Nog adres

Хъырымы ирон общинæ куры æххуыс

skifi.jpg Хъырымы (Украинæ) скифаг-алайнаг общинæ бахатыд Хуссар Ирыстоны Президент Тыбылты Леонидмæ ахæм куырдиатимæ, цæмæй сын баххуыс кæна Хъырымы историон цыртдзæвæнтæ сæндидзын кæныны тыххæй, кæцытæ баст сты ирæтты фыдæлты историон бынтимæ. Уый тыххæй ИА «Рес»-æн фехъусын кодта общинæйы сæрдар Хацырты Харитон. Йæ ныхæстæм гæсгæ, общинæйы уæнгты ныфс ис, Хуссар Ирыстоны къухдариуæгад кæй бахатдзæн Украинæйы хицауадмæ, цæмæй скифаг æмæ алайнаг цыртдзæвæнтыл æмцегад кæна ирон диаспорæ.
«Хъырымы бирæ ис нæ историон цыртдзæвæнтæй - Скифаг Неаполь, алайнаг моладзандон Чуфут-Кале, Алайнаг фидар æмæ æндæртæ. Уыдон иууылдæр сты кæуинаг уавæры, хъæуы сæ сæндидзын кæнын æмæ сæм зилын. Фæлæ бынæттон хицауад уыдонмæ æмбæлон хъусдард не здахы», - банысан кодта Хацырты Харитон.

Уый баныфс æвæрдта, зæгъгæ, цыртдзæвæнтыл æмцегад куы кæной, уæд общинæ хæсджын уыдзæн уыдон сæндидзын кæнын æмæ сæ æмбæлон уавæры дарын.
«Ахæм сидтытæ арвыстам РЦИ-Аланийы Сæргълæууæг Мамсыраты Таймураз æмæ æхсæнадон организаци «Ирæтты Уæлдæр Совет»-мæ. Нæ общинæйы ис 1000 адæймаджы бæрц æмæ нæ хæс у нæ нацийы историон бынтæ бахъахъхъæнын», - банысан кодта Хацыры фырт.
Уый ма йæ ныхасмæ бафтыдта, зæгъгæ, общинæйы уæнгтæ кад кæнынц ирон традицитæ æмæ æгъдæуттæн, нысан кæнынц æппæт национ, динон бæрæгбонтæ, зæрдылдарæн бонтæ.
«Уый æдтейæ ма нæ куырдиатмæ гæсгæ бынæттон телеуынынад регулярон æгъдауæй æвдисы ирон зарджытæ æмæ кæфтытæ. План ма кæнæм кружоктæ сорганизаци кæнын, цыран нæ сывæллæттæн сæ бон суыдзæн сæ мадæлон æвзаг ахуыр кæнын. Æввахс рæстæджы мах фæнды банысан кæнын Хъырымы скифæгты 2700-æм азы бон», - загъта уый.
Йæ ныхæстæм гæсгæ ма, общинæйы плæнтты ис, сæрмагондæй, Ирыстоны цæрджытæн, кæцыты фæнды Хъырыммæ æрцæуын, чысыл уазæгдон саразын.