Nog adres

Адæм, кæрæдзи уарзгæйæ цæрут!

Президент Тыбылты Леонид фембæлд Цхуырбаты Къазбулатимæ

Республикæ Хуссар Ирыстоны Президент Тыбылты Леонид йæ къух æрфыста республикæйы Фæсарæйнаг хъуыддæгты министр Цхуырбаты Къазбулаты йæ бынатæй ссæрибар кæныны тыххæй барамындыл.
Уый хæдразмæ Тыбылты Леонид фембæлд министримæ, æмæ Цхуырбаты Къазбулат уыцы фембæлды рæстæджы бафидар кодта йæ бæрнон бынат ссæрибар кæныны фæнд.
Призидент æмбарындзинад равдыста министры куырдиаты фæдыл æмæ цымыдис кодта, Цхуырбаты Къазбулат йæ ацæуыны фæстæ цы куыст кæнинаг у, уымæ.
Президенты хъуыдымæ гæсгæ, Цхуырбаты Къазбулат у перспективон специалист æмæ йæ арæхстдзинадæй дарддæр дæр уыдзæни спайдагæнæн.

Республикæ Хуссар Ирыстоны Президенты Барамынд

Цхуырбаты Къазбулат Иналы фырты тыххæй
Республикæ Хуссар Иырстоны Конституцийы 50-æм статья 7 пунктæй къухдариуæггæнгæйæ барамынд дæттын:
1. Цхуырбаты Къазбулат Иналы фырт сæрибаргонд æрцæуæд Республикæ Хуссар Ирыстоны Фæсарæйнаг хъуыддæгты минстры бынатæй.
2. Ацы Бармынд йæ тыхы цæуы къух ыл æрфыссыны бонæй.

Республикæ Хуссар Ирыстоны Президент ТЫБЫЛТЫ Леонид

Республикæ Хуссар Ирыстоны Президенты Барамынд

Цхуырбаты Андрей Викторы фырты Республикæ Хуссар Ирыстоны Фæсарæйнаг хъуыддæгты министры хæстæ рæс-тæгмæ æххæстгæнæгæй снысан кæныны тыххæй
1. Республикæ Хуссар Ирыстоны Фæсарæйнаг хъуыддæгты министры фыццаг хæдивæг Цхуырбаты Андрей Викторы фырт нысангонд æрцæуæд Республикæ Хуссар Ирыстоны Фæсарæйнаг хъуыддæгты минист-ры хæстæ рæстæгмæ æххæстгæнæгæй.
2. Ацы Барамынд йæ тыхы цæуы къух ыл æрфыссыны бонæй.

Республикæ Хуссар Ирыстоны Президенты Барамынд

IMG_7032.JPG
Республикæ Хуссар Ирыстоны Президенты цур Сывæллæтты барты фæдыл Æххæстбарджыны тыххæй

1. Козаты Гульнарæ Роланды чызг нысангонд æрцæуæд Республикæ Хуссар Ирыстоны Президенты цур Сывæллæтты барты фæдыл Æххæстбарджынæй.
2. Ацы Барамынд йæ тыхы цæуы къух ыл æрфыссыны бонæй.
Республикæ Хуссар Ирыстоны Президент ТЫБЫЛТЫ Леонид
г. Цхинвал, 2016 азы 22 апрель

