ведомствоты йæ коллегæтæм сидгæйæ, банысан кодта, зæгъгæ, фæнд кæны йæ куыст æххæст æмархайдæй æххæст кæнын.
Дарддæр байхъуыстæуыд, Тыбылты Леонид уый размæ æмбырдты цы хæслæвæрдтæ радта, уыдоны фæдыл хыгъдтæ. Æввахс рæстæджы цы фарстатæ хъуамæ скъуыддзаг æрцæуой, уыдоны 'хсæн сты фæсивæд иууыл тынгдæр кæм æмбырд кæнынц, ахæм бынæттæ раргом кæнын, азартон хъæзтытæ ма ‘руадзын, кæцытæн бар нæй республикæйы архайæг закъондæттынадмæ гæсгæ. Ацы фарст хъуамæ æдзухдæр уа тыхон ведомствоты хъусдарды бын.

20-æм апрелæй нæ республикæйы фæаслам уыдзысты бензин æмæ дизелон æртаджы æргътæ

18-æм апрелы Экономикæ æмæ сæудæджерады ми-нистр Зæгъойты Вильям дзыллон информацийы фæрæзтæн пресс-конференци уадзыны рæстæджы фехъусын кодта æхсызгон информаци: «РХИ-йы Президент Тыбылты Леониды бахæсмæ гæсгæ паддзахадон унитарон куыстуат «Югосетнефтпродукт» ауагъта бадзырдтæ Уæ-рæсейы компани «Роснефть»-имæ, кæцы у нæ республикæйы официалон ифтонггæнæг нефтепродукттæй. Абоны бон Паддзахадон унитарон куыстуат «Югосетнефт-продукт» æртагæй ифтонггæнæнты АИ-92 бензины 1 литры аргъ у 32 сомы, дизелон æртаджы аргъ та - 30 сомы.
Ацы фарстмæ нæ ифтонггæнджытæ равдыстой лæмбынæг ахаст æмæ баныхæсты фæстиуджытæм гæс-гæ фæндон рахастæуыд, ацы нефтепродукты аргъ иу сомы бæрц фæасламдæр кæнын», - загъта министр.

Прокуратурæйы коллективæн базонгæ кодта Генералон прокуроры

IMG_5653.JPGЗнон, 18 апрелы Республикæ Хуссар Ирыстоны Президент Тыбылты Леонид официалон æгъдауæй базонгæ кодта Генералон прокуратурæйы коллективæн ног снысангонд прокурор Дзæгъиаты Уырызмæджы.
Йæ раныхасы Тыбылты Леонид зæрдыл æрлæууын кодта, дзæнæттаг Цгъойты Мерабы трагикон мæлæт нæ прокуратурæ æмæ нæ адæмæн стыр зиан кæй уыд. Фæлæ, зæгъгæ, цард дарддæр кæны - нæ Республикæйы къухдариуæгад æмæ Парламент иумæ уынаффæ райстой Генералон прокурорæй Дзæгъиаты Уырызмæджы снысан кæнын. Тыбылты Леонид прокуратурæйы кусджыты базонгæ кодта Уырызмæджы цард æмæ архайдимæ. Уый у не 'мзæххон, куыста Уæрæсейы Федерацийы Мидхъуыддæгты министрады системæйы, сæрмагондæй та министрады фæдагурæн управленийы Сочæйы фæдыл. У юстицийы булкъон.
«Генералон прокуратурæйы коллектив кусынц нæ адæмы хæрзæбонæн, æмæ ацы коллективæй мæн стыр ныфс ис, - ацы куыст дарддæр дæр кæндзæн. Æнтыстыты æмрæнхъ ис хъæндзинæдтæ дæр, уымæ гæсгæ хъæуы кусын нæ бæстæйы Конституци æмæ закъæттæм гæсгæ. Ныртæккæ мах стæм бæстæйы сабыр цардарæзтады фæндагыл æмæ Уæрæсеимæ нæ ахастытæ ноджы æнгомдæр кæныныл», - дзырдта Тыбылты Леонид.
Уый ма куыд банысан кодта, уымæ гæсгæ республикæйы Генералон прокуратурæ бирæ бакуыста 2008, 2009 азтæй фæстæмæ паддзахадон исад давыны цаутæ сбæлвырд кæныныл. Уыцы уавæр бирæбæрцæй рарастгонд æрцыд.

