Nog adres

Æхсæнхицауадон къамисы рабадт

kamis.JPGДаргъ фæндаджы кæрон – царды рухс
Уæззау æмæ даргъ у Ленингоры районмæ цæуæг фæндаг. Гуыргъахъ фæндаг кæм хохы сæрмæ схизы, кæм сæрсæфæн тигътыл кæмтты нарджытæм ауырдыг вæййы. Æниу, цалдæр азы размæ ацы фæндагыл иу кæронæй иннæмæ цыдысты æртыгай бонты дæргъы, ныр, табу Хуыцауæн, кæд зæрдæйы фæндиаг нæма у, уæддæр ис фæндаг. Стæй йæ кæронæй зыны царды рухс, кусынц ыл, уæрæхдæр, цыбырдæр æй кæнынц. Алыгъуызон уæззау техникæйы уынæр цыма фæллад бæлцæттæн афтæ дзуры: «чысыл ма бабыхсут æмæ цæудзыстут лæгъз, асфальт фæндагыл».
Кæм нырма къæхтытæ, ахафинаг у, кæм ыл ис хуыркалд, кæм та чысыл дæрддзæгмæ асфальтгонд дæр æрцыд. Æппæт уыдæттæ дзурæг сты рæстæгмæ зындзинæдтыл, фидæнхуыздæрыл.

