Nog adres

Архайын райдыдта клуб «Дзурут иронау»

IMG-20160328-WA0032.jpgХуссар Ирыстоны паддзахадон университеты арæзт æрцыд клуб «Дзурут иронау», зæгъгæ. Йæ уæнгты фыццаг рабадты клубы сырæзты ахсджиагдзинады фæдыл радзырдта профессор Плиты Гацыр:
«Нæ абоны æрæмбырды аххосаг тыхджын ахсджиаг у. Хъусинаг чи бакаст, уыдон мын афтæ, зæгъгæ, дам, æй афонмæ дæр аразын хъуыд. Ацы клуб ма нын уыд советон дуджы дæр. Фæлæ йæм змæстыты рæстæджы ничиуал æркаст. Хъуыддаг уый мидæг ис, æмæ ам хайад хъуамæ исой æрмæст ирон факультетты студенттæ нæ, фæлæ иннæтæ дæр. Алы факультетты дæр цæуынц ирон æвзаг. Мах хъуамæ зонæм не ’взаг дунейы ’взæгтæй хъæздыгдæр кæй у, æмæ не ’гъдæуттæн æмбал кæй нæй. Нæ дипломимæ уый дæр æнæмæнгхъæуæг у, цæмæй зонæм кæм цæрæм æмæ чи стæм.
Ис нæм иу мæгуырау хъуыддаг дæр. Горæтæн сæ æвдай процент бынæттон телеуынынадмæ нæ кæсынц. Хорз сты, æввзæр сты — кæсын сæм хъæуы. Фæдзурынц ма, нæ телеуынынады, дам, цъус вæййы алæвæрдтæ ирон æвзагыл...
Фæлæ абон нæ фарст уый нæу. Литературæ, æвзаг æмæ фольклор ахуыр кæнут. Æгæрыстæмæй, Нарты эпосы ахæм дзырдтæ ис, æмæ сæ ахуыргæндтæ нæма райхæлдтой. Бирæ ис не ’взаджы ахæм дзырдтæ, æмæ сæ адæм нæ зонынц, пайда дæр сæ, кæй зæгъын æй хъæуы, нæ кæнынц. Дзаумайæ куы нæ пайда кæнай, уæд та рæмпæг кæны, сæфгæ кæны. Æмæ уæдæ æвзагыл дæр куы нæ дзурай, уæд рох кæны.
Клубмæ цæуыны бар алкæмæн дæр уыдзæн. Нæ клубæн стыр нысаниуæг ис. Къоста йæ цæрæнбонты иронау никуы ахуыр кодта, фæлæ куыста æвзаг æмæ литературæйы фарстатыл. Æгæрыстæмæй, йын дыууæ статьяйы ис мивдисæджы тыххæй. Йæ дзырдуатон сконды цы нæ дзырд ис. Æмæ цæмæй уыцы дзырдтæ зонæм, уый тыххæй нын ацы клуб æххуыс кæндзæнис.
Абон нæ хæстæ цы сты? Нæ сæйраг хæс у — фылдæр ирон дзырдтæ базонын, цæмæй не ’взаг уа хъæздыг. Нæ алыварс бирæ цыдæртæ уынæм, фæлæ сын сæ нæмттæ нæ зонæм, нæ ирон хæринæгтæ хæрæм, фæлæ кæцæй цæуынц æмæ цы хуыйнынц, уыдонæй бирæты нæ зонæм.
Ацы клубы-иу æрбамбырд уыдзыстæм къуыри иу хатт.
Ирон дзырдтæ кæмдæр лæууынц æмæ æнхъæлмæ кæсынц, кæд сæ спайда кæндзысты. Бирæ æнæмбæрстгонд дзырдтæ вæййы текстты мидæг, æмæ бавналдзыстæм уыдон æвзарынмæ. Разæй ацы хъуыддаджы хъуамæ уой ирон факультеттæ. Уымæн æмæ сæ «къæбæр» уый у.
Æвзаг нын хъæздыг ис, зонгæ йæ куыд æмбæлы, афтæ нæ кæнæм уый йедтæмæ. Историкон-этимологион дзырдуат æртæ нацийы йедтæмæ нæй, æмæ дзы сæ иу ирæттæн ис. Уымæ гæсгæ фидарæй зæгъæн ис, æмæ ирон æвзаг мæгуыр нæу«.
Клубы рабадты йæ хъуыдытæ ирон æвзаджы фæдыл загъта университеты хистæр ахуыргæнæг Плиты Серго дæр.
«Абоны бон ирон адæймаг кæм фæнды ма ахуыр кæна, уæддæр йæ уды арф æвæрд хъуамæ уа национ идейæ. Куыд загътам, афтæмæй йæ дырысдæрæй ахуыр кæнын райдайдзыстæм. Уымæн æмæ студент у нæ нацийæн йæ фидæны фæлтæр, йæ сомбоны ныфс. Йæ мадæлон æвзагыл æлгъ чи кæны, æмæ йæ йæ сæрмæ чи нæ хæссы, уый æндæр нацийы минæвæрттæн у худинаджы бынаты».
ДРИАТЫ Лейла