Nog adres

Мадæлон æвзаджы бахъахъхъæныны программæ дарддæр æххæст цæуы

РХИ-йы Хицауады Сæрдар Хъуылымбегты Доментийы разамынадæй уагъд æрцыд Республикæ Хуссар Ирыстоны Хицауады цур Ирон æвзаджы рæзты, бахъахъхъæнын, æмæ ахуыр кæныны программæйы фæдыл къамисы радон рабадт. Æмбырды хайад райстой Хицауады Сæрдары хæдивæг Пухаты Эрик, Ахуырад æмæ зонады министр Гасситы Натали, Культурæйы министр Остъаты Мадинæ, афтæ ма сфæлдыстадон интеллигенцийы минæвæрттæ æмæ ирзонынады специалисттæ.
Уынаффæ цыд 2016 азы «Ирон æвзаджы бахъахъхъæнын, ахуыр кæнын æмæ рæзты фæдыл 2012-2016 азты паддзахадон программæйы» ауадзинаг мадзæлттыл.
Хицауады Сæрдар банысан кодта, зæгъгæ, нывæзтмæ хъуамæ бахаст æрцæуой ирон æвзаджы рæзтæн иууыл ахъаздæр цы мадзæлттæ уыдзысты, уыдон.

«Мах хъуамæ уыдонæн аргъ кæнæм, ирон æвзаджы рæзты бæлвырд хæстæ æххæст кæнынæн куыд ахъаз уыдзысты, уымæ гæсгæ, иннæ критеритæ та хъуамæ æвзæрст цæуой зонадон советы», - банысан кодта Хъуылымбегты Доменти.
Уый ма йæ ныхасмæ бафтыдта, зæгъгæ, ирон æвзажы программæ абоны мадзалæй нæ фæуыдзæн. Уый нæ, фæлæ Уæрæсейы Федераци æмæ Республикæ Хуссар Ирыстоны æхсæн Æмцæдисад æмæ интеграцийы фæдыл бадзырды нысангонд у Республикæ Хуссар Ирыстонæн уырыссаг æмæ ирон æвзаджы рæзты программæтæ æххæст кæныны сæраппонд æххуыс. Уый та нысан кæны, ацы фарстытæм хъусдрд кæй цæудзæн дæргъ-вæтин æмгъуыды.
Æмбырды ма уынаффæ цыд терминологийы къамис саразыны фарстытыл дæр. Уыцы къамисмæ хъуамæ бацæуой уæрæх профилы специалисттæ, телеуынынады баконд æрцæуой, ирон культурæ æмæ ирон æвзаджы рæзт чи парахат кæна, ахæм программæтæ, скъолайы арæзт æрцæуой сæйраг предметтæй ахуыры къордтæ, уæлдайдæр та ирон æвзагæй.
РХИ-йы Президент æмæ Хицауады пресс-службæ