Nog adres

/Æндидзынад/ Фæсивæды хæрзиуæгæн

DSCN7152_0.jpg
Нæ республикæйы арæзтадон-цалцæггæнæн куыстытæ дарддæр цæуынц. Уыдон нымæцмæ хауынц фæндæгты арæзтад, медицинон уагдæттæ, ахуыргæнæндæттæ, культурæ æмæ спорты объекттæ æмæ æндæр ахæмтæ. Афтæ зæгъæн ис, æмæ нæ горæт кæй ссис стыр арæзтадон фæзуат.
Адæймаджы зæрдæ барухс вæййы, нæ республикæйы арæзт кæнæ та реконструкцигонд куы æрцæуынц ног хæдзæрттæ, æнæмæнгхъæуæг объекттæ. Иу ахæм æхсызгон хъуыддагыл та æрæджы стыр цинимæ сæмбæлдысты нæ республикæйы цæрджытæ.
20 апрелы цытджын уавæры баконд æрцыд æхгæд спортивон ленкгæнæн бассейн «Дельфин», зæгъгæ, ахæм номимæ. Ацы спортивон объект арæзт æрцыд нæ горæты цæгатварс, Мæскуыйы микрорайонмæ æввахс. Ацы ленкгæнæн бассейн байгом кодта нæ республикæйы Президент Тыбылты Леонид.

Мадзалы ма хайад райстой Хицауады Сæрдары хæстæ æххæстгæнæг Вадим Бровцев, Хицауады Сæрдары хæдивæджы хæстæ æххæстгæнæг Хъуылымбегты Доменти, РХИ-йы Ахуырад, зонад æмæ фæсивæдон политикæйы министры хæстæ æххæстгæнæг Плиты Риммæ, Арæзтады министры хæстæ æххæстгæнæг Джиоты Рудольф, ленкгæнæн бассейн «Дельфин»-ы къухдариуæггæнæг Тедеты Валери æмæ ацы арæзтады фæудмæ æнæрхъæцæй чи æнхъæлмæ каст, уыцы скъоладзау фæсивæд.
DSCN7160.jpg Президент Тыбылты Леонид æмæ уазджытыл ног бæстыхайы раз сæмбæлдысты ирон æгъдаумæ гæсгæ æртæ уæливых æмæ дзаггарзимæ. Æгъдау куыд домы, уымæ гæсгæ нуазæн авæрдтой нæ республикæйы ног сæвзæрст Президент Тыбылты Леонидмæ. Уый ракуывта æмæ æрæмбырдуæвджыты бафæдзæхста Стыр Хуыцау æмæ Уастырджийыл. Нуазæнæй ма ракуывтой Вадим Бровцев æмæ Хъуылымбегты Доменти. Уый фæстæ Президент Тыбылты Леонид ленкгæнæн бассейнмæ бахизæны алыг кодта сырх лентæ æмæ арфæтимæ бахызтысты ног райдзаст агъуыстмæ. Уазджытæ фыццаг бацыдысты æмæ федтой, сывæллæттæн ленкгæнæн бассейн арæзт кæм æрцыд, уырдæм. Уый фæстæ та бацыдысты стыр ленкгæнæн бассейнмæ. Ам кусджытæй бæрнджын чи уыдис, уыдон радзырдтой, бассейнтæ куыд арæзт сты æмæ дзы ныртæккæ цы уавæртæ ис.
Ам ма арæзт æрцыдысты хинайæн кабинæтæ, сæ дзаумæттæ кæм раласой, ахæм бынæттæ. Ис дзы æхсæз хъармгæнæн компрессоры. Æппæт адæттыл азылдис Тыбылты Леонид æмæ райгондæй баззад, ныридæгæн дзы арæзт цы æрцыдис, уымæй. Уый фæдыл журналисттæн радта чысыл комментаритæ æмæ банысан кодта:
«Абон ацы спортивон комплексы баконд махæн у тынг ахсджиаг хъуыддаг. Уымæн æмæ ахæм спортивон арæзтад нæ республикæйы у фыццаг. Æмæ, кæй зæгъын æй хъæуы, фæахъаз уыдзæнис нæ республикæйы цæрджытæн. Мæн, сæйраджыдæр, фæнды зæгъын стыр бузныджы ныхæстæ аразджытæн, нæ кæстæр фæлтæрæн, æмткæй нæ адæмæн, ахæм ленкгæнæн бассейн кæй сарæзтой».
Тыбылты Леонид ма баныфсæвæрдта нæ республикæйы территорийыл ма дарддæр дæр арæзт кæй цæудзысты æндæр социалон объекттæ дæр.
DSCN7177.jpg Ленкгæнæн бассейн цытджын æгъдауæй баконд куы æрцыд, уæд сывæллæттæн бар радтой, цæмæй азылдаиккой æмæ федтаиккой, цы бассейнтæ сын сарæзтой, уыдон. Сывæллæттæ, кæй зæгъын æй хъæуы, тынг цин кодтой ацы хъуыддагыл, фæлæ сæ фарст уыдис, зæгъгæ, кæд райдайдзыстæм ацы бассейнтæм цæуын, æмæ сæ иууыл тынгдæр та цымыдис кодта, æнæаргъæй йæм цæудзысты æви та йын хъæудзæнис бирæ фидын. Ацы сæвзæргæ фарстыты тыххæй мах бахатыдыстæм Тедеты Валеримæ æмæ нын уый загъта, зæгъгæ, ацы фарстытæ нырма Хицауадимæ скъуыддзаг не 'рцыдысты, фæлæ тагъд рæстæжы алцыдæр хъуамæ уа нывыл. Уый ма нын куыд радзырдта, афтæмæй ленкгæнæн бассейн «Дельфин»-ы дыккаг уæладзыджы, сæ планмæ гæсгæ уыдзæнис тренажерон зал. Агъуыстæн æдтейæ та арæзт æрцæудзæнис чысыл парк, йæ цуры та сæрдыгон кафе, теннисæй хъазæн столтæ æмæ афтæ дарддæр. Стыр бассейнмæ сахаты мидæг бар уыдзæнис бауадзын 60 адæймаджы. Сывæллæтты бассейнмæ та иу сахаты мидæг райсдзысты 40 бæрц. «Ныртæккæ махæрдыгæй куыст цæуы, цæмæй азилæм скъолатыл æмæ 7-8 азы кæуыл цæуы, ахæм сывæллæтты æртымбыл кæнæм. Уыдонæн семæ кусдзысты тренертæ æмæ, кæй зæгъын æй хъæуы, хъомыл кæндзыстæм сомбоны спортсменты.
Уæдæ, рæхджы нæ горæты фæсивæд, уæлдайдæр та сæрды сæ сæрибар рæстæг æрвитдзысты ленкгæнæн бассейн «Дельфин»-ы æмæ ма сын уый ахъаз фæуыдзæн се 'нæниздзинадæн дæр.
ЦХУЫРБАТЫ Л.