Ахæм тæлмæнтæ æвзæры адæймагмæ Ленингоры поселокмæ бахаугæйæ дæр. Ам нырма дæр хæдзæрттыл, магазинтыл, уагдæдтыл фенæн ис гуырдзиаг фыстытæ. Нырма фæстæмæ йæ ном нæ раздæхтой Къостайы номыл уынгæн дæр, нырма Чысаны Ерыстауты хæдзар-музейы экспонаттыл дæр гуырдзиаг фыстытæ ис. Нырма амы цæрджыты фылдæр хай магазины бæсты дзурынц магъазиа, уынджы бæсты – куча. Уый æмбæрстгонд у. Амы цæрджытæ ссæдз азы дæргъы уыдысты шовинистон Гуырдзыстоны дæлбар, ускурыны æмæ чындз цæуыны кары фæсивæд схъомыл сты, Хуссар Ирыстон цы у æмæ кæм ис, уый нæ зонгæйæ. Амы цæрæг адæм сабийæ зæронды кармæ нæ зыдтой, цахæм фæндагыл ныллæууыд Хуссар Ирыстон, цахæм хъысмæт равзæрстой ирон адæм сæхицæн, цы уыд сæ тохы нысан, чи у се знаг, чи у сæ хæрзгæнæг.
Æмбарæм æй, зын у æртæ азмæ сæ зондахаст фæивын, цæрæнбонты шовинизмы уацары чи уыд, уыцы адæмæн, фæлæ уый тыххæй кусын райдайын уæддæр хъæуы. Æви афтæ зын хъуыддаг у æмæ ахæм бирæ æхцайы фæрæзтæ хъæуы иу уынджы кæройнаг хæдзæрттыл «Хетæгкаты Къостайы уынг» ныффыссынæн?
Фæлæ уæддæр ныфс амæлы фæстагмæ. Цæуыс уыцы даргъ æмæ гакъон-макъон фæндагыл, фæллайыс, фæлæ дын дæ уд æмæ дæ уæнгты фæллад сафы, уыцы даргъ фæндаджы кæронæй зынæг рухс: Ленингор фæстæмæ мах у!
Æвæццæгæн уыцы нысанæн ауагъдæуыд Ленингоры поселочы Уæрæсейы Федераци æмæ Республикæ Хуссар Ирыстоны ‘хсæн социалон-экономкон æмгуыстады фæдыл Æхсæнхицауадон къамисы радон рабадт. Цæмæй Ленингоры цæрæг адæм уæлдай хатт банкъарой, цард кæй фæивта, ныр ног, æндæр цардæй кæй цæрдзысты.
Æхсæнхицауадон къамисы рабадт йæ куыст райдыдта нæ республикæйы Президент Кокойты Эдуарды цыбыр бацæуæн ныхасæй. Уый бузныджы ныхæстæ загъта фыццаграды Уæрæсейы Федерацийæ æрцæугæ уазджытæн, къамисы уæнгтæн, Уæрæсейы Федерацийы Регионалон рæзты министр, Æхсæнхицауадон къамисы æмсæрдар Виктор Басаргины номæй. Банысан кодта къамисы куысты фæстиуæгæн къухы бафтгæ æнтыстытæ æмæ саразинаг хъуыддæгтæ. Уый фæстæ æнтыстджын куысты фæндиæгтæ загъта къамисы уæнгтæн.
Йæхи рады Виктор Басаргин дæр раарфæ кодта Кокойты Эдуард æмæ къамисы уæнгтæн, ахæм фæндиагимæ, зæгъгæ, фыццаграды нæ тыхтæ куы саразиккам, кæй райдыдтам æмæ рæзты этапыл чи ис, уыцы арæзтадтæм.
Уый фæстæ къамис æрæвнæлдта йæ куыстмæ. Рабадт уагъта нæ республикæйы Хицауады Сæрдар, Æхсæнхицауадон къамисы хуссарирыстойнаг хайы сæрдар Вадим Бровцев.
Къамисы рабадты сæйраджыдæр ныхас цыд, 2011 азы 25 февралы горæт Дзæуджыхъæуы чи уыд, Æхсæнахицауадон къамисы уыцы рабадты райсгæ уынаффæтæ куыд æххæст æрцыдысты, ууыл. Ацы фарсты фæдыл ныхасы бар лæвæрд æрцыд Æхсæнхицауадон къамисы бæрнон секретарь, Республикæ Хуссар Ирыстоны Хицауады Аппараты къухдариуæгæнæджы хæдивæг Коцты Аланæн. Уый хъусдард аздæхта социалон насниуæджы объектты арæзтады цавæр куыст цæуы, уыцы фарстатæм, уыцы нымæцы республикон нысаниуæджы фæндæгты арæзтады уавæрмæ.
Ацы фарсты фæдыл Уæрæсейы фарсæрдыгæй ныхасы рацыд Æхсæнхицауадон къамисы уæрæсейаг фарсы бæрнон секретарь, Максим Крюков.
Куыд зонæм, афтæмæй нырма дæр æмбæлæм таможнæйон ныхдуртыл. Ацы уавæр æрмæст рæнхъон бæлццæтты æмæ бынæттон амалиуæггæнджыты нæ тыхсын кæны, фæлæ арæзтадон объектты сæргълæуджыты дæр. Уымæ гæсгæ ныхас цыд дыууæфарсон базарады фарстатыл, арæзтадон æрмæджытæ ласынмæ хауæг сæрмагонд процедурæтыл, кæцытæ нысангонд сты Уæрæсейы Федераци æмæ Республикæ Хуссар Ирыстоны ‘хсæн фыстæрцæуæг Сразадзинады. Ацы фарсты фæдыл сæ хъуыдытæ æмæ фиппаинæгтæ загътой: Уæрæсейы Федерацийы регионалон экономикон рæзты проектты департаменты директор Андрей Соколов æмæ Республикæ Хуссар Ирыстоны экономикон рæзты министр Колыты Коонстантин.
2011 азы Республикæ Хуссар Ирыстоны социалон-экономикон рæзтмæ хауæг Инвестицион программæты финанскæнынады фæдыл та сæ хъуыдытæ загътой Республикæ Хуссар Ирыстоны Капиталон, фæндæгты арæзтад æмæ архитектурæйы мнистр Хуыгаты Чермен æмæ уæлдæр банысангонд Департаменты директоры хæдивæг Максим Крюков.
Дзырд арæзтадон компанийыл куы цæуа, уæд банысан кæнын хъæуы, иуæй-иу проекттæ царды сæххæст кæнынæн кæй фæзыны, развæлгъау базонæн кæмæн нæ вæййы ахæм цæлхдуртæ. Уымæ гæсгæ ацы рабадты Инвестицион программæтæм ивындзинæдтæ бахæссыныл æрхауд сæрмагонд ныхас. Сæ фиппаинæгтæ æмæ фæндæттæ загътой Хуыгаты Чермен æмæ Уæрæсейы Федерацийы Регионалон рæзты министры хæдивæг Сергей Верещагин.
Æрæмбырдуæвджытæ бакастысты Хуссар Ирыстоны паддзахадон университеты ног проектмæ видеофильмы хуызы. Базонг сты паддзахадон театр æмæ национ музейы проекттимæ дæр.
Æмбырд ацыд æнæ уæлдай æнæхъуаджы ныхас æмæ бирæ радзур-бадзурæй. Алкæй раныхас дæр уыд цыбыр æмæ нысанмæздæхт.
Къамисы уæнгтæ сæ куысты фæстæ бабæрæг кодтой райцентры ногарæзт зынгхуыссынгæнæн хайады агъууыст æмæ рынчындон.
Бынæттон адæмæй уазджытæм алчи каст йæхирдыгонау. Иутæ, куыд ма загътам, афтæмæй кæронмæ æмбаргæ дæр нæма кæнынц, сæ районы æрцæугæ æмæ æрцæуинаг хъуыддæгты. Иннæтæ цардмæ кæсын райдыдтой оптимистон цæстæй, ныфс сæ ис аккаг фидæнæй.