Nog adres

Фембæлд театр æмæ кинойы зынгæ актеримæ

РХИ-йы Президент Тыбылты Леонид йæхимæ райста театр æмæ кинойы уæрæсейаг актеры, РЦИ-Аланийы адæмон артист Цаллаты Вадимы. Фембæлды хайад райстой Культурæйы министр Остъаты Мадинæ æмæ УФ-йы РХИ-йы минæварады атташе культурæйы фарстаты фæдыл Владимир Сергеев.
Тыбылты Леонид бузныг загъта Уæрæсейы нæ республикæйы минæварады кусджытæн, минæвар Гасситы Зауырæн, сæ куысты æндæр приоритетондæр фæдыздæхтыты æмрæнхъ сæ хъус кæй дарынц уæрæсейаг тыгъдады культурæйы фарстатæм.
«Уый мæнæн у æхсызгон. Культурæйы фарстатæ махæн хъуамæ уой кæддæриддæр фыццаг бынаты. Республикæйы рæзы ног фæлтæр, кæцы разæнгардæй хъуамæ цæуа хисдæр кармæ. Ацы ран культурæ æмæ аивадæн ис скъуыддзаггæнæн нысаниуæг», — загъта Президент.
Уый ма куыд банысаан кодта, афтæмæй Хуссар Ирыстоны культурæйы къабазмæ здæхт цæуы стыр хъусдард æмæ загъта, зæгъгæ, Уæрæсеимæ афæдзы размæ Æмцæдисад æмæ интеграцийы тыххæй къухтæ цы бадзырдыл фыст æрцыдис, уымæ уæлæмхас сразыдзинæдтæй фыццаг уыд ацы къабазы сразыдзинад.
Актерæн йæ архайды тыххæй дзургæйæ, Тыбылты Леонид загъта, зæгъгæ, Цæллати Вадимы хайадистæй 2008 азы августы цауты фæстæ цы аивадон киноныв ист æрцыд, уый уыд информацион блокадæйы хæдхуыз атынд.
«Киноныв фенын кодта, растдæр Гуырдзыстон кæй ныббырста фынæй горæт Цхинвалмæ, куынæг кодта, цыдæриддæр удæгас уыд, уыдон. Бирæбæрцæй ацы кинонывы руаджы дунеон æмæхсæнад фыццаг азты базыдта, æцæгæй цы ’рцыдис Хуссар Ирыстоны адæмыл, уыцы уæззау æмæ тæссаг бонты, уый», — загъта Президент.
Уый ма банысан кодта, зонгæ кæй у авторы ног проектимæ — киноныв «Мафия»-имæ, кæцымæ развæлгъау бакастысты Хуссар Ирыстоны столицæйы æмæ йын уый охыл раарфæ кодта.
Йæ рады Цæллати Вадим радзырдта, хуссарирыстойнаг коллегæтимæ иумæ реализаци кæнын æй кæй фæнды, уыцы идейæтæ æмæ планты тыххæй. Афтæ ма радзырдта йæ мысинæгтæ, кæцытæ баст уыдысты августы хæсты тæссаг цауты тыххæй ист кинонывимæ.
«Сымах зонут, киноныв ист кæй цыдис 2009 азы. Æз æрымысын хæсты фæстæ Цхинвалы, пырхæнты, адæмы уавæр, сæ цæсгæмттæ æмæ цæстытæ. Абон та мæнæн Хуссар Ирыстон байгом бынтон æндæр фарсæрдыгæй. Горæт фæивта, арæзт цæуы, цард æхсиды. Адæм кæрæдзийыл æмбæлынц мидбылхудгæ, цингæнгæ. Мæнæн уый ахсджиаг у. Фæнды мæ кусын, проекттæ размæ кæнын, иумæйагæй исты æрымысын», — банысан кодта уый.
Актеры ныхæстæм гæсгæ, уый фæнды ногæй Цхинвалмæ æрцæуын йæ коллегæтимæ.
«Гæнæн ис сорганизацигæнæн цымыдисон фембæлдтытæ, уæлдайдæр та уымæн æмæ ацы аз Уæрæсейы расидт æрцыд уæрæсейаг кинематографийы азæй. Фæнды мæ фылдæр æмбæлын фæсивæдимæ. Æмбæрстгонд у, спорт кæй разæнгард кæны æрыгон фæсивæды æмæ йæ хъæуы рæзын кæнын. Фæлæ, фæсивæдмæ хъæуы аивадмæ уарзондзинады æнкъарæнтæ дæр æвзæрын кæнын. Махæн æхсызгон уыдзæн ардæм æрыздæхын æмæ нæ идеятæ царды ныббиноны икæнын...», — йæ ныхасмæ бафтыдта Цæллати Вадим.
Республикæйы Культурæйы министр Остъаты Мадинæ радзырдта, зæгъгæ, къухтæ кæуыл æрфыстæуыд, уыцы уæлæмхас сразыдзинады нысан цæуы Хуссар Ирыстоны территорийыл кинофестивальтæ организаци кæнын.
«Мах ныридæгæн кусæм ацы фарстатыл æмæ махæн уыдзæн æхсызгон коллегæты ’рдыгæй æххуыс. Хуссарирыстойнаг кинематографи хъуамæ сырæза æмæ кусын райдайа, уымæн æмæ нæ фæсивæдæй бирæтæ Уæрæсемæ цæуынц æмæ уым ахуыр кæнынц ацы дæсныйадыл. Ис бирæ идеятæ æмæ плантæ. Республикæйы ис бирæ хорз актертæ», — загъта уый.
Фембæлды кæрон Тыбылты Леонид банысан кодта, зæгъгæ, республикæйы разамынад хæцдзæн идеятæ æмæ цымыдисон проектты æвварс æмæ ма йæ ныхасмæ бафтыдта, зæгъгæ, йын кæддæриддæр æвæрццаг ахаст уыд иумæйаг проекттæм, цыран коллегæтæ исынц сæ кæрæдзийы фæлтæрддзинад.

Республикæ Хуссар Ирыстоны Президенты официалон сайт