Nog adres

Архангельскы областы лæвар - мини-футболы спортивон фæзуат

Цхинвалы, Нæузæххонты уынджы районы цытджын æгъдауæй байгом спортивон фæзуат мини-футболæй хъазынæн. Уый у аразгæ кæрдæгæй æмбæрзт. Объект арæзт æрцыд Уæрæсейы Архангельскы областы æххуысæй.

Спортивон фæзуат гом кæныны церемонийы хайад райстой республикæйы разамынады минæвæрттæ президент Кокойты Эдуарды сæргълæудæй, Уæрæсейы регионалон рæзты министр Виктор Басаргин, йæ хæдивæг Сергей Верещагин, афтæ ма Архангельскы областæй делегаци йæ сæргъ областон думæйы депутат, фæсивæдон политикæ æмæ спорты комитеты сæрдар Александр Дятлов, афтæмæй.

Кокойты Эдуард раарфæ кодта Архангельскы областы минæвæрттæн, ахæм хъæугæ æмæ пайдайаг лæвар кæй кæй бакодтой сывæллæттæн, уый тыххæй.

arkhang.jpg

«Кæд æмæ Хуссар Ирыстон æмæ Архангельскы область географион æгъдауæй кæрæдзимæ дард сты, уæддæр архангелæгты зæрдæйы хъарм æмæ хъусдард мах æнкъарæм 2008 азы гуырдзыйы агрессийы фыццаг бонтæй фæстæмæ. Мах нæ зæрдыл дарæм, уæд нæ судзгæ горæтмæ фыццаг чи æрцыдысты, уыдонæй сæ иу кæй уыд Архангельскы губернатор Илья Михальчук æмæ кæй равдыста йæ цæттæдзинад Хуссар Ирыстоны иу объект сæндидзын кæныны кæнæ саразыны тыххæй. Уымæн йе ‘вварс рахæцыдысты областы цæрджытæ æмæ нын абон лæвар кæнынц дыккаг объект», - загъта паддзахады сæргълæууæг.

Уый ма банысан кодта, зæгъгæ, кæд 2008 азы августы цаутæй æртæ азы рацыд, уæддæр Уæрæсейы Федерацийы бирæ субъекттæ дарддæр дæр æххуыс кæнынц Хуссар Ирыстоны сæндидзын кæныны. «Мах кæддæриддæр нæ зæрдыл дардзыстæм, Архангельскы область нæ фарсмæ кæй æрбалæууыд æмæ нын кæй æххуыс кæны, уый. Хуссар Ирыстоны адæм уый кæддæриддæр сæ зæрдыл дардзысты», - загъта Кокойты Эдуард.

Архангельскы областон думæйы депутат Александр Дятлов йæ раныхасы банысан кодта, зæгъгæ, футболон фæзуаты аразгæ æмбæрзт Хуссар Ирыстонæн балæвар кодтой областы цæрджытæ, самал æй кодтой, цы фæрæзтæ æрæмбырд кодтой, уыдонæй. «Фæнды нæ, цæмæй сывæллæтты – æрыгæтты спорт активонæй рæза. Спорт иу кæны æппæт адæмты дæр. Хуссар Ирыстоны сывæллæтты спортивон командæты стыр райгондæй хонæм Архангельскмæ. Нæ сывæллæтты дæр кæндзыстæм Цхинвалмæ. Дарддæр дæр хæлар уыдзыстæм, иумæ уадздзыстæм сывæллæтты турниртæ», - загъта Дятлов.

Спортсментæ-гириисджыты номæй уый РХИ-йы Президентæн радта зæрдылдарæн лæвар.

УФ-йы регионалон рæзты министр Виктор Басаргин дæр раарфæ кодта Цхинвалы цæрджытæн ног спортивон объект эксплуатацимæ радтыны тыххæй. «Абон Уæрæсейы Федерацийы бирæ регионтæ Уæрæсейы Хицауадимæ скъуыддзаг кæнынц Хуссар Ирыстоны социалон-экономикон рæзтимæ баст фарстатæ, - зæгъы министр. – Хорз традици ссис, Хуссар Ирыстонмæ мæ алы æрцыд дæр нысан кæй æрцæуы ног социалон объект байгом кæнынæй. Ахæм спортивон фæзуæттæ хъуамæ уой Цхинвалы алы районы дæр. Бафæнддзæн нæ, цæмæй цхинвайлаг сабитæн сæ царды бындур суа спорт, цæмæй нормалонæй цæрой æмæ ахуыр кæной».

Кæронбæттæны Кокойты Эдуард РХИ-йы Кады грамотатæй схорзæхджын кодта Архангельскы делегацийы минæвæртты (Александр Дятловы, Архангельскы горæтон советы депутат Вячеслав Широкийы æмæ областон æмбырды депутаты æххуысгæнæг Валери Жгилевы) нæ адæмты ‘хсæн хæлардзинад рæзын кæнын æмæ республикæйæн баххуыс кæныны тыххæй.

Ног мини-футболы фæзуатыл æхсызгонæй сæмбæлдысты Нæузæххонты уынджы сывæллæттæ. Ныридæгæн дзы ауагъд æрцыд сывæллæтты-æвзæнгты турнир.

Ахæм футболон фæзуæттæ нæ горæты бирæ рæтты арæзт æрцыдис. Цхинвалы горæты администрацийы цæрæнуатон-коммуналон хæдзарады сæйраг инженер Цхуырбаты Анатоли куыд зæгъы, афтæмæй ма план цæуы æввахс рæстæджы горæты скæсæн хайы – Цæхæрадоны уынджы спортивон фæзуат саразын.