* * *
РХИ-Йы Президент Тыбылты Леонид Сывæллоны барты фæдыл Республикæйы Президенты цур æххæстбарджыны бынатмæ снысан кодта Козаты Гульнарæйы.
Президент фембæлд Козаты Гульнарæимæ æмæ банысан кодта, зæгъгæ, хорз зонгæ у йæ архайдимæ æмæ йын раарфæ кодта, бæрнон бынатмæ нысан кæй æрцыд, уый фæдыл.
«Ды бирæ рæстæджы куыстай ахуырады къабазы, хъомыл кодтай нæ сывæллæтты, нæ республикæйы æрыгон фæлтæры. Уый у ахсджиаг хъуыддаг. Республикæйы разамынад иттæг серьезон ахаст дары, рæзгæ фæлтæримæ, фæсивæдимæ баст проблемæ æмæ фарстытæм. Кæй зæгъын æй хъæуы, ацы къабазы мах нырма хъæуы бирæ саразын. Ам, мæн ныфс ис, дæумæ чи ис, уыцы фæлтæрддзинад æмæ практикæйæ пайда кæй æрцæудзæнис нæ иумæйаг куысты», - загъта Президент.

Тыбылты Леонид: «Тедеты Дзамболат кæддæриддæр уыдзæн нысантырнæн æмæ лæджыхъæдæй æххæст адæймаджы аккаг дæнцæг»

Республикæ Хуссар Ирыстоны Президент Тыбылты Леонид раарфæ кодта Тедеты Дзамболатæн, Уæрæсейы Федерацийы æмбырдгонд командæйæн уæгъдибар хъæбысхæстæй сæйраг тренерæй снысангонд кæй æрцыд, уый сæраппонд.
Арфæйы фыстæджы сæрмгондæй дзырдæуы:
«Цытджын Дзамболат Ильяйы фырт!
Айс иууыл хуыздæр арфæтæ, уæгъдибар хъæбысхæстæй дæ æппæт Уæрæсейы æмбырдгонд командæйæн сæйраг тренерæй кæй снысан кодтой, уый тыххæй.
Иттæг хорз спортсмен, фæлтæрд тренер æмæ амонæг, Фыдыбæстæйы æцæг патриот, ды бирæ азты дæргъы кадджын кæныс нæ Ирыстоны æмæ Стыр Уæрæсейы спортивон аренæйыл. Нæ республикæйы æрыгон фæлтæрæн ды кæддæриддæр уыдзынæ, йæ ирон дзыллæйы чи кадджын кæны, уарзон Ирыстон æмæ Уæрæсейы кад хъæздыгдæр чи кæны, ахæм нысантырнæн æмæ лæджыхъæдæй æххæст адæймаджы аккаг дæнцæг.
Ныфс мæ ис, лæджыхъæд, уæлахизмæ тырнынад, зонындзинæдтæ æмæ фæлтæрд-дзинад дæуæн уыдзысты аккаг æххуысгæнджытæ Республикæ Хуссар Ирыстон æмæ Уæрæсейы Федерацийы дзыллæты кадæн хæрзиуæгон архайды.

Уæрæсейаг специалисттимæ куысты иумæйаг формæ хорзæрдæм æндавы æнæниздзинад хъахъхъæныны къабазы архайдыл

Æнæниздзинад хъахъхъæныны хаххыл Уæрæсейы Федерацийæ квалификаци-джын специалисттæ æрхонын махæн æнæмæнгхъæуæг у хос кæныны фæстиуджытæ фæхуыздæр кæнын тыххæй, афтæ ма Æнæниздзинад хъахъхъæнынады министрады аппараты чи фæзынынц, ахæм алыгъуызон фарстытæ скъуыддзаг кæныны тыххæй дæр, - ИА «Рес»-æн фехъусын кодта РХИ-йы Æнæниздзинад хъахъхъæныны æмæ социалон рæзты ми-нистр Григори Кулиджанов.
Йæ ныхæстæм гæсгæ нормативон-барадон базæ, кæцы хъуамæ развæлгъау скъуыддзаг кæна æнæниздзинад хъахъхъæныны къабазы фарстатæ, комплектгонд нæу æххæстæй.

