Nog adres

Ивгъуыд къуырийы цаутыл афæлгæст

14 майы РХИ-йы Президент Тыбылты Леонид ауагъта Хицауады рауæрæхгонд æмбырд. Паддзахады сæргълæууæг æрæмбырдуæвджыты лæмбынæг базонгæ кодта 12 майы Сочийы УФ-йы Президент В.Путинимæ йæ фембæлды фæстиуджытимæ. Тыбылты Леонид, министрадты æмæ ведомствоты къухдариуæггæнджыты докладтæм байхъусгæйæ, загъта, зæгъгæ, афон у куысты формалон формæты хуымæтæджы режимы формулировкæтæй кусæгон режиммæ рахизынæн.
***
15 майы уыд РХИ-йы Парламенты фæндзæм сессийы æхсæзæм рабадт. Рабадты куысты хайад райста Президент Тыбылты Леонид. Хайад дзы райста 30 депутаты, сусæг хъæлæсæппæрсты фæстиуæгæн, 29 депутаты схъæлæс кодтой, цæмæй Хуыгаты Ростик Ерасты фырт нысан æрцæуа РХИ-йы Хицауады Сæрдарæй.

***
15 майы зонад-иртасæн институты уагъд æрцыд конференци ирон æвзаджы боны цытæн. Конференцийы сæйраг организатор уыдис филологон зонæдты кандидат, доцент Битарты Зоя. Конференцийы куысты хайад раста æмæ дзы раныхас кодтой Президент Тыбылты Леонид, Хицауады Сæрдары хæдивæджы хæстæ æххæстгæнæг Хъуылымбегты Доменти, университеты ахуыргæнджытæ æмæ интеллигенцийы минæвæрттæ.
***
Хуссар Ирыстоны æфснайæн банг цæрджытæн фæлхасадон кредит 50 мин сомæй фæфылдæр кодта 150 мин сомы онг æмæ йын йæ процент та къаддæр фæкодта.
***
16 майы Присы хъæумæ æввахс æрцыд авари, кæцыйы фæстиуæгæн фæмард сты дыууæ æвзонг цардбæллон адæймаджы æмæ æртæйæ та фесты цæфтæ. Уый фæдыл Хуссар Ирыстоны тыхон структурæты сæргълæуджытæн ауагъд æрцыд экстренон æмбырд, цыран æрдзырдтой фæндаджы змæлды æдасдзинады фæдыл. Æмбырд уагъта РХИ-йы Хицауады Сæрдары хæдивæджы хæстæ æххæстгæнæг Хъулымбегты Доменти.
***
Тыбылты Леонид арфæйы тел арвыста Республикæ Хуссар Ирыстон æмæ Республикæ Цæгат Ирыстон-Аланийы адæмон артист, УФ-йы аивæдты сгуыхт архайæг Сæлбиты Акиммæ йæ 50 азы юбилейы цытæн.
***
Тыбылты Леонид йæхимæ райста Цæгат Кавказы Хæххон Металлургон институты ахуыргæнджыты иу къорды, сæ сæргъ ацы уагдоны ректор Николай Шубин, афтæмæй. Уый фæстæ уазджытæ фембæлдысты хуссарирыстойнаг рауагъдонтимæ.
***
Хуссар Ирыстоны зонад-иртасæн институты уагъд æрцыд зонадон кусджыты куыстыты хатдзæгты фæдыл æрвылазон зонадон сесси. Докладгæнджытæ æрдзырдтой истори, филологи æмæ экономикæйы актуалон фарстатыл.
***
Арæзт æрцыд ног парти «Ирыстон - сæрибары фæзуат», зæгъгæ. Парти ауагъта бындурæвæрæн съезд, цыран сусæгхъæлæсæппæрсты фæстиуæгæн партийы сæрдарæй æвзæрст æрцыд Джиоты Аллæ. Афтæ ма арæзт æрцыд партийы политикон совет дæр.
***
Республикæ Хуссар Ирыстоны уæлдæр тæрхондон растыл банымадта Парламенты раздæры Сæрдар Коцты Станиславы хъаст, Парламент ын æнæууæнчы вотум кæй рахаста, уый фæдыл. Тæрхон рахæссыны хъуыддаг цалдæр хатты æргъæвд æрцыд, фæлæ ныр тæрхондон парламенты рахæсгæ фæндон банымадта æнæзакъононыл.
***
Хуссар Ирыстоны уагъд цыд олимпиадæ скъо-ладзауты 'хсæн æппæт предметтæй дæр. Хорзæхджын æрцыдысты уæлахиздзаутæ æмæ призертæ. Аст предметæй уæлахиздзаутæ систы 60 ахуырдзауы æмæ 1-аг къæпхæны номинанттæ - 10 ахуыргæнинаджы.