Nog adres

Зынгæ ирон композиторы мысгæйæ

alborov.pngÆлборты Феликсы райгуырдыл сæххæст 80 азы

Йæ райгуырæн бæстæ æмæ йæ радтæг адæмæн цæстуарзон лæггад чи бакодта, йæ диссаджы курдиаты фæрцы ирон аивад æмæ культурæ фæхъæздыгдæр кæныныл æвæллайгæйæ чи архайдта, уыдонæй сæ иу уыд нæ адæмы уарзон композитор, æхсæнадон архайæг, Уæрæсейы Композиторты цæдисы уæнг, Хетæгкаты Къостайы номыл паддзахадон премийы лауреат, Г. Свиридовы номыл цытджын майданы кавалер, Республикæ Хуссар Ирыстоны, РЦИ-Алани æмæ ГССР-ы аивæдты сгуыхт архайæг Æлборты Шалвайы фырт Феликс.
Зындгонд композитор, ирон адæмон зарджыты æмбырдгæнæг, зынаргъ у алы ирон адæймагæн дæр. Æлборты Феликс йе сфæлдыстадон фæндагыл цæугæйæ, бындуронæй иртæста фольклор - ирон адæмы музыкалон культурæ, сæрмагондæй куыста ирон традицион музыкалон инструментты фарстатыл, сæ равзæрд æмæ сæ пайдакæнынад музыкæйы. Уый йæ уацмыстæй дзæвгар фæхъæздыгдæр кодта ирон музыкалон аивад.
Зындгонд композитор Æлборты Феликс райгуырд Цхинвалы 1935 азы сентябры мæйы. Ивгъуыд азы йæ райгуырдыл 80 азы кæй сæххæст, уый цытæн Цхинвалы музыкалон ахуыргæнæндон 15-æм апрелы бацæттæ кодтой æмæ ауагътой мысæн музыкалон концерт.