85-аздзыд музыкалон скъола

KATIA.jpgАцы азы марты мæйы Тедеты Георгийы номыл Цхинвалы 1-æм музыкалон скъолайыл сæххæст 85 азы. Уый цытæн музыкалон ахуыргæнæндоны актон залы уагъд æрцыд цытджын мадзал. Скъоламæ бахизгæйæ æнкъардæуыд бææгбонон атмосферæ, коллективæн уыд бæрæгбонон зæрдæйы равг. Уагдоны директор Тедеты Маринæ йе рхонгæ уазджытыл æмбæлд зæрдæрайæ.
Мадзалмæ æрбацыдысты РХИ-йы Президент Тыбылты Леонид, Хицауады Сæрдары хæдивæг Пухаты Эрик, РХИ-йы Культурæйы министр Остъаты Мадинæ, Финансты министр Хæбæлаты Азæ, Ахуырад æмæ зонады министр Гасситы Натали, Парламенты Сæрдары хæдивæг Мамиты Инал, парламентон комитеты сæрдар Гæбæраты Юри, горæт Цхинвалы администрацийы сæргълæууæг Æлборты Алан, Ирыстоны Фысджыты цæдисы æмсæрдар Хъазиты Мелитон æмæ æндæр бæрнон адæймæгтæ, афтæ ма мадзалмæ æрбацыдысты Коммунистон партийы минæвæрттæ Коцты Станиславы сæргълæудæй æмæ интеллигенцийы минæвæрттæ.
Цытджын мадзал бацæуæн ныхасæй байгом кодта РХИ-йы Культурæйы министрады сæйраг специалист Жуйкова Наталья. Уый раарфæ кодта æрæмбырдуæвджытæн, бæрæгбонмæ кæй æрбацыдысты, уый тыххæй. Уый фæстæ айхъуыстысты РХИ-йы æмæ УФ-йы гимнтæ. Cæххæст сæ кодта скъолайы хистæркъласонты хор Дзадтиаты Маринæйы къухдариуæгадæй. Мадзалы раныхас кодта 1-æм музыкалон скъолайы директор Тедеты Маринæ: « Стыр бузныг, нæ бæрæгбонмæ кæй саккаг кодтат, уый тыххæй. 85 азы размæ Хуссар Ирыстоны раззагон интеллигенцийы минæвæрттæ Тедеты Петр, Барис Корнаев, Тыбылты Алыксандр æмæ æндæрты инициативæйæ 1931 азы 3-æм марты горæт Сталиниры баконд æрцыд музыкалон скъола. Скъолайы фыццаг директор уыд Владислав Гольсиорский æмæ фыццаг ахуыргæнджытæ та - Плиты Антонинæ æмæ Уанеты Сергей.

Æбæрæгæй сæфт хъайтары бавæрдтой цытджын æгъдауæй

IMG_6771.JPGÆбæрæгæй сæфт æмбæстæгты ссарыны фæдыл цы æртæфарсон Координацион механизм кусы, уый руаджы ацы аз 5 февралы уæрæсейаг фарсы минæвæрттæ хуссарирыстойнаг фарсмæ ралæвæрдтой Тедеты Маиры тыххæй информаци, къам æмæ ДНК (генетикон информацихæссæг анализ).
Ацы æбæрæгæй сæфт æвзонг лæппу 2008 азы августы Гуырдзыстоны агрессийы хæстон архайдтыты рæстæджы фесæфт Хъайтарты уынгæй 12-æм скъолайы территорийæ, фæстаг хатт ма йæ федтой йе 'мбæлттæ уым. Уæрæсейаг фарсмæ мардæй бахауд 2008 азы 21 августы æмæ йæ, куыд æнæбæрæг мард буар, афтæ бавæрдтой Мæздæджы горæты.
Нæ бæстæйы Генералон прокуратурæ Ростовы тæрхондон-медицинон æмæ криминалистон экспертизæйы центры ногæй саразын кодтой Маиры мад æмæ йæ фырты ДНК-тæ, цæмæй æххæстæй бафидар æрцыдаид, æцæгæйдæр, мард буары баззайæццæгтæ Тедейы фырты сты, æви нæ.
29 марты центр официалон æгъдауæй бафидар кодта, æбæрæгæй сæфт æвзонг лæппу Маиры мард буар кæй у.
Тедеты Маиры табæт æрластой йæ райгуырæн хъæу Малдамæ æмæ йæ цытджын æгъдауæй бавæрдтой, цæрынæй цы зæххыл нæ бафсæст, уым.
Фæстаг хæрзбон кæнынмæ йæм æрбацыдысты республикæйы къухдариуæгад Президент Тыбылты Леониды сæргълæудæй, Маиры æввахс хиуæттæ æмæ хæстæджытæ, министрадтæ, ведомствоты сæргълæуджытæ, æхсæнады минæвæрттæ.
Хъахъхъæнынады министрады цытджын караул Президент Тыбылты Леониды номæй бахаста венок.
Фыдохы митинджы Тыбылты Леонид банысан кодта, зæгъгæ, бирæ уæззаудзинæдтæ æмæ зиæнттæ сфæрæзтам, æмæ фидар хъуамæ фæлæууæм. Суанг 20-æм азтæй фæстæмæ цы бавзæр-стам, уый алчи дæр хъуамæ зона.

