Nog adres

Фыццаг дзæнгæрæг | Фаронæй фылдæр фыццагкъласонтæ

DSCN4974_0.jpg 1-æм сентябрь. Зонындзинæдты бон. Ацы бон нæ горæты скъоладзау фæсивæд хъæлдзæг æмæ рæсугъдæй, стыр цины æнкъарæнтимæ цыдысты сæ уарзон æмæ бæрæгбонвæлыст скъолатæм. Цингæнгæйæ æмбæлдысты сæ ахуыргæнджытæ æмæ æмкъласонтыл. Чъызгæ æмæ æнæуæндон къахдзæфтæй сæ ныййарджыты къухтыл хæцгæйæ цыдысты, ацы аз фыццаг хатт скъолайы къæсæрæй чи бахызт, уыцы сабитæ дæр.
Ахæм бæрæгбонон зæрдæйыуагимæ æнхъæлмæ кастысты æмæ æмбæлдысты сæ ахуыргæнинæгтыл нæ горæты 5-æм астæуккаг скъола æмæ йæ ахуыргæнджытæ дæр. Байдзаг ис йæ кæрт аив фæлыст скъоладзау фæсивæдæй, афтæ ма сын сæ бæрæгбоныл цин кодтой æмæ семæ æрбацыдысты сæ ныййарджытæ дæр.
Зонындзинæдты боны цытæн ацы скъолайы ахуыргæнинæгтæ æмæ ахуыргæнджытæн арфæ кæнынмæ æрбацыдысты нæ республикæйы Президент Кокойты Эдуард, РХИ-йы Хицауады Сæрдары хæдивæг ХЪуылымбегты Доменти, Ахуырад, зонад æмæ фæсивæдон политикæйы министр Джиоты Арянæ.
Æрæмбырдуæвджыты раз арфæйы ныхæстæ загъта 5-æм скъолайы ахуыры хайады гæс Тедеты Ноннæ. Стæй айзæлдысты нæ республикæйы паддзахадон гимны зæлтæ æмæ схæцыдысты паддзахадон тырысайыл. Бæрæгбоны цытæн æмдзæвгæтæ бакастысты ацы скъолайы ахуыргæнинæгтæ.
Зæрдиаг арфæ ракодта æрæмбырдуæвджытæн 5-æм скъолайы директор Бестауты Азæ:
— Бæрæгбоны хорзæх уæ уæд, зынаргъ кæстæртæ. Уæ ныййарджытæн фидæны аккаг хъæбултæй бахъомыл ут. Стыр ахуыр æмæ хорз специалисттæ уæ цы рацæуа, уыцы амонд уæ уæд! Акæсут ма уæ алыварс. Куыд æндидзы не скъола, нæ республикæ. Хъыгагæн, мах æрхонæм аразджытæ æндæр республикæтæй. Уыдонæн дæр бузныг сæ лæггады тыххæй. Фæлæ сымахæй дæр ахæм стыр архитектортæ æмæ аразджытæ рацæуæд æмæ æндæр республикæты горæттæ цы аразат. Мæнæн ма тынг æхсызгон у уый, æмæ не скъолайы рауагъдонтæй бирæтæ Уæрæсейы уæлдæр ахуыргæнæндæттæм кæй бацыдысты. Махæн кæддæриддæр нæ республикæйы къухдариуæгад стыр æххуыс бакæны, цæмæй не скъола бонæй бон хуыздæр æмæ рæсугъддæр кæна. Махæн та нæ хæс у, цæмæй архайæм æппæт амæлттæй нæ ахуыры гъæд хуыздæр кæныныл. Ноджыдæр уын мæ зæрдæ зæгъы сыгъдæг арвы бын рæсугъ цард!
