Nog adres

Политикæ/ Æдасдзинады гарантитæ - Гуырдзыстонимæ комкоммæ ныхас кæныны сæйраг уавæр

sanakoev_0.jpgЦалынмæ Гуырдзыстоны ‘рдыгæй Хуссар Ирыстонæн æдасдзинады гарантитæ нæ уа, уæдмæ дыууæ бæстæйы ‘хсæн комкоммæ баныхæстæн гæнæн нæй, газет «Известия»-йæн фехъусын кодта Хуссар Ирыстоны Фæсарæйнаг хъуыддæгты министр Санахъоты Дауыт.
«Ныртæккæ Гурыдзыстонимæ ныхас кæныны иунæг формат сты женевæйаг дискусситæ, кæцытæ уагъд цæуынц Уæрæсе, Евроцæдис, ИНО æмæ ЕÆÆО-йы хайадистæй, - загъта Санахъойы фырт.

Дискусситы сæйраг нысан дипломаты ныхæстæм гæсгæ у, цæмæй «Гуырдзыстоны фарсæрдыгæй лæвæрд æрцæуой Хуссар Ирыстоны æдасдзинады гарантитæ».
«Нырма ахæм гарантитæ кæй нæй, уымæ гæсгæ Гуырдзыстонимæ нæй гæнæн комкоммæ ныхас кæнын. Райдианы уал нæ адæммæ ахасты ног агрессийæ тасдзинад хъуамæ мауал уа», - йæ ныхасмæ бафтыдта Санахъоты Дауыт.

Уый банысан кодта, зæгъгæ, республикæйы Фæсарæйнаг хъуыддæгты министрадæн хæдбардзинад банымайын раздæрау у приоритетон фарстатæй сæ иу, ведомство кусдзæнис æппæт дунеон æмæхсæнадимæ, цæмæй къухты бафта Хуссар Ирыстоны хæбардзинад банымайæг паддзахадты нымæц фылдæр кæнын.
«Ацы фарстайы фæдыл ныридæгæн кæрæдзиæмбарынад ис хицæн ног бæстæтимæ. Фæлæ ма ноджы активонæй кусдзыстæм ахæмтимæ дæр, кæцытимæ нырма конструктивон диалог не ‘рбæстон», - банысан кодта Санахъойы фырт.
Уый нæ загъта, кæцы паддзахадтимæ ис контакттæ, кæцытимæ та нæй, фæлæ йæ ныхæстæм гæсгæ уæлдай активондæр куыст цæуы европæйаг бæстæты.
Ахæм фарстайæн, зæгъгæ, Белград, Абхаз æмæ Хуссар Ирыстоны хæдбардзинад гæнæнуæвæн банымайыны тыххæй Сербийы ног президент Томислав Николичы хъусынгæнинагимæ зонгæ уыдис республикæйы хицауад, Санахъоты Дауыт дзуапп радта, «йемæ ацы фарстайыл уынаффæ кæй нæ цыд».
«Æз нырма йеныр цæуын ацы бынатмæ æмæ мæм нæй æххæст информаци, нæ хицауад цы æдтагполитикон фарстатæ скъуыддзаг кæны, уыцы нымæцы Сербиимæ дæр,уыдоны тыххæй. Мæ хъуыдымæ гæсгæ, æввахс рæстæджы æз базондзынæн, Николичы ахæм хъусынгæнинаг саразынмæ цы баразæнгард кодта, уый», - загъта Санахъоты Дауыт.