Иунæг сылгоймагæн балæвар кодтой цæрæн вагон

Гæбæраты Еуа иунæг сылгоймаг у, нæй йын зæнæг, цæры Цхинвалы районы Залдайы хъæуы, фæлæ февралы мæйы йæ хæдзар кæй басыгъд, уый фæстиуæгæн æй бар-æнæбары бахъуыд Цхинвалмæ рацæуын æмæ цалдæр мæйы йæ хæстæджытæм цæрыны сæр. Сылгоймаг йæ тыхстæй куырдиат балæвæрдта Президент Тыбылты Леониды номыл, цæмæй йын баххуыс кодтаид цæрæн вагон самал кæныны хъуыддаджы.
РХИ-йы Президенты Администрацийы контролон управленийы хистæр Къодоты Таймураз куыд фехъусын кодта, афтæмæй æрæджы Президент Тыбылты Леонид тыхон структурæтимæ æмбырды рæстæджы, цыран уыдысты районон администрациты къухдариуæггæнджытæ дæр, æрдзырдта Гæбæраты Еуайы проблемæйыл дæр æмæ банысан кодта, зæгъгæ, сылгоймаг цалдæр мæйы æнхъæлмæ кæсы æххуысмæ. «Æз хицæнæй аныхас кæндзынæн Цхинвалы районы администрацийы сæргълæууæгимæ, кæцы рæстæгыл нæ аскъуыддзаг кодта ацы фарст кæнæ фарст нæ сæвæрдта афтæ, цæмæй проблемæ абон скъуыддзаг æрцыдаид. Ацы ацæргæ сылгоймагæн цыбыр рæстæгмæ баххуыс кæнын хъæуы. Уæ реакцимæ уын æнхъæлмæ кæсдзынæн».

