Nog adres

Алексей Мачнев: «Закъоны райст фæхуымæтæгдæр кæндзæн Цæгат æмæ Хуссар Ирыстоны экономикон интеграци»

Республикæ Цæгат Ирыстон-Аланийы Парламенты спикер Алексей Мачнев бахатыд æхсæндунеон хъуыддæгты фæдыл УФ Федерацийы Советы комитеты сæрдар Константин Косачевмæ, цæмæй баххуыс кæна «Уæрæсейы Федерацийы арæнгæрон æмкуысткæнынады тыххæй» закъоны райст фæтагъддæр кæнын, кæцы фæахъаз уаид Цæгат æмæ Хуссар Ирыстоны 'хсæн экономикон интеграцийы процесс фенцондæр кæнынæн.
Дзæуджыхъæуы ауагъдæуыд æхсæндунеон хъуыддæгты фæдыл УФ Федерацийы Советы цæугæ рабадт, цыран уынаффæ цыд «Уæрæсейы Федерацийы субъектты æхсæндунеон æмæ æддаг-экономикон бастдзинæдты координацийы тыххæй» федералон закъоны реализацийыл.
Рабадты рæстæджы банысан æрцыд, зæгъгæ, Цæгат Ирыстон æнхъæлмæ кæсы «Уæрæсейы Федерацийы арæнгæрон æмкуысткæнынады тых-хæй» закъоны райстмæ, уымæн æмæ регионы приоритетон здæхт у Хуссар Ирыстонимæ экономикон контакттæ.

«Мах нæ хъус дарæм Мæскуы æмæ Цхинвалы 'хсæн æнгом ахастытæм, мах та ам æвзарæм бæрæг зындзинæдтæ. Раст у, абон арæны сæрты хизыны фæтк фæхуымæтæгдæр, фæлæ мах æмбæлæм æнæаскъуыддзаггонд æрвылбонон проблемæтимæ, кæцытæ иуварс хъуамæ æрцыдаиккой уыцы документты райстæй. Æз æй бамбарын кæндзынæн хуымæтæг цæвиттонæй, абон Хуссар Ирыстонмæ кæнæ уырдыгæй иу фæткъуыйы асыкк æрласын проблемон у, уæдæ ма афтæмæй цавæр экономикон æмкуысткæнынадыл ис дзурæн? Ацы закъоны райст, уыцы нымæцы ацы фарстатæ дæр æрконд æрцæудзысты цавæрдæр фарстатæм, фæхуымæтæгдæр уыдзысты», - бахахх кодта Мачнев.
Йæ рады Константин Косачев банысан кодта, зæгъгæ, ацы закъоны проектыл куыст райдыдта дæс азæй фылдæры размæ æмæ, гæнæн ис, райст æрцæуа тагъд рæстæджы.
Уый банысан кодта, зæгъгæ, максималонæй цыбыр рæстæгмæ райсын хъæуы «Уæрæсейы Федерацийы арæнгæрон æмкуысткæнынады тыххæй» дыккаг базæйон закъон, кæцы æнхъæлмæ кæсы йæ райстмæ 2010 азæй фæстæмæ - Паддзахадон Думæйы йыл фыццаг хатт куы бауынаффæ кодтой, уæдæй фæстæмæ.
«Дзырд цæуы ууыл, цæмæй хатдзæгтæ арæзт æрцæуа къорд дæлзакъонон актæн, кæцытæй бирæтæ æвзæрын кæнынц уæлæмхас проблемæтæ субъектты рæзтæн. Мах уый ам банкъардтам, уымæн æмæ РЦИ-Алани - федералон зылды иунæг субъект хаст æрцыд, фæсарæйнаг æмбæстæгты уæвынадæн бар кæм нæй, уыцы территориты номхыгъдмæ. Уымæй арæзт цæуынц практикон проблемæтæ», - загъта сенатор.
Рабадты банысан чындæуыд, зæгъгæ, уыцы закъоны проекты райст позитивонæй бандавдзæн регионы туризмы рæзтыл дæр.
Рабадты рæстæджы Цæгат Ирыстоны сæргълæууæджы хæстæ рæстæгмæ æххæстгæнæг Битарты Вячеслав Константин Косачевы схорзæхджын кодта республикæйы уæлдæр хорзæхæй - «Во славу Осетии»-йы майданæй, æмæ банысан кодта, зæгъгæ, Æхсæндунеон хъуыддæгты фæдыл Федерацийы Советы комитеты сæрдары архайдæн рагæй фæстæмæ кад кæнынц Цæгат æмæ Хуссар Ирыстоны.