Паддзахадон Думæ сратификаци кодта паддзахадон арæны тыххæй бадзырд Хуссар Ирыстонимæ

gosduma.jpgМайрæмбоны Паддзахадон Думæ сратификаци кодта паддзахадон арæны тыххæй бадзырд Хуссар Ирыстонимæ. Ууыл къухфыст æрцыд 2015 азы 18 февралы Мæскуыйы. Документ æркæсынмæ бахаста УФ Президент Владимир Путин.
«Бадзырд у дыууæ бæстæйы æхсæн арæнæвæрд бæлвырдгæнæн бындурон документ Уæрæсейы, Хуссар Ирыстоны æмæ Гуырдзыстоны арæнты ныгуылæн сныдзæвæн тæппæй Уæрæсейы, Хуссар Ирыстоны æмæ Гуырдзыстоны паддзахадон арæнты скæсæны сныдзæвæн тæппы онг æппæт дæрддзæгыл. Уыдонæн сæ æрæвæрыны бынат хъуамæ бæлвырдгонд æрцæуа хицæн æртывæрсыг бадзырдты руаджы». - дзырдæуы æмбарынгæнæн фысты.
УФ-йы Фæсарæйнаг хъуыддæгты министр Григори Карасин куыд фехъусын кодта, афтæмæй бадзырд депутатты размæ рахæсгæйæ, уый сратификаци кæныны хъуыддаг ратдзæн æхсæндунеон-барадон æгъдауæй арæн снысан кæныны æмæ йæ демаркацимæ æрæвналыны фадат.

Штабы рабадт/ ТЫБЫЛТЫ ЛЕОНИД: «2016 азæн Инвестпрограммæ хъуамæ æххæст æрцæуа æххæст гуырахстæй»

zasedanie.pngРХИ-йы Президент Тыбылты Леониды сæргълæудæй 16-æм апрелы уыдис 2016 азæн Хуссар Ирыстоны социалон-экономикон рæзтæн ахъазгæнæг Ивестицион программæ реализаци кæныныл контролы фæдыл оперативон штабы радон рабадт. Йæ куысты хайад райстой министрадтæ æмæ ведомствоты къухдариуæггæнджытæ, афтæ ма арæзтадон объектты архайæг подрядон организациты минæвæрттæ.
Тыбылты Леонид банысан кодта, зæгъгæ, 2016 азы мах хъæуы бакæнын куыстыты стыр гуырахст. «Хуссар Ирыстонæн 2016 аз у бæрнон æмæ ахсджиаг аз. Йæ ахсджиагдзинад, сæйраджыдæр, уый мидæг ис, æмæ мах кæй фæуд кæнæм, æндидзынгæнæн куыстытæ æмæ объектты арæзтады чи кусынц, уыцы организацитæ æппæт дæр хъуамæ саразой, цæмæй рæстæгыл сæххæст кæной, сæ разы цы хæстæ лæууынц, уыдоны», - загъта уый.
Рабадты рæстæджы Хицауады уæнг-тæ, комитетты сæрдæрттæ æмæ Ин-вестпрограммæйы объектты арæзтады архайæг организациты къухдариуæггæнджытæ радзырдтой, арæзтадон-æндидзынгæнæн куыстытæ куыд æмæ цы темптæй цæуынц, афтæ ма арæзтады процессы цы проблемæтæ фæзынынц, уыдоны тыххæй.
Арæзтад, архитектурæ æмæ цæрæнуатон-коммуналон хæдзарады министр Зæгъойты Эдуард радзырдта, республикæйы столицæйы æмæ районты æппæт арæзтцæуæг объектты дæр хицæнтæй куыстытæ куыд цæуынц, уыдæтты тыххæй. Сæ рады арæзтадон организациты къухдариуæггæнджытæ дæр лæмбынæг æрдзырдтой, сæ бæрнуæвæг объектты куыстытæ куыд цæуынц, уый тыххæй.