Кафты зилдухæнты

Dschioev.jpgÆхсæвæй куы хицæн кæны бон æмæ дуне йæ дзадджын фынтæй цадæггай хъал кæнын куы райдайы, раст ма уыцы афоны дæр ирдæй тæмæнтæ фæкалынц арвы æгæрон тыгъдады иугай стъалытæ. Ссудзынц цавæрдæр кæлæнгæнæг рухсæй æмæ афтæ фæзыны, уыцы рухсæй райгуыры бон æмæ стъалытæ сæхæдæг дæр боны рухс арвы уæлæ фестынц.
Афтæ уыд Хуссар Ирыстоны зард æмæ кафты паддзахадон ансамбль «Симд»-ы сценæйыл зынгæ кафæг Джиоты Феликсы фæзынд дæр. Æрттивгæ, сæууон стъалыйау ссыгъди йæ курдиат ирон кафты аивады арвыл, стæй уыцы арфæйаджы курдиат райсомы цæхæркалæг стъалыйы рухсау рарттывта ирон сценæйæ. Ацы бонты Феликсыл сæххæст ис 65 азы.
Уæдæ, цæй мидæг ис Джиоты Феликсы æнтыст ирон кафты аивады?
Фыццаджыдæр, йæ удыйас уарзы ирон кафт, ирон музыкæ. Уарзы сæ фанатикон уарзтæй. Æмæ, канд уарзгæ нæ, фæлæ йын радта йе 'ппæт цард, снывонд ын кодта йæхи æгасæй дæр.
Джиоты Феликс ма хæрзкъаннæг куы уыд, уæд фæбæрæг ис, æрдз æй кафæджы арфæйаг курдиатæй кæй фæхайджын кодта, уый. Уайтагъддæр фæбæрæг сты музыкæмæ, кафты аивадмæ йе 'взыгъд-дзинæдтæ. Зæгъæн ис æмæ Феликсæн кафт йæ чысылæй фæстæмæ ссис йе 'мбæлццон. Уый йын кæддæриддæр бæрзонд кодта йæ зæрдæйы равг,уый руаджы тых кодта æмæ саста æппæт зындзинæдтæ дæр. Кафт ын агайдта йæ цардуарзаг зæрдæйы, æнæ кафт ын цард ад нæ кодта æмæ Феликс кафыдис алыран дæр. Сæ хъæуы иу чындзæхсæв куы уыд, кæнæ æндæр бæрæгбонты дæр, уæд ын кæд хъазтмæ рахизын афон нæма уыдис, хæрзкъаннæг ма уыд, уæддæр-иу иннæ кафджытæм гæсгæ кафыдис йæ мидбынаты йæ бицъынæг скъуыдта кафæн фæзмæ.

Арæнтыл уавæр кæддæриддæр хъуамæ уа стабилон

DSC08246.JPG20 апрелы хуссарирыстойнаг-гуырдзиаг арæныл Эргнеты хъæумæ хæстæг уагъд æрцыд Инциденттæ ма æруадзын æмæ сæм хъусдард здахыны фæдыл механизмты фæлгæтты 65-æм фембæлд. Традицимæ гæсгæ механизмты куысты хайад райстой Республикæ Хуссар Ирыстон, Гуырдзыстон, Уæрæсейы Федераци, афтæ Евроцæдис æмæ ЕÆÆО-йы минæвæрттæ.
Механизмты куыстæн хатдзæгтæ аразгæйæ Хуссар Ирыстонæй делегацийы сæргълæууæг, РХИ-йы Президенты Паддзахаддон уынаффæгæнæг Санахъоты Дауыт афтæ радзырдта:
«Фембæлды рæстæджы дзырд цыд цалдæр фарстыл, кæцытæ, фыццаджыдæр, баст сты паддзахадон арæнтæ халыны цаутыл. Хынцыд æрцыд 14-æм ахæм цауы, сæ аразджытæ сты гуырдзиаг æмбæстæгтæ. Æмбæлон процедурæты фæстæ лæвæрд æрцыдысты Гуырдзыстоны фарсмæ. Дыууæ арæнхалæджы фæдыл ма цæуы куыст æмæ уыдон дæр лæвæрд æрцæудзысты».
Арæнтыл уавæр кæддæриддæр хъуамæ уа стабилон - уыцы фарстмæ алы фембæлды дæр здæхт цæуы сæрмагонд хъусдард.
Гуырдзиаг фарс ма рæгъмæ рахаста, æрæджы Ленингоры районы цы гуырдзиаг æмбæстаг Башарули амард, уый фæдыл фарст. Ацы фарсты фæдыл хъуыддаг æхгæд уыд, фæлæ йæ ныййарæг мад сног кодта фæдагурæн мадзæлттæ (фæзынд æм бæрæг фарстатæ). Санахъоты Дауыты ныхæстæм гæсгæ йын бавдыстой механизм, Хуссар Ирыстоны закъоны нормæтæм гæсгæ, кæцыйæ йæ бон у æмæ спайда кæна.