Бæрæгбонон мадзалы РХИ-йы Президент Кокойты Эдуард æмæ Ахуырад, зонад æмæ фæсивæдон политикæйы министр Джиоты Арянæ схорзæхджын кодтой нæ республикæйы цы предметон олимпиадæтæ уагъд цыдис, уыдоны фæуæлахизуæвджыты. Уыдонæн се ‘хсæн уыдис Президент Кокойты Эдуарды фырт Виктор дæр. Кады грамотæтæй ма хорзæхджын æрцыдысты ацы скъолайы хуыздæр ахуыргæнджытæ дæр.
Бæрæгбонон мадзалы ныхасы рацыдис Кокойты Эдуард куыд нæ республикæйы къухдариуæггæнæг, куыд ацы скъолайы кæддæры рауагъдон æмæ куыд хорз ныййарæг афтæ:
— Нæ зынаргъ кæстæртæ æмæ хъæбултæ, нæ зынаргъ хæлæрттæ. Арфæ уын кæнæм ацы рæсугъд бæрæгбоны цытæн. Сымах фыццаг къахдзæфтæ кæнут ацы кадджын скъоламæ æмæ йæ ноджыдæр уæ зæрдыл дарут — 5-æм скъола кæддæриддæр кæй уыдис номдзыд скъола. Уымæ гæсгæ мæн бафæнддзæнис, цæмæй уе ‘ппæт дæр ацы скъолайæн йæ ном хæссат бæрзонд.
Цæмæй хорз ахуыр кæнат уæ мадæлон æвзаг æмæ йыл алы ирон адæймаг дæр сыгъдæгæй дзура. Ноджы ма уын мæ зæрдæ зæгъы уæ ахуыры уын хорз æнтыстытæ цы уа! Мæнæн ма тынг æхсызгон у, ацы аз нæ фыццагкъласонтæ фаронмæ абаргæйæ фылдæр кæй сты, уый. Хорз хъуыддагыл дзурæг у, кæй зæгъын æй хъæуы. Мах та архайдзыстæм цæмæй нæ республикæйы ахуыры æмвæзад уа бæрзонд. Абон уал архайæм, цæмæй не скъолаты материалон-техникон базæ нырыккон домæнтæн дзуапп дæдта, æмæ нæ сабитæ ахуыр кæной хæрзарæзт, райдзаст скъолаты.
Уæдæ, мæ зынаргъ фыццагкъласонтæ, уæлдай тынгдæр фæдзæхсын сымах, уарзут уæ ахуыргæнджыты, уе скъола. Æз дæр кæддæр сымахау лæууыдтæн ацы бынаты, уымæ гæсгæ мын уæлдай уарзондæр у ацы скъола.æмæ бирæ мæ хуызæтты схъомыл кодтой, уыдон. Хъусут сын сымах дæр сæ зондамындтытæм. Бузныг зæгъын ма мæ фæнды æппæт ныййарджытæн дæр ацы зын царды нын ахæм хорз кæстæртæ кæй хъомыл кæнут, уый тыххæй. Уæ кæстæрты æнтыстытæй кæддæриддæр уæ зæрдæтæ рухс кæнæнт!
Бæрæгбонон мадзалы хайадисджытæ æрымысыдысты 2008 азы хæсты рæстæджы чи бабын ис, уыдоны рухс нæмттæ æмæ сын иу уысм æнæдзургæйæ алæууынæй ссардтой сæ ном. Уыдон ‘хсæн уыдысты ацы скъолайы ахуыргæнджытæ æмæ ахуыргæнинæгтæ дæр. Сæ номыл сæвæрдтой дидинджытæ, скъолайы кæрты чысыл аргъуаны.
Стæй хистæр кълæсты ахуыргæнинæгтæ зонындзинæдты дæгъæл балæвар кодтой фыццаг къласонтæн арфæйы ныхæстимæ, базонгæ сæ кодтой сæ ахуыргæнджытимæ. 11-æм къласы ахуыргæнинаг Æлборты Владæ сын сæххæст кодта зарæг.
Ацы скъолайæ нæ республикæйы къухдариуæгад адарддæр кодтой сæ балц нæ республикæйы иннæ скъолатæм.
ТУАТЫ Ларисæ