Nog adres

Ног нысæнттæ, ног хæстæ

P6150914_1.jpg Республикæ Хуссар Ирыстоны Президент Тыбылты Леонид æмбырд ауагъта министрадтæ æмæ комитетты ног снысангонд сæргълæуджытæн. Æмбырды хайад райстой Хицауады Сæрдар Хуыгаты Ростик, йæ хæдивæг Джиоты Аллæ, Президенты Администрацийы сæргълæууæг Цоциты Барис.
Боны фæткы цы фарстатыл дзырд цыд, уыдонæй иу - «Республикæ Хуссар Ирыстоны паддзахадон сæрмагонд исад æмæ чысыл æмæ астæуккаг амалиуæгады арендæйы субъекттæ исыны хицæндзинæдты фæдыл» РХИ-йы закъоны проект æргъæвд æрцыд радон æмбырдмæ, закъоны проектыл уæлæмхас бакусын кæй хъæуы, æмæ цымыдисгæнæг цæсгæмтты интерестæ хынцыд кæй не 'рцыдысты, уый фæстиуæгæн.

Республикæ Хуссар Ирыстоны Æнди-дзынады проекттæ реализаци кæныны фæдыл паддзахадон комитетмæ ахасты ликвидацион мадзæлттæ ауадзыны фарс нæ рахæцыдысты къорд бæрнон кусæ-джы. РХИ-йы Арæзтады министр Анатоли Мащелкины ныхæстæм гæсгæ, бахæссын хъæуы ивындзинæдтæ Президенты Указмæ æмæ Комитет сликвидаци кæныны фæдыл къамис саразын хъæуы æруромын, хисæрмагонд цæрæн хæдзæртты арæзтад кæронмæ акæнын æмæ дарддæр министрады хаххыл цæрæн хæдзæртты арæзтад министрадмæ адæттын. «Ликвидацион къамис аххæсдзæн æртæ мæйы дæргъы. Æмæ уæд тыхст адæм сæ фарстыты фæдыл кæмæ хъуамæ хатой?», - бацымыдис кодта арæзтады министр.
РХИ-йы Нымайæн палатæйы сæрдар Тахъазты Батраз дæр куыд банысан кодта, уымæ гæсгæ ликвидацион мадзæлттæ уадзыны фæстиуæгæн йæ дæлбар уагдонæн дæр бахардзгонд финансон фæрæзтыл контроль кæныны куыст фæзын уыдзæн. Уымæ гæсгæ рахаст æрцыд иумиаг фæндон ликвидацион ма-дзæлттæ æруромын æмæ Паддзахадон комитеты функцитæ Арæзтадон министрадмæ радтын.
Нæ горæты æвдæм астæуккаг скъола РХИ-йы Хъахъхъæнынады министрады дæлбар кадетон корпусæн радтыны фарстыл æрдзырдта РХИ-йы Хицауады Ап-параты къухдариуæггæнæг Анатоли Баранкевич. Ацы фарст æмразы у Паддзахадон исады комитет, Хъахъхъæнынад æмæ Ахуырады министрадтимæ, фæлæ æмбырды хайадисджыты хъуыдымæ гæсгæ бакусын хъæуы скъолайы бæстыхай радтыны фæдыл юридикон фарстатыл.
Æмбырды дарддæр фидар æрцыд гуырдзиаг-ирон хъаугъайы зонæмæ 1992 азы Æмхæццæ фидауынгæнæг тыхты æркондыл 20 азы сæххæсты цытæн мадзæлттæ бацæттæ æмæ ауадзыны фæдыл организацион комитеты сконд. Комитеты сæр-дарæй сфидар кодтой Хицауады Сæрдар Хуыгаты Ростикы, йæ хæдивæгæй - Уæлвæткон уавæрты министр Бибылты Анатолийы æмæ нымæрдарæй та Президенты уынаффæгæнæг Зассеты Жаннæйы.
Паддзахады сæргълæууæг æрдзырдта нæ республикæйы сабыр цардмæ Фидауынгæнæг тыхты егъау хайбавæрдыл. Уымæ гæсгæ 20 азы юбилей нысан хъуамæ æрцæуа бæрзонд æмвæзадыл. Къамисæн бахæс æрцыд, цæмæй ныридæгæн æрæвналой куыстмæ æмæ æмбæлон уагыл юбилей сорганизаци кæной.
Æнæниздзинад æмæ цæрджыты социалон хъахъхъæнынады министрады структурæ реорганизаци кæнын æмæ кадрон сконд сфидар кæныны нысанæн æмбырды йæ бынатæй сæрибар æрцыд уæлдæрзагъдгонд министрады министры хæдивæг Козаты Жаннæ.
Æмбырды уæлæмхас боны фæткмæ гæсгæ æркастысты РХИ-йы Хъалонтæ æмæ æмбырдты фæдыл комитеты сæрдары хæдивæгæй Тыбылты Анзоры снысан кæныны фарстмæ. Иумиаг хъæлæс кæныны руаджы Тыбылты фырт нысан æрцыд загъдгонд комитеты сæрдары хæдивæгæй.
Знауыры районы администрацийы, поселочы æмæ хъæууон администрацийы структурæ æмæ штатон нымæц сфидар кæныны тыххæй РХИ-йы Хицауады уа-гæвæрдмæ ивындзинæдтæ бахæссыны фæдыл раныхас кодта администрацийы сæргълæууæг Плиты Витали.
Президенты ныхæстæм гæсгæ районты фарс балæууыны нысанæн ацы фарст æвæрццагæй скъуыддзаг хъуамæ æрцæуа.
Уымæй дарддæр карзæй дзырд цыд æгас республикæйы министрадты штатон иуæгтыл. Хицауады Сæрдары хæдивæг Джиоты Аллæ банысан кодта, зæгъгæ, хорз уаид, æмæ электронон хуызы министрадтæ æмæ ведомствоты къухдариуæггæнджытæ хицауадмæ куы æрбавдисиккой сæ кусджыты штатон сконд, цæмæй бæрæг æрцæуой, цалдæргай бынæтты чи кусынц, ахæм æмбæстæгтæ. Уыцы хъуыддаг саразыны æнæмæнгхъæуындзинад сæвзæрд, бюджетон сферæйы кусджытæн куыстмызды фонд егъау суммæ кæй у, уымæ гæсгæ.
Уымæй дарддæр æмбырды дзырд цыд бирæ æндæр ахсджиаг фарстатыл.
КЪÆБУЛТЫ М.