Уæрæсейаг инвестортæ уыдысты Ленингоры районы

Уæрæсейаг инвесторты делегаци уыдис Ленингоры районы. Делегацийы уæнгтимæ балцы уыдысты РХИ-йы Æдасдзинады советы секретарь Плиты Анатоли, хъæууон хæдзарады министр Плиты Витали, мидхъуыддæгты министр Лæууойты Æхсар, паддзахадон унитарон куыстуат «Меллиораци»-йы директор Хуыгаты Владимир.
Ленингоры районмæ æрцæугæйæ, инвесторты делегаци, кæцы план кæны республикæйы хъæууонхæдзарадон сегменты рæзтмæ æхцайы фæрæзтæ бавæрын, базонгæ районы территорийыл агробизнесы рæзты уавæртимæ.
Ленингоры районмæ балц организаци æрцыд уæрæсейаг инвестортимæ æмгуысткæнынады фæлгæтты, кæцытимæ бастдзинад æрбæстон кодта РХИ-йы Президент Тыбылты Леонид 31 марты Мæскуымæ йæ балцы рæстæджы.

Фембæлд уæрæсейаг инвесторты делегациимæ

IMG_5738.JPGРХИ-йы Президент Тыбылты Леонид йæхимæ райста уæрæсейаг инвесторты делегацийы.
Делегацийы сконды Цхинвалмæ æрцыдысты «Опоры России»-йы Правленийы уæнг, арæнгонд бæрндзинады æхсæнад «Крона-маркет»-ы директорты Советы сæрдар Леонид Раков, «Мир без войны»-йы Дунеон фонды вице-президент, арæнгонд бæрндзинады æхсæнад «Дунеон инвестицион системæты» директорты Советы сæрдар Александр Власенко, «Аланы»-йы фонды Правленийы уæнг Михаил Шербик, «Мир без войны»-йы фонды вице-президент, «Мæскуыйы арæзтадон æрмæджыты комбинаты» директорты Советы сæрдар Андрей Чижик æмæ æндæртæ.
Фембæлд организаци æрцыд æмгуысткæнынады æмæ уæрæсейаг инвестортимæ æрæджы нæ республикæйы сæргълæууæг Мæскуыйы цы бастдзинæдтæ æрбæстон кодта, уыдон фæлгæтты.
Фембæлды райдианы Ты-былты Леонид чысыл историон экскурс сарæзта Хуссар Ирыстоны экономикæйы къабазмæ, афтæ ма æрдзырдта ныры уавæрты республикæйы социалон-экономикон рæзты фарстатыл.
«Æхсызгон у, абон мах нæ фембæлд кæй дарддæр кæнæм æмæ Мæскуыйы цы фарстатыл дзырдтам, уыдоныл практикон æгъдауæй кæй бакусдзыстæм. Хуссар Ирыстон кæддæриддæр нымад цыдис аграрон регионыл. Абоны бон республикæйы æмбæстæгты 'хсæн æнкъардæуы хъæууон бынæттæм раздæхынмæ цымыдисдзинад хъæууонхæдзарадон архайды рæзты æмæ зæххы ресурстæй пайда кæныны тыххæй. Раздæ-ры фембæлдтытæ хынцгæйæ, мæн ныфс ис, мах бындур кæй æрæвæрдзыстæм нæ ахастытæн æмæ нæ кæй æркæндзысты дарддæры рæзтмæ, Хуссар Ирыстоны потенциал æмæ ресурстæй раст пайда кæнынмæ», - загъта Президент.

