Nog adres

Пухаты Эрик: «Мах æнæмæнг сараздзыстæм æппæтдæр ирон адæмы геноциды амæттæгты нæмттæ сæнусон кæныны тыххæй»

РХИ-йы Хицауады Сæрдары хæдивæг Пухаты Эрикы къухдариуæгадæй уагъд æрцыд, 1920 азы Гуырдзыстоны Демократон Республикæйы рдыгæй хуссайраг ирæтты ныхмæ цы геноцид арæзт æрцыд, уый мемориализацийы фæдыл къамисы рабадт (дарддæр Къамис).
Уынаффæ кæуыл цыд, уыцы фарстытæй сæйрагдæр уыд 2016-2017 азты ауадзинаг мадзæлтты фæдыл Къамисы нывæст.
Куыд зонæм, афтæмæй уый арæзт æрцыд ивгъуыд аз июны мæйы Президент Тыбылты Леониды барамындмæ гæсгæ, геноцид смемориализацийы программæ сплан кæнын, бацæттæ æмæ йæ сæххæст кæныны нысанæн (дарддæр геноцид).
Аивгъуыйгæ æмгъуыды дæргъы фидаргонд æрцыд Къамисы сконд. Уырдæм бацыдысты Хицауады уæнгтæ, зонадон æмæ æхсæнадон архайджытæ, сфæлдыстадон интеллигенцийы минæвæрттæ, бæлвырдгонд æрцыдысты куысты сæйраг фæдыздæхæнтæ, арæзт æрцыд архайды сæйраг нывæст.
Æмбырд байгом кæнгæйæ, Пухаты Эрик банысан кодта, зæгъгæ, Хуссар Ирыстонæн стыр трагикон цаутæй нысангонд чи æрцыд, ссæдзæм æнусы фыццаг æртыккаг хайы, уыцы цаутæ хъуамæ æнусонгонд æрцæуой, æмæ ма куыд æмбæлы, афтæ æрцæуой сахуыргонд дæр.

«Мах хæсджын стæм, цæмæй æппæтдæр саразæм, ирон адæмы геноциды амæттæгты нæмттæ сæнусон кæныны сæраппонд, цæттæгонд хъуамæ æрцæуа æнæфæцудгæ историон æвдисæнтæ æмæ документалон æрмæджытæ дунеон æмæхсæнады сын тæрхон рахæссыны тыххæй… Уый ахсджиаг у махæн æмæ фидæны фæлтæртæн», - банысан кодта Пухаты Эрик.
Уый йæ ныхас аздæхта Къамисы уæнгтæм, цæмæй бахъуыды рæстæджы уынаффæмæ хаст чи æрцыд, уыцы нывæст баххæстгонд æмæ æрвыст æрцæуа республикæйы Президентмæ сфидар æй кæнынмæ.
Афтæ ма Пухаты Эрик фæндон бахаста, цæмæй геноциды охыл мадзал хаст æрцæуа мидведомствæйон нывæстытæм.
Нывæсты фæлгæтты æмткæй нысангонд у цæрджыты ‘хсæн æмбарынгæнæн куыст ауадзын, уыцы нымæцы Цæгат Ирыстоны дæр, цыртытæ, мемориалон фæйнæджытæ æмæ æндæр мысæн нывæстытæ сæвæрын, 1920 азы цауты фæдыл зонадон куыстытæ ныффыссын, музейтæ саразын, геноциды темæйыл равдыстытæ, «тымбыл фынгтæ», дунеон конференцитæ уадзын, дзыллон-информацион фæрæзты уыцы цауты тыххæй информаци мыхуыр кæнын.
Æмбырды рæстæджы арæзт æрцыдысты кусæгон къордтæ 1920 азы геноцидæн æхсæнадæмон тæрхон рахæссыны охыл уæвæг æрмæджытæ зонадон æгъдауæй ахуыр æмæ æмбырд кæнын, информацион æгъдауæй сæ ифтонг кæнын.
Æввахс рæстæджыты ма уагъд цæудзæн конкурс ирон адæмы ныхмæ геноциды амæттæгты нæмттæ сæнусон кæныны фæдыл хуыздæр мемориалон объект саразыны тыххæй.
РХИ-йы Президент æмæ Хицауады
пресс-службæ