Nog adres

Тыбылты Леонид фембæлд уæрæсейаг бизнесментимæ

Мæскуыйы, кусæгон балцы уæвгæйæ, Хуссар Ирыстоны Президент Тыбылты Леонид фембæлд уæрæсейаг бизнесментимæ, кæцытæ равдыстой цæттæдзинад æмбæлон инвестицитæ Хуссар Ирыстонмæ бахæссыны тыххæй.
Ацы фембæлд сорганизаци кодта уæрæсейаг агрофирмæ «Белая дача»-йы президент Виктор Семенов, кæцы уый размæ уыд Хуссар Ирыстоны æмæ, Цхинвалы Тыбылты Леонидимæ фембæлды рæстæджы цы бадзырдтæ арæзт æрцыд, уыдоныл лæмбынæгдæр æрдзурыны тыххæй æрæмбырд кодта бизнесменты. Уæд боны фæткы уыд фарст, цæмæй Хуссар Ирыстоны территорийыл салаттæ æрзайын кæныны проектæн инвестицитæ бахæсса агрофирмæ «Белая дача».
Фембæлды рæстæджы уæрæсейаг столицæйы фæзынд ног фæндæттæ къорд бизнесмены ‘рдыгæй, кæцытæ равдыстой цæттæдзинад хъæууонхæдзарадон сегменты рæзты инвестицитæ бавæрыны тыххæй.

«Абон мын æхсызгон уыд, æрмæст рæсугъд ныхæстæ нæ, фæлæ серьезон фæндæттæ фехъусын. Республикæйы къухдариуæгады фæнды, цæмæй бæстæмæ æрцæуа инвестор. Уый тыххæй махмæ арæзт цæуы æмбæлон уавæртæ. Планы ис республикæмæ цымыдисгæнæг ин-весторты æрцыд. Мах цæттæ стæм иннæ этапыл аныхас кæнынмæ дæр, цæмæй, нæ экономикæ сфидар кæныны тыххæй цы плæнттæ снывæстам, уыдон практиконæй аскъуыддзаг кæнæм. Республикæйы Парламент æмæ адæммæ мæ Ныстуаны æз рахицæн кодтон сæрмагонд пункт потенциалон инвестортæ æрбакæныны тыххæй, æмæ мах республикæйы цы гæнæн ис, уымæй архайæм, цæмæй æмбæлон уавæртæ саразæм бизнес-проектты рæзтæн, афтæ ма цæмæй Хуссар Ирыстон цымыдисон уа инвестортæн», - загъта Тыбылты Леонид.
Президент ма бахахх кодта, республикæйы мæр хъæздыг кæй у æмæ проекты реализацийæн хорз климат кæй ис, уый дæр.
«Нæ зæххытæ тынг хъæздыг сты, Хуссар Ирыстоны климат æмæ æрдз дæр дзуапп дæттынц агросæудæджерад райрæзын кæнынæн. Фæлæ зæхмæ хъæуы зилын æмæ йæ бакусын. Мах архайæм нæхи тыхтæй хъæууон хæдзарад сæндидзын кæныныл, фæлæ мæ уыцы иурæстæджы фæнды уыцы проекты реализаци дæр. Уырны мæ, мах кæрæдзи бамбардзыстæм, æмæ нæ уый фæстиуæгæн рахиздзыстæм плангонд идейæты реализацимæ. Ацы хъуыддагмæ нæ цымыдисдзинад у æмвæнд æмæ хорз у, ацы фадæттæй куы спайда кæниккам», - загъта Тыбылты Леонид.
Йæ рады Виктор Семенов банысан кодта, æхсызгон ын кæй у хуссарирыстойнаг паддзахады сæргълæууæгимæ фембæлд, æмæ дыууæ фарсы къухы цы кæрæдзимбарынад бафтыд, уый.
«Æз уын бауарзтон уæ зæххы. Куыд æй сахуыр кодтам, афтæмæй Хуссар Ирыстоны æрдзон потенциал стыр у. Нæ проектты реализацийæн махæн æппæт уавæртæ дæр ис. Реализаци нæ фæнды цалдæр проекты, фæлæ райдайдзыстæм салатты æрзайын кæнынæй. Хуссар Ирыстоны æрдз нын фадат дæтты æнæхъæн афæдзы дæргъы 16 хуыз салаты æрзайын кæнынæн. Ды куы сразы уай, уæд мах ацы аз дæр зымæджы рæстæджы æрзайын кæндзыстæм салаттæ», - загъта уый.
Виктор Семенов ма йæ ныхасмæ бафтыдта, зæгъгæ, салаттæ æрзайын кæнынæн мæрмæ уыйас зилын нæ хъæуы. Сæйраг у донхæркæнын, афтæ ма райдианы хъæуы минималон электроэнергийæ спайда кæнын. Уый фæстæ гæнæн ис сæвæрдæуа хурæй хъæрмадисæн батарейтæ.
«Афтæ хъуыды кæнын, æмæ уыцы фарстытæн се 'ппæтæн дæр ис аскъуыддзаггæнæн. Махмæ ис конкретон фæндæттæ, æмæ йæ бахахх кæндзынæн, йæ аргъ у ауæй кæныны гаранти. Мах сæ æрмæст зайын нæ кæндзыстæм, фæлæ ма сæ уæй дæр кæндзыстæм. Фæнды нæ тагъд рæстæджы мæры басгарын æмæ уавæртæ сахуыр кæнын. Иудзырдæй, æппæт дæр нæхи цæстытæй фенын æмæ ацы аз халсар æрзайын кæнын», - загъта Виктор Семенов.
Мадзалы организатор, стыр уæрæсейаг агрофирмæ «Белая дача»-йы президент Виктор Семенов бузныг загъта Тыбылты Леонидæн, фембæлды хайадисæг инвестортæн радзурынæн фадат кæй фæцис, сæ фæндондзинады æмæ Хуссар Ирыстоны цы ресурс реализацимæ хъавынц, уый тыххæй.
«Бузныг абоны фембæлды тыххæй. Мах ныр ууыл кусдзыстæм активонæй. Нæ фæндоны реализацийæн уынæм стыр потенциал, куыд адæймагон, афтæ климатон. Ныфс нæ ис уе 'ххуысæй æмæ афтæ хъуыды кæнын, æмæ ацы плæнттæ мах среализаци кæндзыстæм», - бахахх кодта уый.
Фембæлды рæстæджы дзырд цыд республикæйы дыргъдæттæ, сæндæттæ ныккалыныл, хъæрмæттæ саразыныл.
Президенты куырдиатмæ гæсгæ бизнесментæ республикæмæ æрцæудзысты тагъд рæстæджы æмæ бынаты фембæлдзысты сæ коллегæтимæ.
Республикæ Хуссар Ирыстоны Президенты
пресс-службæ