Джиоты Мурат: «Хуссар Ирыстон æмæ Уæрæсейы ‘хсæн паддзахадон арæны тыххæй» бадзырд ноджыдæр дзурæг у, бæстæты æхсæн арæзт кæй цæуынц бадзырдон-барадон ахастытæ»

20160419_111207.jpg«Хуссар Ирыстон æмæ Уæрæсейы Федерацийы 'хсæн паддзахадон арæны тыххæй» Бадзырд йæ тыхы кæй бацыд, уый у, Республикæйы арæнтæ æхсæндунеон-барадон хуызы арæзт кæй цæуынц, уыцырдæм ахсджиаг къахдзæф, - фехъусын кодта Фæсконфликт æрнывыл кæныны фарстыты фæдыл Президенты Æххæстбарджын минæвар Джиоты Мурат.
Йæ ныхæстæм гæсгæ, Бадзырд ноджыдæр иу хатт æвдисæн у Хуссар Ирыстон нымад паддзахад кæй у, æмæ РХИ æмæ УФ-йы 'хсæн кæй арæзтæуы бадзырдон-барадон, æмбар ахастытæ.
«2008 азы 26 августы Уæрæсейы Федераци Хуссар Ирыстоны куы банымадта, уæдæй фæстæмæ дыууæ бæстæйы æхсæн фидаргонд æрцыд иукъорд паддзахадон бадзырдтæ æмæ сразыдзинæдтæ. Уыдон æхсæн ахсджиаг бынат ахсы «Хуссар Ирыстон æмæ Уæрæсейы Федерацийы æхсæн Паддзахадон арæны тыххæй» Бадзырд. Къухфыст ыл æрцыд 18 февралы 2015 азы, - загъта Джиойы фырт. - бадзырдыл бирæ рæстæджы дæргъы куыстой арæны делимитаци æмæ демаркацийы фæдыл дыууæ къамисы - хуссарирыстойнаг фарсырдыгæй къамисы сконды уыдис республикæйы хицауад, ахæм скондæй куыста уæрæсейаг фарс дæр». Иумæйаг куысты фæстиуæг сси 2015 азы 18 апрелы къухфыст кæуыл æрцыд, уыцы Бадзырд. Ныр уый хъуамæ æрцæуа ратификацигонд, зæгъгæ, загъта Джиоты Мурат.

Национ Олимпион комитет саразыныл æруынаффæ кодтой Хуссар æмæ Цæгат Ирыстоны парламентаритæ

olimp-rossia.jpgРХИ-йы Парламенты Фæсивæдон политикæ, спорт æмæ туризмы фæдыл комитеты сæрдар Тедеты Бахва йæхимæ райста Республикæ Цæгат Ирыстон-Аланийы делегацийы, йæ сæргъ РЦИ-А Парламенты депутат Фадзайты Арсен, афтæмæй.
Фембæлды райдайæны Тедеты Бахва раарфæ кодта уазджытæн: «Махæн æхсызгон у не фсымæртыл Хуссар Ирыстоны зæххыл фембæлын. Мах аргъ кæнæм уымæн, æмæ сымахæн ахæм хъусдард æмæ цыты ахаст кæй ис хуссайраг ирæттæм, æмæ уæлдайдæр та рæзгæ фæлтæрмæ. Уæ архайды руаджы махмæ баконд æрцыдысты къорд спортивон объекты, уыцы нымæц, уæ хайадистæй æндидзыд æрцыд стадион дæр».
Йæхи 'рдыгæй, Фадзайты Арсен банысан кодта, зæгъгæ, йын æхсызгон у Хуссар Ирыстонмæ кæй æрцыд æмæ йе фсымæрты кæй федта, уый. Раарфæ кодта йæ хуссарирыстойнаг коллегæйæн ахæм хъармæй йæ кæй райста, уый тыххæй, æмæ банысан кодта дыууæ ирон республикæты 'хсæн ахастыты ахсджиагдзинад. Уый ма æрдзырдта Хуссар Ирыстоны Олимпион комитетæн бындур æрæвæрыны фарстыл дæр.

RSS-материал