Акци «Стыр уæлахизы стъалы»

IMG_4675.JPG Майрæмбоны, Цхинвалы Кады аллеяйы раз уагъд æрцыд Стыр Уæлахизы бæрæгбоны 71 азы сæххæсты цытæн акци «Стыр Уæлахизы Стъалы». Акци уагъд цæуы æрвылаз дæр Уæрæсейы æхсæнадон-патриотикон проект «Не стыр Уæлахиз»-ы фæлгæтты. Æппæтадæмон æхсæнадон-патриотикон автозгъорд «Стыр Уæлахизы Стъалы»-йы колоннæтæ сæ бæрæгбонон фæндаг райдыдтой фондз горæтæй - Севастополь, Архангельск, сакъадах Русский, Дербент æмæ Брестæй. Фондз горæты нысан кæнынц Сырх стъалыйы фондз тигъы. Колоннæтæ сæ фæндаг акæндзысты Уæрæсейы территорийыл 90 горæтыл æмæ фембæлдзысты горæт Владимиры, уый фæстæ акцийы автозгъорд цытджын æгъдауæй фæуыдзæн Мæскуыйы.
Цхинвалмæ æрцæуæг колоннæ йæ фæндаг райдыдта Дербентæй æмæ æрхæццæ ис 14 апрелы изæры. Майрæмбоны15 апрелы акцийы хайадисджытæ Цхинвалы Кады аллеяйы цытджын æгъдауæй сæвæрдтой дидинтæ Æнусон арты цырты раз.
Митинг æрбайгом кодта Фæсивæды политикæ, спорт æмæ туризмы комитеты къухдариуæггæнæг Гатыгкоты Валентинæ.
«Стыр Фыдыбæстæйон хæсты рæстæджы Советон адæм æрбангом сты æмæ сарæзтой æнæбасæтгæ æфсад. Хъаруджынæй тох кодтой знаджы ныхмæ æмæ, æппæт зындзинæдты сæрты ахизгæйæ, æрхастой уæлахиз, - загъта уый. Нæ сæрæй ныллæг кувæм Фыдыбæстæйон хæсты хъайтартæн æмæ, чидæриддæр йæ цард снывонд кодта æппæт адæмы хæрзæбоны тыххæй, уыдонæн. Уыдон сæ хæстон фæндаг фесты знаджы нæмыгæй æмæ нын сæ мæлæт ссаргæйæ, ныффæдзæхстой нæ Фыдыбæстæ бахъахъхъæнын. Махæн нæ бон нæу уыдоны фæстæмæ раздахын, фæлæ нæ бон у сæ кадджын нæмттæ сын макуы ферох кæнæм. Нæ хъайтарты нæмттæ цæрдзысты уæдмæ, ца-лынмæ цæрæм мах».

Гуманитарон æххуысы æмбæхст хъуыдытæ

Фыдæлтæй нын баззад ахæм хъуыды, зæгъгæ, мах не 'ппæт дæр Хуыцауы ратгæ стæм. Уымæ гæсгæ нæ хорз хабæртты рæстæджы буц вæййæм Хуыцауæй, зæгъгæ, уый фæрцы, уый фæндондзинадмæ гæсгæ ныл цæуы ахæм хорз хабæрттæ. Хъыгты рæстæджы дæр нæ зонæм буцтæ æмæ тæргæйттæ, фæлæ фæзæгъæм, зæгъгæ, Хуыцауы бон дæр нын нал бацис баххуыс кæнын. Авæрдтам-иу ныфсытæ дæр, зæгъгæ, Хуыцау хъыг кæнын куыд зоны, афтæ зоны барæвдауын дæр. Рæвдаугæ та арæхдæр фæкæны, алы хъуыддаджы дæр раст чи у, ахæм адæймæгты. Хуыцау, дам, адæмты куы фæлдыста, уæд, дам, се 'ппæтæн дæр бахай кодта кæрæдзимæ стыр æмæ хорз уарзты ахастытæ. Уыцы ахастытæ сæдæгай азты хæлд нæ цыдысты æмæ кæд адæм раздæр мæгуырдæр цардысты, уæддæр сæ цард кодтой æнгомдæр æмæ кæрæдзи уарзгæйæ. Хъыгагæн, абон адæмæй бирæтæ нал тæрсынц тæригъæдæй æмæ искæй æнæхъуаджы бафхæрынæй. Хуыцау та, дам, ахæмты фефхæры арæхдæр. Иуæй-иутæ фæзæгъынц, зæгъгæ, цард аразыныл чи ныллæууыд, кæстæры кæстæртæм чи кæсы, уыдон ма хъуамæ аразой, Хуыцау æмæ адæммæ хъыг чи фæкæса, ахæм митæ. Хъыгагæн, не 'хсæн сбирæ сты, иу иннæйы мæгуырау цардмæ чи бæллы, ахæмтæ æмæ æмткæй нæ цард сцыдæргъуызон ис. Ацы хъуыдытæ мæ алыварс æнæ-хъуаджы не 'ртымбыл сты…

RSS-материал