Nog adres

Арфæтæ

РХИ-йы ПРЕЗИДЕНТ ТЫБЫЛТЫ ЛЕОНИДЫ АРФÆ ХУССАР
ИРЫСТОНЫ АДÆМÆН КОНСТИТУЦИЙЫ БОНЫ ЦЫТÆН

Зынаргъ æмбæстæгтæ!
Абон Хуссар Ирыстоны Конституци нысан кæны юбилей - 15 азы сæххæст йæ райсыны бонæй. 15 азы дæргъы махæн Конституци у сæйраг закъон. Уымæ гæсгæ хъуамæ цæрæм не 'ппæтдæр, Президентæй райдайгæйæ.
Республикæ Хуссар Ирыстоны Конституци у æппæт паддзахадæн йæ астæумагъз. Уый у президентон тыхджын хицауады æмæ ахадгæ парламентон хъусдарды, адæймаджы барты хъомысад æмæ демократон тæрхоны системæйы бындур.
Республикæ Хуссар Ирыстоны Конституци у демократийы æвдисыны политикон-барадон формæ. Демократийæн та, кæй зæгъын æй хъæуы, уæвæн нæй æнæ парламентаризмæй. Уавæрæй пайда гæнгæйæ мæ фæнды банысан кæнын нæ республикæйы царды ахсджиаг - Республикæ Хуссар Иырстоны закъондæттынадон орган - Парламенты сырæзтыл 25 азы кæй сæххæст, уыцы ахсджиаг цау.
Æмæ мах райсом, 9 апрелы, Республикæ Хуссар Ирыстоны Парламенты юбилей кæй нысан кæндзыстæм, уый у æвдисæн, Конституци хицауады минæвæртты куыстæн кæй аразы бæстон уавæртæ.

Кæй зæгъын æй хъæуы, бæрæг аиппытæ ис Республикæ Хуссар Ирыстоны Конституцийы, æмæ уыдон хъæуы рараст кæнын. Конституци у ахæм удæгас механизм, кæцыйыл хъуамæ æндавой нæ паддзахады ивддзинæдтæ. Конституцийы хуыздæр кæныны хъуыддаг æз æвæрын закъондæттынадон архайды сæргъы. Уыимæ иумæ, куыд Конституцийы гарант, афтæ æппæт бæрндзинадимæ зæгъын, Конституцийы уагæвæрдтæ ивд æмæ хуыздæргонд кæй цæудзысты æрмæстдæр Конституцион закъон-дæттынады къамисы фæндонрахасты фæстæ, хицауады æппæт къабæзты разыдзинады фæрцы. Æрмæстдæр ахæм амалæй махæн нæ къухы бафтдзæн конституцион стабилондзинад.
Зынаргъ æмбæлттæ, уе 'ппæтæн дæр арфæ кæнын Конституцийы боны цытæн! Уый у адæмон бæрæгбон! Уый у æхсæнады иудзинады бæрæгбон!
Уадз æмæ ацы бон не 'ппæтæн дæр раттæд тых æмæ фидар ныфс, нæ разы цы хæстæ æвæрд ис, уы-дон сæххæст кæныны сæраппонд нæ Ирыстон - Алани æмæ Стыр Уæрæсейы хæрзæбонæн!

РХИ-йы ХИЦАУАДЫ СÆРДАР ХЪУЫЛЫМБЕГТЫ ДОМЕНТИЙЫ АРФÆ
РЕСПУБЛИКÆЙЫ АДÆМÆН КОНСТИТУЦИЙЫ БОНЫ ЦЫТÆН

Цытджын æмбæстæгтæ!
Хицауады æмæ мæхи номæй арфæ кæнын сымахæн - Республикæ Хуссар Ирыстоны æмбæстæгтæн Конституцийы боны цытæн!
2001 азы 8 апрель ист чи æрцыд, паддзахады уыцы Сæйраг архайæг закъон æрфидар кодта Хуссар Ирыстоны адæмы историон фæндаг равзарыны æмæ хæдбар паддзахады цæрыны, сæ хæдбындур культурæ, æвзаг æмæ хæдбындурдзинад бахъахъæныны бар.
Конституцийы æвæрд паддзахадон арæзтады æмæ æхсæнадон-политикон хæрзарæзты, социалон рæстдзинады, сæрибардзинад æмæ демократийы, уыцы фундаменталон бындуртæ царды сæххæст кæнын, уый хуымæтæджы хæс нæу. Уый аскъуыддзаг кæнын къухы бафтдзæн æрмæстдæр æппæт паддзахадон институтты биноныг куысты руаджы .
Республикæйы къухдариуæгад бирæ хъарутæ здахы Конституцийы æппæт уагæвæрдтæ æххæст кæ-нынмæ, нæ бæстæйæн дунеон тыгъдады хорз ном скæныны сæраппонд.
Зынаргъ æмбæстæгтæ!
Ацы нысаниуæгджын бон айсут иууыл хуыздæр фарны, царды хæр-зты æмæ хæрзиуджыты фæндиæгтæ!

РХИ-йы ПАРЛАМЕНТЫ СÆРДАР БИБЫЛТЫ АНАТОЛИЙЫ
АРФÆ КОНСТИТУЦИЙЫ БОНЫ ЦЫТÆН

Зынаргъ æмзææххонтæ!
Цытджын æмбæстæгтæ!
Арфæ уын кæнын нæ республикæйы сæйрагдæр бæрæгбонтæй иу - Конституцийы боны цытæн!
Иумæйагадæмон хъæлæсæппæрсты фæрцы райсгæ Конституци æрфидар кодта нæ адæмы цæрыны бартæ сæрибар паддзахады, сæ культурæ æмæ æвзаг бахъахъæныны фадæттæ, бирæбæрцæй сбæл-вырд кодта не 'хсæнады политикон, экономикон æмæ социалон царды æвæрццаг размæцыд. Конституцийы æвæрдæрцæуæг паддзахадон æмæ æхсæнадон-политикон арæзтады фундаменталон бындуртæ, рæстдзинад æмæ демократийы принциптæ, адæймаджы бартæ æмæ сæрибары гарантитæ царды æххæст кæныны хъуыддаг ахъаз кæны æхсæнады иудзинад, сабырад æмæ стабилондзинад æрфидар кæнынæн, дарддæр дæр нæ демократи æмæ прогрессы фæндагыл цæуынмæ разæнгард гæнгæйæ.
Мæ зæрдæ уын зæгъы, зынаргъ хæлæрттæ, æнæниздзинад, хæрзиуджытæ, æнтыстытæ нæ райгуырæн Ирыстоны хæрзиуæгæн уæ хъуыддæгты.