Nog adres

Дзырдæппарæн/ Кæй хъæуы ахæм куыст?

«Зæхх - нæ дарæг».
«Зæхмæ куыд базилай, афтæ дæ барæвдаудзæн». Æмæ ноджы цас хъарм ныхæстæ ис загъд нæ радтæг зæххы тыххæй. О, уый, æцæгдæр, афтæ у, уымæн æмæ адæймаг зæххæй бирæ хорздзинæдтæ зоны, йæ сойæ цæры. Уымæ гæсгæ йæ хъуамæ ма хъыг кæнæм, фæлæ йыл аудæм æппынæдзух, цæмæй нæ цух ма уадза йæ бирæ хæрзиуджытæй.
Хъыгагæн, алы хатт афтæ нæ вæййы æмæ нæ уый æфтауы сагъæсы. Ау, цæмæн ыл суæлæхох стæм, цæмæн æй уадзæм рохуаты, куыдфæндыйы цæстæй йæм цæмæн акастыстæм? Мæ хъуыды фæбæлвырддæр кæныны тыххæй цæвиттонтæ дзæвгар сты. Уыдонæй зæгъдзынæн иуы тыххæй æмæ уæд фæхатдзыстæм, зæхмæ нын цахæм ахаст æмæ уарзт ис, уый.
Кæд чысыл афæстиат кодтой, уæддæр а-уалдзæджы Республикæ Хуссар Ирыстоны Хъæууон хæдзарады министрад сфæнд кодта хъæбæрхор байтауын Цхинвалы районы Къостайыхъæуы хæдзарады. Раст зæгъгæйæ сыл куыстæй зæрдæ нæ бахудт фæцырд сты æд техникæ æмæ бавнæлдтой сæ куыст æххæст кæнынмæ. Уыцы иурæстæджы йæ хуым дæр кодтой, культиваци дæр æмæ таугæ дæр. Ахæм æнæзæрдæхудт æмæ хъаруджын куысты руаджы дæсгай гектартæ тыд фесты иу бонмæ. Уый æхсызгон уыд, кæй зæгъын æй хъæуы, канд кусджытæн нæ, фæсивæдæй сæм чи каст, уыдонæн дæр æхсызгондзинады æнкъарæнтæй дзаг кодтой сæ зæрдæтæ. Æгайтма, зæгъ, ногæй не 'ргом раздæхтам зæхмæ, хъæууонхæдзарадон куыстытæм æртасыд нæ астæу.

Гъе, фæлæ фыдæнхъæл фесты æмæ уый у катайаг. Æрмæст йæ байтауын фаг нæ уыд, хъæууонхæдзарадон культурæтæм сæ бафснайыны онг хъæуы зилын, аудын. Фæлæ сæ цыма рох фæци, уыйау ацы хуымзæхх дзæгъæл ныууагътой æмæ нæм кæсы мæгуыргъуызæй. Хъуыддаг уый мидæг ис, æмæ æвзартæ куыддæр сæ сæртæ сдардтой, афтæ байтыды фæзуатмæ йæ къах дæр ничиуал æрбавæрдта, аззад рохуаты. Уый хыгъд дзы фысымиуæг кæнынц цæрджыты стуртæ. Æвзартæ ма сæ быцъынæг бæргæ скъуыдтой хæрдмæ, фæлæ сæ рæзын нал бауагътой фос æмæ зæххы уæлцъарæй дарддæр нал сдардтой сæ сæртæ.
Чизоны, исчи зæгъа, ома ацы зæхх мæгуыр у, зæрдæйы фæндиаг дзы нæ зайы хойрагон культурæ. Фæлæ уый рæдыд хъуыды уаид. Йæ иу хайы дæсгай азты уæвынад кодта сортфæлварæн зæххы фадыг, зылдысты сæм æмæ алыгъуызон хъæууонхæдзарадон культурæтæй истой рекордон тыллæг. Уымæй дæр сæ донхæр нæ кодтой.
Фарстæуы: цæмæн бакодтой уый бæрц хæрдзтæ, æнæфтиаг куы кæны, уæд? Æви æрмæст мæры хоры нæмыг ныппарынæй дæрддæр бæрндзинад нал хъæуы æнкъарын. Иудзырдæй, кæй бахъуыд ахæм куыст?
ХУЫБИАТЫ Н.