Концерт бацæуæн ныхасæй байгом кодта, бирæ азты дæргъы музыкалон ахуыргæнæндонæн разамындгæнæг РХИ-йы сгуыхт ахуыргæнæг Карина Саркисян. Уый, фыццаджыдæр, бузныджы ныхæстæ загъта, ацы мадзал чи сорганизаци кодта æмæ йæ кæй фæхуыдтой, уый тыххæй. Саркисян Карина æрымысыдис Æлборты Феликсы рухс ном. Радзырдта, куыд куыста æмæ йын цавæр æнтыстытæ уыд йе сфæлдыстады, æппæт уыдон. «Æлборты Феликс кæддæриддæр бындуронæй æвзæрста, куыд ахуыргæнинæгты, афтæ ахуыргæнджыты дæр æмæ афтæмæй æрæмбырд кодта, сæ хъуыддаджы профессионалтæ чи уыдысты, ахæмты. Уый уарзта йæ куыст æмæ йыл йæ зæрдæ дæр рыстис. Мах Æлборты Феликсы æрмæст йæ курдиаты æмæ йæ кæлæнгæнæг музыкæйы тыххæй нæ уарзæм, мах ма йын стыр аргъ кæнæм, йæ ирон адæмы æгæрон уарзтæй кæй уарзта æмæ сын æнувыдæй кæй лæггад кодта, уый тыххæй дæр. Уый уыдис æцæг патриот æмæ нæ зæрдæты дæр арф уымæн ис», - банысан кодта Карина Саркисян.
Концертамонæг Босыкты Фатимæ сценæмæ æрбахуыдта музыкалон ахуыргæнæндоны хоры. Хоры зарæггæнджытæ РХИ-йы сгуыхт ахуыргæнæг Хъуылымбегты Иринæйы къухдариуæгадæй сæх-хæст кодтой В. Моцарт, Д. Хаханов æмæ Æлборты Феликсы уацмыстæ.
Сценæйыл ма аив хоримæ солон партитæ сæххæст кодтой музыкалон ахуыргæнæндоны ахуыргæнджытæ дæр. Уыдон 'хсæн уыдысты: РХИ-йы культурæйы сгуыхт кусæг Хъуылымбегты Луизæ, Гасситы Ацæмæз, РХИ-йы сгуыхт артисткæ Уалыты Нинæ æмæ æндæртæ. Уыдон се 'ппæт дæр афтæ сæххæст кодтой сæ музыкалон номыртæ æмæ сæм залыбадæг адæм хъусынтыл фесты.
Бацæттæгонд концерты хайад райстой музыкалон ахуыргæнæндоны æппæт хайадтæ дæр. Хореографион хайады 4-æм курсы ахуыргæнинæгтæ акафыдысты «Хонгæ кафт» æмæ хъæлдзæг композици «На остановке», зæгъгæ, ахæм номимæ. Сæ къухдариуæггæнæг у Санахъоты Сослан, Хъæрæсе-Черкесийы Республикæйы сгуыхт артист, РХИ-йы аивæдты сгуыхт архайæг.
Юбилейон концертмæ ма фæуазæг сты Цæгат Ирыстон-Аланийæ дæр. Хайад дзы райста ансамбль «Луар». Куыд рабæрæг, афтæмæй ансамбль конд у æртæ адæймагæй (трио). Архайынц дзы: Æлборты Сергей (гитара), Æлборты Людмилæ (фортопиано), Æлборты Ланæ (уадындз). Банысан кæнын хъæуы уый æмæ Æлборты Ланæ æмæ Людмилæ кæй сты Цхинвалы музыкалон ахуыргæнæндоны рауагъдонтæ.
Цымыдисон музыкалон программæ ма концертмæ бацæттæ кодтой «Инструменты народного оркестра»-йы хайады ахуыргæнинæгтæ дæр. Уыдонæй Коцты Линдæйыл (йæ ахуыргæнæг Гатыгкоты Ж.) æмæ Дудайты Константиныл (йæ ахуыргæнæг Куымæриттаты Т.) сценæмæкæсджытæ сæмбæлдысты тыхджын къухæмдзæгъдимæ аив кæй сæххæст кодтой сæ музыкалон номыртæ, уый тыххæй.
«Фортепиано»-йы хайады ахуыргæнинæгтæ Гаглойты Амага æмæ Цхуырбаты Анастасия та сæххæст кодтой Æлборты Феликсы уацмыстæй «Экспромт» æмæ «Токката» æмæ сыл адæм сæмбæлдысты цины æнкъарæнтæ æмæ тыхджын къухæмдзæгъдимæ. Иудзырдæй, ахуыргæнинæгтæ æххæст кодтой сæ номыртæ æмæ-иу бирæ хатт кæйдæрты ногæй хуыдтой сценæмæ.
Концерт æхгæд æрцыдис адæмон инструментты оркестры хайадистæй (оркестры къухдариуæггæнæг, культурæйы сгуыхт архайæг Куымæриттаты Тина), кæцытæ сæххæст кодтой Æлборты Ф. Кокойты А, Свиридов Г. æмæ æндæр композиторты уацмыстæ.
Юбилейон концерт цымыдисон кæй рауадис, уый йæ раныхасы банысан кодта Æлборты Феликсы идæдз Остъаты Ларисæ дæр. Уый, сæрмагондæй, бузныджы ныхæстæ загъта, концерты чи бацæттæ кодта, æппæт уыдонæн. Уый фæстæ зæрдæбын арфæтимæ музыкалон ахуыргæнæндонæн балæвар кодта Æлборты Феликсы чиныг «Музыкальная культура осетин».
Арфæйы ныхæстæ ма концерты хайадисджытæн загъта нæ республикæйы Культурæйы министр Остъаты Мадинæ. Уый æрдзырдта нæ республикæйы музыкалон культурæйы æнтыстытыл æмæ банысан кодта, зæгъгæ, музыкалон ахуыргæнæндоны ахуыргæнинæгтæ æмæ ахуыргæнджытæ активонæй кæй фæисынц хайад алыгъуызон мадзæлтты. Министр ма загъта, 12 июны Уæрæсейы боны цытæн уагъд кæй æрцæудзæнис концерт æмæ дзы хайад кæй райсдзæнис Белгороды культурæйы институты оркестр. Æрæджы, загъта, уым нæ музыкант Дудайты Сæрмæтæн кæй уыдис стыр æнтыстытæ æмæ уымæ гæсгæ та ныр уыдон уыдзысты нæ сценæйы уазджытæ.
Концертæй дарддæр ма организатортæ бацæттæ кодтой стенд, цыран конд æрцыдысты рагон нывтæ Æлборты Феликсы сфæл-дыстадон цард чи æвдыста, ахæмтæ. Концертмæ фæуазæг сты нæ республикæйы министрадтæ æмæ ведомствоты бæрнон кусджытæ. РХИ-йы Хицауады Сæрдары хæдивæг Пухаты Эрик, РХИ-йы Хицауады Сæрдары рæстæгмæ хæстæ æххæстгæнæг Тъехты Алан, нæ республикæйы интеллигенцийы минæвæрттæ æмæ Æлборты Феликсы сфæлдыстадæн табугæнджытæ.
Курдиатджын композиторы уацмыстæ сты æцæг адæмон æмæ нæ адæмы зæрдæты цæрдзысты æнустæм.

ЦХУЫРБАТЫ Ларисæ